الأحد، أكتوبر 12، 2008

زمن الأحتلال والوقاحة ...والأنحلال ..

زمن الأحتلال...والوقاحة..والأنحلال

كل يوم ... وكل شهر .. وحتى كل سنة ، بحاول انى افكر فى شئ يخلينا نعرف احنا مش متقدمين ليه
كل لما اكلم حد واقولة احنا من المفروض نعمل حاجة علشان البلد دى يرد ويقول :- ايه ياعم الجندى المجهول فكك من الوطنية دى وشغل حاجة نسمعها؟..... وقد يرد أخر :- يابنى أعقل ..أعقل ،انا مش عارف ايه اللى لعب فى دماغك وقعد يقولك الكلام الغريب دا .
بعديها بخمس دقائق الكلام يجيب بعضه.. والكل ينزل دش فى ذكريات حرب اكتوبر وعدد جيشنا وعملنا ايه ، وايه اللى حصل لجمال عبد الناصر ،وحكاية الثورة وسعد زغلول ، وعرابى ووووووو.....الخ لحد ما نجيب سلسفيل الفراعنة .
عرفت اننا بجد محتاجين مصل وطنية متكون من عدة تركيبات منها الخير والحب والبناء والروح الحلوة .
عرفت بجد ان احنا محتاجين حد يصحصحنا ...ـ حد يفهمنا ـ حد يقولنا يا جدعان ارجعوا لحبكوا لبلادكم...بس متقلقش هتلاقيهم فى الأخر بينفضولك

متتعبش نفسك


لما نيجي نتكلم عن الفساد .... ومازاد يا فساد ، هنقول اولها المخدرات

الشعب من كتر ما اتخدر ...نسى هو وطنه فين
طب متيجي نشوف المخدرات دى بتيجي منين ؟؟!

اكيد بتيجي من خارج مصر ..طب قول وخلصنا!

بص ياعم خلاصة الموضوع ان فى ناس بيجيبو الحاجات دى هنا البلد...

طب هما مين ؟؟

ناس كبيرة اوى اوى اوى

مين يعني؟؟

مش هقول علشان دا سر

طيب السلطات عارفة؟؟

هههههههه دارى على شمعتك تأيد يا نجم

طب كمل ..

وبعد كدة بيدوها لتجار الجملة ، اللى هما تحت اديهم ، وبعد كدا بيدوهم لتجار القطاعى ، وتجار القطاعى بيكون لكل واحد منطقة المسئول على تداول الزفت دا فيها .

اه وبعدين ؟؟

طبعاً بقى بتبقى فى ايد الشباب ...، والشباب الغلابة هما اللى بيتمسكوا هههه ...، او ممكن تجار القطاعى اللى يتمسكو .

طب وتجار الجملة ؟؟

لا ياباشا دول بيبقوا عليهم حماية .... انتى فايرس يعنى ... ، ثانياً عاملين صفقة مع ناس اسمها "هأبجك ونفضلى"
يعنى ايه؟؟

الــحـــدق يــفــهــم

طب كام واحد فى مصر بيشرب مخدرات..؟

تقريبا تلات تربع شعب مصر

طب والربع الأخير ؟؟؟

ولله انتا شكلك غبى ....اكيد طبعاً من النساء والأطفال تحت التأسيس المخدراتى ..وكبار السن والشيوخ والمدونين هههههه.

وياسيدى من كتر ما الناس بدأت تشرب تشرب تشرب ، لحد ما اعتقدوا انهم عايشين فى الهند الديمقراطية .. ومصر دى ولاية فى امريكا اللى كلهم شبه بعض (مقولة مأخوذة من واحد عامل دماغ) .

تانى حالة :- الجنيه غلب الكارنيه... تالت حالة :- مصالحى ومصالحك والمصلحة واحدة

طب تفتكر انهى حالة اللى كل الشعب بيتعامل بيها ؟؟

هنستنى لحد ما يعملوا كيلو بامية...يا بامية




نخش بقى على الأهم

تانى اهم حاجة فى حياتنا ...(غض البصر)

عجبتنى اوى فكرة قيام حملة اسمها "احترم نفسك" بس من المفروض ان ينضم ليها حاجة اسمها برضة "احترم نفسك...واحترمى نفسك" ، بس اعتقد أن فى كلتا الحالات ان الموضوع دا فاشل .

لأن فى حاجة اسمها بنات ليل ، والشباب اللى تحت التأثير المخدراتى مش هيقدروا يفرقوا ، ولله بقى بنت ماشية ولابسة لبس مغرى ...ممكن تكون فى غاية الأحترام وبنت ناس ، بس بقى اتفرج يا معلم ايه اللى بيحصل بقى لما بيكونو تحت تأثير الزفت ، دماغهم بتبقى عصفورة طايرة ، ومش حاسين بحاجة ، زي ما شفت بالتحرش الأخير .
المشكلة ان فى كتير منهم " بنات الليل او شبه بنات الليل طبعاً " بيبصوا لما هو أقوى من الشاب الاسبور .
فى بعض الأحيان يكون شحات .. بياع حلبسة زى اللى فى الرسمة ... بياع روبابيكيا .. (وذلك بأعتقادهم بأن الناس دول يتمتعون بقوة خارقة) .
( دا كلة ومش عايز الشباب الغلبان ينسى اسمه؟؟)
طبعاً يا حاج هتقولى طب دا كله بيجى منين ؟؟؟
هريحك ... انتا بتشتغل؟؟
-الصراحة ... لأ
طب تقدر تقولى . موبايلك نوعه ايه؟
نوعة كورى لسة جديد
وكوريا دى كنت تسمع انها بتصنع حاجة؟؟
لا
امال عملت كدة ازاى؟
اكيد افتكاسة مخترعينها .. او اى بتنجان .
كدة انا فهمت البطالة جت ازاى ...الف الف شكر وانا اسف على ضياع وقتك ..، (عرفتوا الوطنية بقى راحت فين؟؟ اكيد فى الهند الديمقراطية ...قصدى امريكا اللى كلهم شبه بعض)

جميع الحقوق محفوظة لمدونة اصحى يا مصر

هناك 16 تعليقًا:

  1. اول تعليق يا حلاوه

    شوف ياعم اسلام انا اتفق معاك كليا

    الا فى نقطه واحده بببببببس

    شوف يا سيدى احنا نخلي حمله اسمها احترم نفسك واحترمي نفسك

    بس على شرط يا معلم

    ان مباديء الحمله دي تكون كالآآتي للطرفين :

    غض البصر ولبس ملابس شرعيه او على الاقل محترمه لا تثير الغرائز

    ليه بقى ده محتاج بوست لوحده

    بس هاقول باختصار ان حضرتك وحضرتها مطالبين بغض البصر عمومااااااا
    سواء بقى الى قدامك لابس شرعي او قالع خالص

    وحضرتها وحضرتك برضه مطالبين بالبس الشرعي او المحترم بصرف النظر عن كونك ولد او بنت
    يعنى البنات عيب يبينوا الاندر وير انما الولاد الى ماشيين ببوكسراتهم دول حلوين ؟؟؟

    ولا يعنى الولاد مش لاقيين جواز والبنات هما الى لاقيين ؟؟؟


    بالنسبه للمخدرات يا نجم

    ما تجبليش شباب عامله دماغ يعتدوا على حرمات الناس وتقول معلش يا جماعه اصلهم مخدرين والله مش فايقين

    يا سلاااام ؟؟؟

    طيب بقى اضرب انا سجارتين محشيين واجي ارزع اي مواطن مصري قلمين وامشي عادي ولا كأن في حاجه ؟؟ اهو بجملة الاقلام حتى

    ما تبررش لحد لو سمحت

    انا كاتبه موضوع عن تبرير الخطأ هانزله بكره لو ربنا امر

    وبالنسبه للبنات الى بيدوروا على رجاله زي ما انت قلت
    ما دام لاقين رجاله موافقين يبقى ما تلومش عليهم

    بنفس مبدأ ما نلومش على الرجاله الى ما بتغضش بصرها عشان فى بنات قالعين ومبسوطين كده

    تحياتي لك واسفه على الاطاله بس اكيد انتم عرفتوا انى رغايه بقى خلاص

    ردحذف
  2. اممممممم
    وطنيه ايه دا بيعلموا البنات تضرب ازاى ضد التحرش تقول انت اخلاق احنا عاوزين نساعد بعض يا اسلام ونبطل انا مالى واللى شايف الغلط يصلحه


    رد على صبرنى يا رب

    معلش يا حبيبتى اللى اتحرشوا بيهم اخر مرة فيهم منقبه قولى بقى ايه السبب
    معلش القاهرة غير المنصورة على الرغم انك اكيد فى المشايه بتشوفى مهازل صح ولا انا غلطانه
    يعنى هى تربيه والمفروض يبقى فيه رادع قوى للقرف اللى بيحصل

    ردحذف
  3. اسلام احنا شعب مصرى..يعنى مينفعش حد يعلمنا لاننا مبنتعلمش فى الغالب
    ومينفعش حد يصححلنا لان مبنعترفش بغلطنا
    والانحلال والوقاحه والقباحه اليى فى الشارع لو مش عندنا استعداد ليها مش كانت ظهرت كل عيد ظاهره ومشكله وبقوه...
    والمخدرات اغلب شباب البلد غرقان فيها لدرجة انهم بيعتبروا البانجو والحشيش تفاريح مش مخدرات ولو اتكلمت مع واحد يقولك الحمد لله مش بشرب وبعدين تفهم منه انه قصده بالشرب يعنى الخمره والهيروين ودياوله...
    اما غض البصر فده شئ دينى وخلقى وسلوك المفروض يتمتع بيه كل مسلم
    وآلهى اليى ما بيغض نظره برغم الباليرنات والاصفر الكنارى والباديهات الفوشيا فى فسفورى الهى وانت جاهى تتخزق عينه يعن تاخد خزوق مده وخزوق كده هههههههههه
    بهزر طبعا ربنا يهدى الجميع والنظره الاولى ليك والتانيه عليك يا حلو كل واحد يحط كده فى دماغه ويلبسها نظاره فى عينه...
    موضوعك رائع رائع ..
    واسفه على تاخيرى فى الزياره والله شكلى كنت فى غيبوبه بس قريت البوستات اليى عدتنى وعلقت عليهم كلهم كمان
    هو انا ااقدر ده ديو يا ناس
    يله خد بالك من نفسك وهتضيفك فى الريدر عشان تبقا قدام عينى
    ومش فيها غض بصر دى....

    ردحذف
  4. اسلام احنا شعب مصرى..يعنى مينفعش حد يعلمنا لاننا مبنتعلمش فى الغالب
    ومينفعش حد يصححلنا لان مبنعترفش بغلطنا
    والانحلال والوقاحه والقباحه اليى فى الشارع لو مش عندنا استعداد ليها مش كانت ظهرت كل عيد ظاهره ومشكله وبقوه...
    والمخدرات اغلب شباب البلد غرقان فيها لدرجة انهم بيعتبروا البانجو والحشيش تفاريح مش مخدرات ولو اتكلمت مع واحد يقولك الحمد لله مش بشرب وبعدين تفهم منه انه قصده بالشرب يعنى الخمره والهيروين ودياوله...
    اما غض البصر فده شئ دينى وخلقى وسلوك المفروض يتمتع بيه كل مسلم
    وآلهى اليى ما بيغض نظره برغم الباليرنات والاصفر الكنارى والباديهات الفوشيا فى فسفورى الهى وانت جاهى تتخزق عينه يعن تاخد خزوق مده وخزوق كده هههههههههه
    بهزر طبعا ربنا يهدى الجميع والنظره الاولى ليك والتانيه عليك يا حلو كل واحد يحط كده فى دماغه ويلبسها نظاره فى عينه...
    موضوعك رائع رائع ..
    واسفه على تاخيرى فى الزياره والله شكلى كنت فى غيبوبه بس قريت البوستات اليى عدتنى وعلقت عليهم كلهم كمان
    هو انا ااقدر ده ديو يا ناس
    يله خد بالك من نفسك وهتضيفك فى الريدر عشان تبقا قدام عينى
    ومش فيها غض بصر دى....

    ردحذف
  5. يخرب عقلك

    إنت دماغ بجد ..

    مش عارفه اقولك غير كده ..

    تحياتي ,, و تعظيم سلام

    ياسمين

    ردحذف
  6. هههههه سجارتين محشيين جميلة يا صرنى
    لا منا بقولك يعنى ان الموضوع دا لازمله حل
    .. موضوع المخدرات ... انببه عليه لأنة نوع من انواع الفساد - من الأخر مش هينحل غير لما ينجل مكانة مجلس العشبكله
    دمتى ومعدية كويسة وجت بخير
    المرة الجاية تبقى تعزمى بساقع بقى

    ردحذف
  7. بسم الله ماشاء الله
    ايه يا ابى انتى معاكى فهرس الجمهورية كلها
    الماشية
    انا اعرف فى حتة عندنا برضة اسمها المشاية بتاعت الحبيبة
    يعنى المشايات زى بعضها؟؟
    الف شكر على التعليق الجيل يا ابى ومنتظرك فى الحاجات التانية

    ردحذف
  8. مـــــســز مــحاســـن
    الله يخليكي والف الف شكر على زيارتك للمدونة انا يا سيتى اللى اسف على تأخيرى فى الرد على بوستاتك وانشاء الله هتلاقى بوستاتك كلها متعلقة على حبل الغسيل بتاعى :d
    ولله اتلكنارى والاصفر والفوشيا والملمع انا عايز اقولك بقت موضة ودقة قديمة
    بقى فى الايام دى حاجات ابوظ وابوظ
    فهل بقى ونبى اى شاب هيبص ولا مش هيبص
    هيفغض نظرة ولا مش هيغض نظره؟
    مسز محاسن شرفتى وياريت البوست الجاى يعجبك برضة

    ردحذف
  9. عاقلة اشكرك على رأيك الجميل
    والكومينت الاكثر من رائع

    ردحذف
  10. ديو ازيك والمذاكره اخبارها ايه معاك
    يا رب تكون بافضل حال
    .......
    مسز محاسن حبة بس تسلم عليك يا ديو كابرى بس والنبى اجدع من دى كابريو واليى يتشددله كمان
    .......
    سلام يا ديو وربنا يوفقك

    ردحذف
  11. كلامك جميل أوى ويا ريت يكون رأيك كده فعلا فى المخدرات ورأى كل الناس فيها انها مؤذية بنت مؤذية
    حرام عليهم بأة
    وحرام عليك انته كمان انك مش سايب الناس تاكل عيش
    متعرفش ان المخدرات دي فاتحة بيوت ناس كتير هههههههههه
    شكرا علي البوست الرائع ده

    ردحذف
  12. ههههههههههههههه
    والله انا ماقادرة امسك نفسى..
    هههههههههههههه
    دمك خفيف اووى
    وكل كلامك صح مية مية..
    ولية رجعة عشان اعلقلك تعليق مية مية..

    ردحذف
  13. من اجل مصر
    شارك في الحملة الشعبية للقيد بالجداول الانتخابية وادعو غيرك
    ضع بنر الحملة علي مدونتك
    البنر موجود علي مدونتي
    اذا كنت ترغب في وضعه علي مدونتك ارسل ميلك كي ارسل لك كود البنر
    ارجو المعذرة للدخول بلا مقدمات لأني ادخل علي مئات المدونات يوميا

    ردحذف
  14. ههههههههههههههههههههههه
    بجد بجد تسلم ايدك ادرت فعلا تخرجنى من حالة الاكتئاب اللى كنت فيها لدرجة انى مش قادره امسك نفسى من الضحك تسلم ايدك
    ولى عوده ولكن بعد ان اهدا

    ردحذف
  15. ديو كل عيد وانتا بالف خير وسلام
    واسرتك واهلك وكل من تحب
    بكل خير وسلام

    ردحذف
  16. اسلام كل سنه وانت طيب
    مدونتك تحفه فى الجمال والله نادر قوى لما بتشدنى مدونه اقرى بوستاتها كلها
    بس بجد دمها خفيف
    وتعرف حلو اوى فكرة احترم نفسك واحترمى نفسك
    عشان الواحد اليومين دول بقا بيشوف بلاوى من الطرفين
    مش البنت بس لما بتلبس مش حشم بتبقى مش كويسه الراجل برضه او الشاب الى بيلبس ساقط ويقلد الغرب تقليد اعمى اكيد بتنزلوا الجامعه وتشوفوا العاملين شعرهم كنيش والى عاملك 50 سنت والى ماشى يقولك كول كول
    والله انا نفسى شعب مصر يرجع زى زمان فى حفظ شكله كرجال فعلا محترمين ونساء محترمات
    لكن زى مابيقولولى لما بقولهم راحوا فين الرجاله : ( ماتوا فى 73) ربنا يرحمهم
    ربنا يعوض علينا

    انا سعيده بوجودى فى مدونتك اللذيذه

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم