ساعات بحس

للأسف مقدرتش ابعد عنكم لأنكم بجد وحشتونى وبشكركم اوى على تعليقاتكم على الرواية اللى انا كتبتها ، وحبيت اقولكم ان النهاية المؤلمة جت لأن الموقف صعب ، ثانياً مينفعش ان احنا نشيل الروح من الجسد ، ولو حصل والروح انفصلت عن الجسد بتموت ..وهو دا معتقد القصة ، علياء الروح ، وعلى هو الجسد ، ثانياً القصة من وحى خيالى وبإذن الله هتنزلكم فى كتاب الكترونى ومرسومة لأن متهيألى لما تكون مرسومة هتكون افضل ، ومش بس القصة دى ، لا دا قصص كتير هنحكيها وانتظروا بإذن الله عن قريب .
طبعاً انا حاولت انى اجيبلكم بوست جديد ، لفت نظرى موضوع مهم اوى وهو الغباء .. ، يعنى ايه غباء ؟ وهو الغباء ليه اشخاص معينيين؟؟ ، طيب الحكاية بكل بساطة ان مع مرور الزمن تحول مصطلح مرض الغباء بأن يكون اسلوب تنقيصي ووصف جزء من تصرفات اخطاء بعض الناس وفي الغالب تكون رد فعل الشخص غير حميده لانه ليس بمريض , وكما يلي بعض من هذه الصفات .
ساعات برضة بيكون الذكى دا شخص غبى بس لما يطلع عن اساليب معتقداته ، يعنى الغباء مش ناس معينه ممكن تقول كدة قلة تركيز برد فعلنا بنفتكر ان دا غباء ، ومعنى الغباء فهو ليس بمرض ، ناس كتير فاكرة ان الغبى دا شخص ودانه طويله وعنده سنتين بارزين بما نسميه (ضب) ، بمعنى او بأخر بنشبه بحاجات كدة ، بس بصراحة طلع ان المعتقد دا خاطئ من الدرجة الأولى ، يأما فى ساعات بيكون المعتقد دا صح ، لأن الغباء هو نقص فى التفكير ولكن مش مرض .
طيب النظرية التانية وهى رد الفعل اللى ساعات بتكون قوية
لما الواحد بيوصل لأقصى درجات الغباء ، بيكون غبى فحت يعنى ، بيكون اسمه باللغة العربية "الابله" ، وهى المرتبة الثانية بعد التخلف العقلى ، ودا يعنى مش عايز اقولكم لو قعدت تكلم فيه لحد الصبح ولا هيسمع ، ولو حتى قولتله على افعال ممكن يعمل عكسها وبغير عمد ، ولو حتى مديت ايدك عليه ممكن يستلذ الضرب ، وفى الحالة دى مش هيبقى قدامك غير رد فعل ، وهو ان اللى قدامك تزقله عليه ولا تتردد ولكن خلى اسلوبك برضة كويس معاه ، لكن لو واحد بقى "بيستغبى" عليك اهو دا بقى بأكبر حاجة وفى وشه ، دا لو انت معندكش صبر ، وممكن يعمل فيك حركة غللسسسة اوى ويكون ردة جميل اوى : انا اسف ، بس هما كلمتين لو انتا انسان صبور هتاخدهم وتقول انا هاجى على نفسى ولكن لو انت انسان نرفزاوى مش هتقدر وبأى حاجة هتروح هابدة بيها ، بس يا جماعة ولله الناس دى فى منهم الضعاف اوى والواحد بيضعف قصادهم ، اما فى ناس انا هحكيلكم عليهم فى الحوار اللى دار دا ، بجد ناس غريبة اخر حاجة ، عاملة نفسها بتفهم وهما ولا هنا ، بجد نا غريبة اخر حاجة ، والمشكلة ان انتا لو فهمتهم ولا هيصدقوا ..طب تعمل معاهم ايه؟؟ .
فى يوم كنت قاعد مع صديقى فى محل موبايلات ، دخل علينا شخص وقال : هى الديمعة دى بكام ؟؟ يقصد يعنى جهاز نوكيا (7610) ، فرد صديقى وقاله معلش قول تانى ، فقاله الديمعة دى بكااام؟؟ ، والمشكلة انه قالهالة بزعيق ، رد صديقى كنوع من الهزار : الديمعة دى من غير ملح ... بصلى وانا بصراحة مقدرتش امسك نفسى فضحكت ، المهم واصل الشخص دا فى كلامة وسأله سؤال تانى : طب هى عادة ولا نيوزك ، فضحك صديقى ضحكة كانت عالية اوى وقالة : هو ايه دى اللى عادة ولانيوزك ، (هو كان يقصد يعنى عادة ولا ميوزك) المهم قاله : لا دى ولا دى ، استمر الشخص فى كلامة وسأله سؤاله الاخير : طب هى فيلهندى ولا هانجرى ..، رد صديقى بنرفزة : ياعم الحج ، هانجرى نروح فين بس ، الجهاز دا جهاز عادى ، ولله جهاز موبايل ، هيكون ايه يعنى ؟؟، المهم اخينا مشى وجه واحد بعديه على طول وقال لصديقى : انا عايز كارت موبايل ، فستأذن منى صديقى ودخل على درج الكروت ، فقاله اجيبلك كارت ايه ؟؟ ، التانى افتكر ان صديقى بيتريق عليه فزعقلة ومسكوا فى بعض وانا عمال اضحك واضحححححك ، ولله ما كنت قادر امسك نفسى من الضحك ، تانى يوم بقى اللى كان حكاية ، وجه واحد لابس اعلى موضة ، وداخل بقى ومعاه كارت Memory ، وقال : بص يا سيدى انا عايز "أفنط" قصده("افرمط") كارت الذاكرى دى وعايزي نعمله تهيئة وننزلة مالتى فايرس علشان انتا عارف احنا فى الشتا والفايروسات طايرة ، صديقى بصلى بصة ، وانا بصيتله ، حبست الضحكة جوايا وسبته ومشيت..
مش عارف بجد هنصحى امتى
إسلام ديو