الاثنين، فبراير 23، 2009

يالهوى؟ دا كله ومش عايزة تصحى؟

عارف؟؟ ..لما يكون الكل باصص لك ، ومتربص لك ، وعمال يشوفك بتعمل ايه هنا وهناك ، وعايزك تمشى على مزاجه...والمشكلة بتكون انتا مش واخد بالك ، ولما متعملش حاجة انتا مش عايزها يحاول يقفل عليك الابواب ، هو دا اللى حصل فى الحسين ، واللى هيحصل بكرة ، واللى هيحصل بعده...الخ ، شعبنا شعب كره نفسة من كتر ما حاجات كتير كرهته ، شعبنا نسى الوطنية من كتر ما مصر نسيته ، كله بقى نايم فى العسل ، كله بقى بينفض لكله ، كله بقى عايش بيقول يارب نفسى ، هههه داكله بيحصلنا ومش عايزيننا واحنا نايمين نسمع ان فى قنبلة وقعت علينا ،...طبعاً انت حاسس انها مجرد شكة دبوس ، وبرضة محصلش عليها دوشة زى انفجارات كتير ..، شــكة دبوس لا راحت ولا جت ..، ايه يعنى نضرب السياحة؟؟ هو احنا اكلين منها ؟؟ شاربين منها ؟؟ ...ايه يعنى لما الناس تموت ؟؟ على الاقل يا اخى ينقصوا واحد مهى البلد مش ناقصة اكتر من كدة، اكيد الكلام دا كله من تفكير عقيم وجاهل وتحت ايد ناس لا تعلم الرحمة وعايزة تخرب بلادنا لحد ما كلنا كدة نكون تحت التراب ، عايزين يخربوها علينا اكتر ما هى خربانة اكتر ...والمشكلة ان الناس هههه ولا فى الدماغ..ولله شكة دبوس ، ودا كله ومش عايزين نصحا ، دا المنبه من كتر ما هو مزعج بنرميه من الشباك ..، تخيل بقى قنبلة هى اللى رمتنا لسابع ارض ، دا كله ومش عايزين نصحى ، وتقريباً كدة ولا هنصحى .

اما بقى من ناحية تانية فالقنبلة بقى كانت منشنة صح ، وراحت هووووووووووووب شايلة واحدة فرنسية ، واحنا علاقاتنا مع فرنسا الحمدلله تمام ، مش عارف بقى دلوقتى ايه اللى هيحصل ..؟ ، عموماً مش هنفكر بقى فى اللى هيحصل ، اهو اللى حصل حصل ، انا هضحككم بقى فى الموضوع دا على حاجات كتير اوى ، فاكرين ساعة ما القطر اتحرق بسبرتاية شاى؟ ، بعد الموضوع بقى جابوا خبراء وقالوا ان دى غلطة واللى يقول دا "كان" لازم قبليها يجيب سبرتاية امنه من خروج الجاز منها ، ويحكى قصص شبيه بالقصة ، ويجيبوا بعد كدة خبراء فى سبرتيات الجاز لتحليل الموقف ، وخبراء فى القطرة لتحليل الموقف ، ويجيبولك رسومات دقيقة للى حدث ، وبعديها بشوية يطلعلك واحد ويقول انا عملت اختراع وهو سبرتاية شاى مبتربش جاز ، واللى يقولك انا عملت قطار بيتحرك بأشعة الشمس ، واللى يقولك انا عملت كراسى غير قابلة للحريق.


دلوقتى بقى اكيد هيجيبوا خبراء فى المتفجرات علشان يقعدو يعملوا حكاوى وقهاوى ، وخبراء فى الاذى علشان يحكو برضة ، ويجيبو شوية شهود عيان علشان يقعدو يقولوا احنا عملنا تغطية اعلامية ، وبعديها بكام يوم يجيبوا رسومات تحليلية للموقف، وبعديها بكام يوم يوجعوا دماغنا تانى ويجيبوا واحد اخترع قنبلة مزيلة للدموع ، او قنبلة مانعة للأنفجار .. يمكن اصل احنا شعب بنحب الكلام ، وبعديها ننسى القصة
والــــكـــلام مــــات
وهــاكــذا كل مرة
جميع الحقوق محفوظة لمدونة اصحى يا مصر

هناك 51 تعليقًا:

  1. والله عندك حق جدا جدا
    احنا فعلا شعب بيعشق الرغى ووجع الدماغ ويا ريت بفايدة

    وبجد الواحد بقى مش عارف هنوصل لحد فين
    عمالين نكبر فى دماغنا لحد ما دماغنا هى اللى هتنفجر

    وبعدين يا عم لما كل دولة تزعل على اللى ماتو منها وتبدء تحقق
    تفتكر هيكون الرد اية
    المقصود بيهم السياح ابدا
    هيقولك ياعم احنا كنا قاصدين القهوجى
    مهو غلبان ومافيش حد يسأل ولا يزعل علية

    احنا كدة وهنفضل كدة
    شعب فقير مع اننا المفروض اغناهم
    شعب رخيص مع اننا برضو اغلاهم

    بجد مغلولة
    تحياتى

    ردحذف
  2. فكرتنى فيلم قديم الفتوه
    لما قال ممدوح عبد العليم
    غطينى و صوتى عليا

    ممكن الموضوع مجرد فرقعه إعلانيه مش أكثر و ممكن مصيبه واقعه علينا بجد وممكن .....

    معلش بقى أسيبك علشان عايز أنام هههههههههههههه

    ردحذف
  3. هههههههههههههههه
    ايه الابداع ده ياعم المبدع والله فنان بجد وكلامك كله صح بس اكتر حاجة عجبتني وهحاول اساعدهم في اختراعها هيا القنبلة الضد الانفجار
    هههههههههههههههههه
    حقيقي الدنيا دي عجايب
    تقبلي خالص تحياتي

    ردحذف
  4. معاك حق في اللي قولته بس بردوا الشعب ميقدرش يصحى طول ما فيه حكومة زي اللي عندنا
    انا في رأيي ان الشعب علشان يعمل حاجه لازم يلتف حول قائد رأي يوجهه وفي نفس الوقت يدعموه واكيد انت شايف الحكومة عندنا بتعمل ايه لما يكون في واحد معظم الناس بتحبه وليه سياسة مختلفة عن سياستهم

    تقبل مروري

    ردحذف
  5. لا تعليق سوى الرثاء الحار على مصر وشكراااا

    ردحذف
  6. المشكله بصراحه فى تصريحات المسؤلين

    الواحد بيسمع كلام ينقط يا جدعان انا امبارح قفلت التلفزيون

    وقلتلهم الله يخرب بيت كده اياكش تولع طول ما انتم ماسكينها يا جدع

    يعنى نفهمهم ا زاي اننا بنفهم ؟؟؟

    واننا مش اغبيا ؟؟؟


    حاجه بقت تقرررررررررررررررف

    ردحذف
  7. تعرف أصلا إلى عملوا كده هبل
    وومش عارف اقصدهم ايه من ده
    يلا ربنا يستر بقى ومصر تصحى
    دمت بكل الود

    ردحذف
  8. هقولك حاجة انا واحدة من الناس لبقيت فارقة معايا مصر ولا غيرها كفاية حرقة دم بئا كل يوم كل ساعة كل ثانية منتظرين ايه من شعب انفجر من الحقد والكره والظلم

    ردحذف
  9. بجد بجد المدونه حلوه جداااااا

    الى الفيفوريت

    شكل المدةونه والاعلانات والنتنسيق هاااااااايل

    والمواضيع معقوله

    لسه مش قريتها كلها بس احاول

    تحياتى

    ردحذف
  10. نبتدى بأول تعليق
    gogo!sf اشكرك على التعليق الجميل دا وعايز اقولك انك بلاش تضايقى احنا كلنا نايمين فى العسل

    ردحذف
  11. ابنى اسلام احاسيسك صادقه نابعه من انسان غيور على بلده وحزين على ما وصلت اليه من حال لا يسر عدو ولا حبيب ولكن ارجع واقول لك اطمئن لانه لا يصح الا الصحيح سياتى يوما ويفضح التاريخ كل ما نراه الان علينا بالصبر والدعاء والاخذ بالاسباب المتاحه لنا والنتائج على الله جزاكم الله خيرا ويشرفنى ان تقول لى ماما لان ابنى الكبير اسمه اسلام ايضا والله انا اشعر ان كل الشباب الذى يزور مدونتى ابنائى دمتم جميعا فى خير وسعاده

    ردحذف
  12. ازيك يا اسلام .. تحياتى
    دا انت مش رسام بالفرشاه بس
    دا انت كمان بترسم بالكلمات
    ايه يا عم الكلام المفشكل اللى فكشلنى انا شخصيا ولو ان انا فشكول
    قال انا جيت ابيع الميه فى حارة السقايين
    ولا مصر حتصحى يا اسلام ... مصر نايمه فى سابع نومه ... ولو ادنت على المدنه مش حاصحى الا لما الكابوس اللى جاسم على صدرها ده ربنا يشوف له حل
    تحياتى يا رسام بالكلمات والفرشاه

    ردحذف
  13. السلام عليكم / ربنا يصلح الحال يارب ، نعم الوضع عند الأزهر والحسين مسىء عندما ذهبت زياره إلى هناك مره كنت مستاءه ومتقززه من الوضع ولم أكن أشعر أنى بحضرة مساجد
    وذلك بسبب الكافيهات المحيطه من كل جانب وحتى على أبواب المساجد وطبعاً الدخان والسياح
    ولكن ليس ذنبهم وليس معنى ذلك قتلهم فهم جاءوا مسالمين آمنين وما حدث لا يعرفه شرع أو دين ،
    وأعتقد السبب المرض النفسى والإحباط والكبت المصاب به بعض الشباب الضائع فى بلدنا للأسف ،
    بلاش نقول يا لهوى نقول يارب يمكن تصحى تحياتى أخى إسلام .

    ردحذف
  14. السلام عليكم

    بجد كلامك سليم


    احنا صاحين مش نايمين

    بس عاملين مش وخدين بالنا او بالاصح منفضين مدام النار بعيدة عن بيتى

    استغطى وانام براحتى

    اما للخبراء دول مش ليهم ظهور الا عند الحوادث والمصايب اللى بتحصل فى البلد وياريت بعد كدة يكون التخطيط مظبوط والتصحيح حصل

    ولكن كما نقول يبقى الوضع على ما هو علية

    الخبراء والكشف والصيانة المفروض دة حاجات بتعمل من غير حوداث كشف مستمر مع رقابة

    لكن مفيش ضمير

    ربنا يصلح الحال

    نورت مدونتى

    واتمنى مزيد من التواصل

    ربنا يكرمك

    تحياتى

    ردحذف
  15. بجد مدونتك رائعة وجميلة جداً ودى اول مرة ادخل واكيد مش اخر مرة .
    بجد نورت كوكب تانى .ز وانا سعيدة بالتواصل .

    تحياتى ،،

    نفرتارى

    ردحذف
  16. السلام عليكم
    أزيك يا فنان عامل إيه؟
    والله أنا شايف إن اللى عملوا كدة بيضروا بالإسلام والمسلمين أما عن الوضع الحالى فأنا من رأييى إن إحنا هنستمر كدة محلك سر لفترة ..... لماذا لأنه لايوجد نخبة تقود هذا الشعب فكل النخب الموجودة الآن النظام محتويها كما أن مجتمعنا منقسم على نفسه
    ولا إيه رأيك يافنان
    تحياتى

    ردحذف
  17. السلام عليكم ورحمة الله وبركاته
    الشعب مش نايم هو مغيب ومحطوط له منوم
    شربوه الزجاجة كلها وكل مايحاول يفيق يشربوه من تانى مش عايزينوا يفيق

    اما موضوع القنبلة على مايبدو المقصود احراج النظام قبل مايسافر لامريكا عشان يكون مهزوز والله اعلم


    احيى اسلوبك المتميز

    ردحذف
  18. معاك حق واللهي
    حاجه تنرفز بشكل غريب
    وياريت حد هيفوق بعد كلامك ده
    لكن لا حياة لمن تنادي
    احنا بندن في مالطه

    تحياتي

    ردحذف
  19. نصحا ليه بس
    ايه القلق ده خلينا نايمن احسن عشان منحسش بلهبل اللى بيحصل
    بجد المدونة عجبتنى جدااا
    وفورا هضيفها عندى

    ردحذف
  20. بسم الله الرحمن الرحيم
    الفنان..اسلام..السلام عليكم ورحمه الله وبركاته.
    انا صحيت علي صوتك ...بس معلهش راح انام تاني لاني تعبت من كتر النوم ولازم اريح شويه .
    مدونتك رائعه وممتعه ومفيده ...
    كلامك كله سليم وتحليلك جيد جدا
    اشكرك علي زيارتك
    وياريت تستمر فيالزياره
    سلام عليكم

    ردحذف
  21. السلام عليكم و رحمة الله و بركاته

    والله احنا بقينا فى مصايب كتير


    هقول انا لله و انا اليه راجعون

    تحياتى

    ردحذف
  22. اول رد على تعليقاتكم احب اقول ليكم جميعاً اهلاً بيكم وشرفتونى بمدونتى الصغيرة وبيتى على الانترنت وبجد شرفتونى اوى واهلا بيكم جميعاً

    ردحذف
  23. تعليق على رد اعشق الليل فى ضوء القمر

    على ما اعتقد الاتنين (فرقعة اعلانية ومصيبة ايضاً)

    ردحذف
  24. اختى العزيزة fnoonh اشكرك على كلامك الجميل وبجد انا مش دا كلة ، انا مجرد شخص خايف على بلدى بجد اكتر ما انى خايف على نفسى

    واشكرك على تعليقك الجميل

    ردحذف
  25. صديقتى العزيزة green eyes
    احب اقولك ان الحكومة اساساً نايمة
    واشكرك على زيارتك ومرحباً بيكى فى اصحى يا مصر

    ردحذف
  26. اشكرك اختى بسمة مسلم على رأيك الجميل

    انتى بتجيبى على طول يا بسمة من الأخر ههههه

    ردحذف
  27. صــــبــــرنـى يا رب عودة حميدة لمدونتى ولله وحشنى تعليقاتك الجميلة

    اولاً احب اقولك ان احنا زى ما بنفتقد روح الصحيان ، بنفتقد روح المسؤلية
    ولذلك يمكن استبعاد كلمة "مسئولين"

    ردحذف
  28. صديقى العزيز mohamed ghalia
    اشراقتك على مدونتى كفاية ، وتبين انك شخص جميل جداً وحتى فى ردودك

    ردحذف
  29. هههههههه ولله فعلاً عندك حق يا ايوشة

    ردحذف
  30. اشكرك غروب على تعليقك الجميل على مدونتى ، اينعم هى مدونة واثقة من نفسها ، بس كدة هتزيديها ثقة ويارب اكون تحت ظنكم

    ردحذف
  31. أمى بستان الحب ، إن الفساد وباء ، وإن الوباء مرض لا ينتهى ، إلا بصفاء روحنا والنية ايضاً

    اشكرك على منحى هذا الوسام الذى سأحتفظ به ما طال بيا الامد الذى بيد الخالق على التدوين

    ردحذف
  32. مستر فشكوووول اشكرك على كلماتك الرائعة
    ودخولك المدونة كفاية
    اهلاً بوالدى العزيز فى مدونتى وارحب بك كل يوم وفى كل بوست
    المدونة نورت يا استاذى الفاضل

    ردحذف
  33. اختاه حياتى نغم
    ولله انا عايز اقولك انى مستاء اكتر منك
    ومن ناحية يالهوى فدا لفظ مصرى يعب عن الحيرة والألم
    ومن اقوى الالفاظ واحسها

    ردحذف
  34. استاذ تامر نبيل تقبل تحياتى واهلاً بك فى اصحى يا مصر
    وعلى فكرة احنا نايمين وهقولك ليه بس فى بوست قريب انشاء الله
    اما من ناحية الخبارء فزى منتا عارف ان الوضع هنا زى منتا عارف يعنى مصيبة تحصل وبعد كدة يجيلك واحد يقولك فى الاذاعة والتلفزيون ويولك انا عملت وعملت وووو للأخر
    ودا كلة اساساً كلام فى الاحلام
    وترجع ليمة لعادتها القديمة
    كللللللله كلام فارغ

    ردحذف
  35. اشكرك اختى نفرتارى على كلامك الطيب والجميل
    وشرفتى مدونة اصحى يا مصر
    بجد ولله المدونة نورت
    وانا سعيد بالتواصل

    ردحذف
  36. صديقى صاحب مدونة اللؤلؤة
    لقب فنان اهديه اليك اولاً لأنك من اصحاب اكبر المدونات التاريخية والمفضلة لدى

    اشكرك على تعليقك الجميل

    ردحذف
  37. انتا بتصحيها ليه سيبها نايمه بكره تصحى براحتها

    ديو ازيك يا فنان

    موضوع القنبله ده يرعب ومرعب واليى مخوفنى منه اكتر ليطلع تانى موضوع الجمعات اياها بتاعة التكفير دى

    ربنا يستر

    ردحذف
  38. استاذى الفاضل ...محمد الجرايحى
    عساك ان تكون بخير

    ولله نحن دائمين النوم

    ردحذف
  39. السلام عليكم ورحمة الله وبركاته

    احنا مش هنصحى خالص لان حكومتنا نفسها مش صاحيه
    احنا فعلا يالمصريين منحبش غير الكلام
    وبس
    واحلى مافي الموضوع قنبلة مانعة للانفجار
    ههههههههههههه
    بجد عجبتني

    البوست جميل وطريقة طرحك ليه حلوة
    ~~~~~~~~~~~~~~~~
    دمت ودام قلمك المبدع
    تحيتي لك..

    ردحذف
  40. اخى مذكرات مشاغب اهلاً على زيارتك مدونتى الخفيفة واتمنى ان تكون دائماً وابداً معنا

    ردحذف
  41. البنت المشمشية اولاً احب اقولك ان مدونتك اكثر من رائعة وانا فرحان انتى اتعرفت عليكى بصراحة
    واطمنى مدونتك محفوظة فى بلوج ليستنا

    ردحذف
  42. استاذى رئيس التحرير
    اسعدنى زيارتك الجميلة واتمنى الدوام
    ونورت المدونة الصغيرة بتاعتى
    ومتقلقش هنجمع ونشترى منبه علشان نصحا كلنا

    ردحذف
  43. استاذة الفاضلة والاخت الفاضلة زينب
    احنا مش بقينا فى مصايب احنا اساساً فى مصايب
    ويااااااااماااا هنشووووف

    ردحذف
  44. مسسسسسسسز محاسن
    انا مش مصدق نفسى
    انا هروح على مدونتك دلوقتى بجد
    وحشتينا بجد ومتخضيناش عليكى تانى
    تقبلى تحياتى

    ردحذف
  45. اختى العزيزة shosho
    اشكرك على تعليقك الجميل
    وبجد الكلام دا ادانى روح معنوية كبيرة

    ولنتواصل بإذن الله تعالى

    ردحذف
  46. بسم الله الرحمن الرحيم
    السلام عليكم ورحمة الله وبركاته
    صديقى العزيز اسلام
    تحياتى
    بوست جميل وبيتكلم بكل واقعيه عن مصيبتنا الكبيرة
    بس ياعم هو انت عاوز تصحيها وفيها ناس بتقولك ياعم الدنيا برد والدفا عفا والكسل احلى من العسل !!!!!!!
    ماينفعش
    لما نبطل كسل وييجى علينا الربيع ابقى حاول تصحيها يمكن تصحى
    وبعدين انا اول موضوع شوفته عندك كان بتاع التغيير اهو لما يحصل بقى التغيير ده (اللى هو احنا عاوزين نغيره بس مش عارفين نغيره علشان هما مش راضيين اننا نغيره وعلشان كده احنا مش هنقدر نغيره)اهو لما يحصل التغيير ده نبقى نصحيها وتقوم وتغسل وشها كده وتفرفش وتبقى زى الفل
    تحياتى ياصديقى ودمت بكل خير وود
    والسلام عليكم ورحمة الله وبركاته

    ردحذف
  47. اصل احنا شعب بنحب الكلام ، وبعديها ننسى القصة
    والــــكـــلام مــــات
    وهــاكــذا كل مرة


    بالضبط كده والله
    دى فعلا الخلاصة
    ربنا يصلح الحال الواحد تعب من كله والله

    خالص تحيتى
    سالى

    ردحذف
  48. ازيك ياديو
    والله مدونتك كانت تايهه منى بس انا ضفتها لمفضلتى خلاص
    ياترى لسه فاكرنى ؟

    على فكره انا مليت من الكلام فى اموضوع السياحه والقنابل ده

    اصل المصايب كترت اوى

    المهم اخباراتك ايه؟

    ردحذف
  49. مشكلة الشعب المصرى انه بااااااااايع القضية
    تقولهم يا جماعة فى انفجار
    يا جماعة اسرائيل بتعمل كذا
    يا جماعة .....يا جماعة
    يقولولك مايتحرقوا-سورى فى اللفظ-هو احنا لاقيين لقمة العيش
    احنا مالنا بمصر هيا كانت بلدنا دى بلد الناس التانية
    بجد حاجة تحزن و تتعب
    الناس بقى همها الاول و الاخير نقدر نقول الاوحد
    لقمة العيش
    نسيو كل حاجة فى سبيلها
    و ع فكرة انا متاكدة ان فى ناس و لا حسو بحاجة
    بس اكتر حاجة بجد نرفزتنى جداااااا
    شيخ الازهر
    طالع يبرئ الاسلام و يقول الاسلام يدين و يشجب
    مين اصلا يجرؤ يقول حاجة عن الاسلام
    بجد احنا حرام علينا و الله احنا اللى بندين نفسنا
    بناكد علينا كلام الناس التانية و نرجع نقول ايه ده دول ناس ظلامين
    صحى النووووووووووم

    جميلة اووووووووى المدونة بجد
    باذن الله هبقى دايمة فيها خاصة انها سياسية

    ردحذف
  50. اسلام باشا واحشنا يا راجل
    فينك احنا قلنا نيجى نطل عليك طالما انت بتتقل علينا
    على فكره
    احنا حطينا الصوره اللى انت رسمتها فى صدر المدونه
    وطبعا احنا مش محتاجين استأذان لانك عضو فى المدونه
    ملحوظه
    البوست اللى انت كاتبه فى الدرافت عملنا له ارسال وجدوله ومرتين الصوره تضيع
    بجد مش عارف فين المشكله
    عموما احنا فى انتظار الجديد

    عبده الرايق

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم