الاثنين، مارس 29، 2010

كرومبو السفاح

لن نخجل بأن نقول أن هذا النوع من الفكاهات ، يصبح الأن وسيلة قوية لتبادل" الخوازيق" بين اصحاب وسائل الاعلام المختلفة ، ومش كدا وبس ، دول كانوا عايزين يرفعوا على كرومبو قضية واحالته للنائب العام وتقديم شكوى ضده امام مجلس الشعب .
لاتتعقد سيدى ، محنا عالم فاضية ، مش لاقيين حاجة نعملها فقولنا بالمرة نتريق على نفسنا ، او على الاقل نقول للعالم ان احنا ناس ملناش غير فى الخناق وبس .
اليوم السابع - جريدة محترمة - مع انى بشوف يومياً مقالات بحس انها تثير الفتنة الطائفية ، وساعات بحس انها بتنشر حاجات غريبة كدا ، المهم انها نشرت فى يوم خبر قتل مهدى عويس صاحب قنوات بانوراما دراما مواطن ، ولما حاول الاستاذ مجدى تكديب الخبر حول الحوار من مفتوح اعلامياً ، لمناقشة على طاولة كرومبو ، والتريقة على الجرايد بطريقته الخاصة .
دخل المفتش كرومبو جريدة "اليوم السائع" ، علشان يعرف مين اللى كتب الخبر الكاذب دا ، ويتوالى الامر بتريقة واضحة عن العاملين بالجريدة ، زى رئيس التحرير خالد صلاح بخالد فلافل ..، ودا مش كويس ف حقنا قدام العالم لما يبص ويشوف الاعلام المصرى بيتعامل مع نفسه ازاى ؟
حاول مسئولى الجريدة تقديم الأمر للنائب العام ، ولم يلبث وان نشرت الجريدة فى اليوم التالى تفيد بإحالة مهدى عويس للجنايات

ولله احناعالم فاضية الحلقة



جميع الحقوق محفوظة لمدونة اصحى يا مصر

الخميس، مارس 25، 2010

مجرد..شخصيات

جمعتلكم شوية شخصيات رسمتها ، وعملتلهم البوم ع الفيس بوك وقولت للناس انت نفسك تقولهم ايه ؟؟
وبصراحة ياجماعة قولت اعمل البوست هنا علشان الكل يشوف هنقول للناس دى ايه بالصلا ع النبى
نبتدى بأول واحد كدة
الريس جمال عبد الناصر


كان كل حلمة انه يعمل حاجة اسمها قومية عربية ... او زى محنا بنقولها كدا كان نفسه يعمل اتحاد الدول العربية ..، بس لامؤخذة بقى اللى ايده فى الزجاج مش زى اللى ايده ف الجير ، الغرب سموه هتلر العرب لأنه كان صارم فى احكامه وكان بيغيظهم كتير ودا اللى عجبنى ف شخصيته الحقيقة ، وكان يملك "خفية" فى فقع "الخوازيق" من العيار الثقيل فى تشرشل واعوانه ..، اه مهو صعيدى بقى والصعيدى ما يهموش يابوى.

صاحب الثورة ، او كما اسميها انا الإنقلاب العسكرى ضد الحكم الملكى فى مصر ، لأننا هنفضل طول عمرنا بنخاف نعمل ثورات اصلاً ، بس هو اللى قال للظلم لاء ، وقدر يقف قدامه .
بدأ يفكر فعلاً انه يعمل اتحاد الدول العربية وبدأ فى اتحاد مصر مع سوريا تحت مسمى الجمهورية العربية المتحدة ، ..ولانه ثورجى ، فراحت قايمة عليه اسرائيل وفرنسا وانجلترا وفشكلوا الاتحاد دا ، علشان ينتهى معاه اخر اتحاد كان للعرب اصلاً .
نفسى اقوله : نحتاج لواحد راجل زيك الايام دى
الشخصية التانية اللى معانا هى شخصية مؤثرة برضة ، وبحبها اوى ، عن مغنى غنى احلى الاساطير اللحنية والشعرية فى زمن الفن السابع
عبد الحليم حافظ





للأسف احنا كدا..نقعد نتريق ع الواحد وبعد ما يموت نبكى الدموع دم، عبد الحليم حافظ كان اسطورة من اساطير الغناء العربى واللى بجد الناس بدأت تشهد له غير بعد ما مات ... طب ياجدعان مهو كان قدامكم حى بيرزق !!! .

هههههههه كل لما اقعد افتكر الفتيات الموهومون بتامر بيك ، اقول ولله هو دا فعلاً التطور الطبيعى للحاجة السئعة .
نفسى اقوله : عمرك ما هتتنسى !
نيجى لتالت شخصية واهم شخصية هنا .. وهو محمد انور السادات
رجل الحرب والسلام ، هكذا لُفب ، راجل قلبة قلب اسد ، مش زى واحد قلبه قلب خصاية هههه..، وعادتاً علشان لما اقولكم حاجة تصدقوها ان احنا شعب مش وش نعمة ، الراجل دا كان جايب معاه الخير علينا لكن للأسف قتلته الحكومة الأمريكية تحت غطاء الجماعة الإسلامية وسيظل مقتله لغزاً محيراً ، مع انه هو الوحيد اللى قدر يقف قدام إسرائيل !!!!
نفسى اقوله : افتقدناك

نيجى لرابع شخصية ماعانا هنا... وو.........
لا تـــــــعــــــــلـــــيــق

نفسى اقوله : حـــســبى الله ونعم الوكيل

لكم تحياتى

جميع الحقوق محفوظة لمدونة اصحى يا مصر

الجمعة، مارس 19، 2010

ميتال مصر ..احدث المدونات المصرية



ميتال مصر ، هكذا يكون اسم المدونة الجديد الذى اعتمد صاحبها "احمد التوبجى" على انت تظهر بذلك المظهر المعروف عالمياً عن موسيقى الميتال ، .. مؤكداً ان هذه الموسيقى لم تعزف لهؤلاء مثل عبدة الشيطان وغيرهم ، ولكنه فن راقى مثل اى فن من الفون الراقية الاخرى التى تعودنا على سماعاها والاستماع اليها دائماً .


ميتال مصر بيحكى فيها احمد عن الميتال ، واهداف الموسيقى ، وايه الفرق اللى بتتخصص فى فن الميتال ، وعلاقته بالمصريين هنا فى مصر ، دا غير دم احمد الخفيف واللى هيضحكنا معاه اكيد مع مدونته الجديدة واتمناله كل التوفيق


جميع الحقوق محفوظة لمدونة اصحى يا مصر

الأربعاء، مارس 17، 2010

استكمال دستور جمهوريتى


بعد المداولة والمشاورة .. ونص بعض قوانين الدستور ادناها ، قررنا نحن المؤسسة العامة لرئاسة الجمهورية الأتى :
المادة (11) : العين عمرها متطلع على الحاجب
المادة (12) : ياما جاب الغراب لمه
المادة (13) : المواطن اللذى يقع بحرامى ف الشارع ، يصرف له 2 جنيه كمساهمة مع الشرطة ، واللى ميقدرش ينحبس يومين
المادة (14) : الشعب والقانون فى خدمة الشرطة
المادة (15) : الشرطة هو جهاز الامن العام ، ويحمى الجبهة الداخلية للدولة ، ويجب ع المواطنين حمايته والاخلاص له ، وتقوم وزارة الداخلية بالأشراف عليه .
المادة (16) : رجل الشرطة او "الظابط" ، ليس بمواطن ، وانما هو "البركة" بتاعت الدولة ..هو الملاك البرئ و خير مواطنين الدولة ، ومن الاشراف والاعراف ، وله التصرف الكامل فى شؤون الدولة ، واللى ينكر ينسحب بطاقته .
المادة (17) : ممنوع التجمع اكثر من شخص فى الاماكن العامة ، وان تجمع اكثر من شخص يحبس الشخصان يومان على ذمة التحقيق مع اتهامها بتكدير الامن العام وتهديد امن وسلامة المواطنين (الطوارئ الجديد) .
المادة (18) : التجمع فقط مقصور على الكابريهات ، والبارات ، وعربات المترو والقطار .
باب : الفيس بوك وما يليه .
المادة (19) : الفيس بوك كيان من الوحدة الوطنية ، لا يتم الاستغناء عنه .
المادة (20) : المواطن اللى من غير استيت ، زى النوم برة البيت .
جارى التعديل على الباب ...
باب : الحريات والمواطنة
المادة(21) : كل مواطن يقبض عليه أو يحبس أو تقيد حريته بأى قيد تجب معاملته بما يرضى الله، يطلع عينه ضرب لحد ما يبانلوا صاحب ، ولو كان غلبان يقصر عليه جلسة كهربا .
المادة (22) : كل بيت وله حرمته ، بس مش مهم ممكن يتفتش لو صدر اصوات مثيرة للشفقة ، او حد بيرقع بالصوت ، ساعتها ترفع ال "حرمة " من عليه .
المادة (23) : لحياة المواطنين الخاصة حرمة يحميها القانون ، ومحدش يفهمنى غلط .. حرمة هنا يعنى خصوصيات مش بنت .
المادة (24) :حرية الرأى مكفولة ، ولكل انسان التعبير عن رأيه ، بس اللة هيعك هيبقى ليلته سودة و بيلعب ف عداد عمره ، والمديح اجبارى فى شخصيات الدولة .
المادة (25) : تكفل الدولة للمواطنين حرية الابداع الثقافى ، والبتنجانى ، والعلمى ، بس كله بيشجع نفسه .

نستكمل الباقى فى القريب العاجل
جميع الحقوق محفوظة لمدونة اصحى يا مصر

الأحد، مارس 14، 2010

جــمــهــوريتى ..العظمــى



ابناء شعبى البار ..
تكملة للبوست السابق ، نستكمل ...
علمنا علم مصر
الاحمر دمنا
الابيض قلبنا
والاسود ابن ال(تييييت) عدونا
اما من ناحية النسر ..
فأكيد خاف ليجيلو روماتيزم فطار
او مثلاً ممكن يكون شاف "نسراية " وراح يخرج معاها
او ممكن تكون رجليه وجعته
المهم احنا مش ف النسر دلوقتى

بس من دلوقتى، نويت اغير علم دولتى ... هيبقى لونين مميزين
الاحمر علشان معدش حد عنده احمر
والاسود مش علشان عدونا ... لا لا لا ... علشان دا بقى اللون الرسمى للأيام
ونظراً لوصولنا تحت خط الفقر .. فرجحت انى احط عين نفرتيتي علشان محدش يحسدنا ، وتحت المقولة الشعبية المعبرة (العين صابتنى ، ورب العرش نجانى) .
احنا ف الدستور .. ومن ناحيتى نويت اغيرلكم الدستور .. ، ودستورى هيتماشى مع كل شخصية ف مصرنا ، علشان هو اللى هياخد باله منكم ..، منا مش فاضى بقى هسمع كل واحد واخد بالى من كل واحد .

اولاً - الـــــدولــــة ..طن طن طاااا
المادة (1) : دولتى دولة ديمقراطية ناصرية اشتراكية شيوعية اسلامية مسيحية يهودية (علشان الكل يبقى مرضى) تقوم على اساس المواطنة ،.
المادة (2) : السيادة "لمجلس الشعب" ، لأنه مصدر "السلاطات" ، ويمارس مجلس الشعب هذه السيادة ويحميها ويصون الوحدة الوطنية على الوجه المبين فى الدستور..(ولا مانع من استقبال الرشاوى )
ثانياً : - مقومـــات المجتمع .. طا طا طن طشششش.
المادة(3) : متأمنش لست ..، غير للحاجة
المادة (4) : خليك عيل حدق ومدقدق
المادة (5) : اللى يضحك عليك اضحك عليه .. اشمعنى هو يعنى؟
المادة (6) : لو الحاج مدكش المصروف اقلب فلوس الدرس
المادة (7) : البنت العانس يصرف لها عريس من احدى جمعيات التضامن الاجتماعى ، والعريس اللى مايوافقش يحاكم بالسجن المشدد
المادة (8) : لو السجن اتملى بالعرسان ..، ودا اللى ممكن يحصل ، ارموهم بالرصاص مهى المبلة مش ناقصة طين
المادة(9) : اللى عايز ياكل العيش ف بيته ، مفيش مخابز ، محنا مش كل شوية هنعمل مشاريع الفصل والدمج ونقلب الدولة وفلوسها
المادة(10) : لو معندكش دم... ممكن تعمله داونلود من على الانترنت

...........هنكمله بقى البوست الجاى وهنراجع باب الفيس بوك والاقتصاد



جميع الحقوق محفوظة لمدونة اصحى يا مصر

السبت، مارس 13، 2010

إنتخبونى .. رئيساً !!

احياناً .. وعندما اكون ذاهباً فى شوارع "الزقازيق" العتيقة ..، ارى جميعهم مفتقدين لل " بسمة" فى وجوههم..
دا لدرجة لو الشارع دا من غير حيطة يروحوا الشارع اللى جمبيه اللى فيه حيطة عشان يمشوا جمبها !!
ترى بعيناك "قطة" نائمة فى وسط الشارع وغارقة فى دمائها ..ضربها سواق عربية تاكس غلس ..، ثم تقوم بالاستغاثة عن احداً يساعدها .. مهى دى برضة روح..، تلقى الرد فوراً : ياعم الحى ابقى م الميت ..وبعدين دى قطة .
"وبعدين دى قطة".. يقولها المواطن ببراءه وكأنها صرصار وانضرب بالشبشب .
ينتابك شعور بالوحدة ..، ليس انت فقط..، بل جميعهم. ..وعندما تسأل بكل صراحة .. هو احنا ليه بقينا كدا يا جماعة ؟؟ يكون الرد : ملناش ف السياسة .
السياسة - تلك الملعون اللى ظهر مرة واحدة دا ، فى اعتقادهم انك عندما تتحدث فيها وان كان مع نفسك فأنت مراقب بالأقمار الصناعية التى تتجسس على احساسك (شغل الأفلام الاكشن دا.. الله يخربيت الافلام الاجنبى) ، ولو طولت ف الكلام ممكن تتاخد ومحدش يشوفك يومين ، وربنا يستر بقى عليك بقى وبكبيرة تكدير الامن العام ، ومش بعيد الاضرار بالأمن القومي ، ومش بعيد الاضرار بممتلكات البلد ..ينهار اسوح ... ومش بعيد انتشار الرعب بين المواطنين !!..
دا كله علشان جربت تتكلم ف السياسة؟؟..
لو طفل : مش كفاية السياسة بتاعت ماما..
لو شاب : ياعم انا بتاع مخدرات ..ستات .. مليش ف الكلام دا..بيس يامان :))
لو متجوز : ياعم انا عندى عيال .. عايز اربيهم .. فكك
لو عجوز : ياعم انا عايز اعيش الباقى من عمرى .. مش ناوى ادخل الكاراكون .
هكذا انجرفت بنا الوطنية ..، والكل بقى وطنى بنفسه.، بداخله وطن يريد ان يحميه من براثين نفسه، ومن براثين الحكومة برضة ، لو جيت بصيت على قفاه هتلاقيه مختوم بختم النسر.. ولو مش مختوم ميبقاش مصرى !!
حاولت يابرادعى انى انتخبك .. وهفضل انتخبك ..، ولونى عارف انتصار الحكومة الحالية لا محالة ..، بسبب الفشل الكلوى وفرقعة المرارة التى يعانى منها الشعب والتى ادت الى شلل تام بسبب الحكومة الحالية ، فقررت قرار .
هنتخب نفسى .. لجمهورية نفسى ..، هسن قوانينها بنفسى ..، هتبقى جمعوريتى انا وبس ..
البوست القادم : جمهوريتى العظمى !!
جميع الحقوق محفوظة لمدونة اصحى يا مصر

الخميس، مارس 11، 2010

لا .. لإغلاق ساقية الصاوى


انتابنى شعور بالحزن والخوف عندما علمت مؤخراً انهم سيغلقون اقوى واجمل وافضل صرح ثقافى ان لم يكن فى مصر فقط.. ففى الشرق الاوسط اجمع .
ساقية عبد المنعم الصاوى هو منبع الثقافة المصرية ، وحاضنة المثقفين العرب والمصريين من شتى انواع الادب .، مكاناً يأخذك الى عالم اخر حيث يجتمع الابداع والفن والادب فى ملحمة واحدة هى .. ساقية الصاوى
اصدر مؤخراً بيان من موقع دار الكتب ودار دون للنشر ودار المصرى للنشر عن جمع توقيعات ضد اغلاق الساقية ..
فأنا اطلب منكم الدخول والتوقيع .. لإنقاذ ما يمكن انقاذه..
جميع الحقوق محفوظة لمدونة اصحى يا مصر

السبت، مارس 06، 2010

عودة طرووق


امشى من وشى...
هكذا قالتها ام احمد فى حده وانفعال ..، وهى "تسك" الباب بشدة فى وجهة ..، وجه ذلك الشاب الوسيم صاحب (السكسوكة) وشعر تيمو زا كنج اوف جنيريشن ، والتى شيرت الاسود عليه كلمة "Im Hot Boy" .

لم تكن ام احمد فى نيتها من الاساس تهزيق ذلك الشاب ..، او حتى ترمى الباب وشه ،.. ولكن من غباءه الشديد وحبه وعشقه المتيم بالنسوان ..ادى الى ذلك ، حيث دار بينه وبين ريهام ابنتها صاحبة الثمانية عشر ربيعاً وخريفاً وصيفاً وشتاءاً وكل حاجة (بأمانة الواد كان عنده حق يبلم اول ما هى فتحتله الباب) ، وهكذا دار الحديث :

تك تك تك..، سسسسززززييييء
ريهام : ايوة ..ميييييين ؟؟
هو : السلام عليـ...ــــ..ـــ...ــ.ـ.
ريهام : وعليكم السلام ..اؤمر.
هو : انا مأمورش ...دانا عبد مأمورك ..دانتى اللى تؤمرى .. يخربيت ام اللى يجى ف يوم ويؤمرك ..(فى سره طبعاً)
ريهام : اؤممممممر
هو : انا يافندم مندوب من شركة ايزو ايزو كلين للمساحيق العادية والملونة والاوتوماتيك .. حضرتك عندك وقت تعرفى ايه معايا؟
ريهام : لاء مليش نفس .
هو : حضرتك مش بتشوفى اعلاننا .. ياست حنان ياعم امين .. فرفش واغسل بأيزو كلين ، لو كنت رفيع ولا بدين ..
ريهام : هههه.. ياعم قولتلك مليش نفس .
هو : طب ولا حتى سندوتش جبنة؟
ريهام : انت جاى تهظر بقى؟
هو : لا انا جاى سكر زيادة .
طبعاً هتقولولى عرفت اسمها منين ....
----- فجأه .. تقاطع ام احمد الحديث بقولها : بت ياريهااااااااااااام .. مين اللى ع الباب يا بتتتتت؟؟
هو : على فكرة ماما ذكية اوى
ريهام : دا واحد سئيل اوى ياماما
( وهكذا دارت العاصفة)
----------------------------------------------------------
إنه طروووق ..، شاب من شباب مصر ..، انسان طيب ، معروف فى حتتة بالأحترام (صحبة السيدات الكبار منهم والصغار) معروف بالألتزام (ممكن يسهر برة البيت بس اخره 3 الفجر) ، شخص كميائى بالفطرة (يعشق الترامادول والتامول والايبسبيبليول واى حاجة اخرها اول) ، ملوش ف المخدرات (ممكن حشيش بس) ..، وعندما تسأله بمن ترجح ان يتربع على عرش مصر....يطلع يجرى .

للأسف من حظة الزفت ..، انه عدى على كل البيوت ..، وكان اخر بيت حاول يدخله فوجئ انه ذات طابقين .. يعنى الحمدلله مش هيطلع ولا ينزل كتير .. حاطت امل ان المنتج بتاعه هيتباع .. وهو يستكمل اللعن فى اصحاب الشركة واللى شغالين معاه .

هكذا عاد !!

جميع الحقوق محفوظة لمدونة اصحى يا مصر

الاثنين، مارس 01، 2010

عمرو دياب قديماً.. فكرة جبارة من افكار فيلم ولد وبنت


اسمعوا الاغنية دى وقولولى رأيكم

ياعمرنا.. يا قلبنا
انا ليا مين ..غيرك؟؟
انا ليا مين ..غيرك؟
تعبنا .. ودوبنا
فى البعد من غيرك
وانا ليا مين .. غيرك؟
ايام حياتى ف بعدها
ياعمرنا
كان مستحيل احبها
يا قلبنا
ايام ما عشت ف بعدها
ياعمرنا
كان مستحيل احبها
يا قلبنا
ايام خادتنا وفرقتنا وتوهتنا ..عنها
تعبنا ..ودوبنا
فى البعد من غيرك.. وانا ليا مين غيرك؟
كان حلم عمرى ف حبها
ياعمرنا
اعيش لوحدى ف قلبها
باقلبنا
كان حلم غالى ف حبها
اعيش لوحدى ف قلبها
كان حلم غالى مر بخيالى
دلوقتى بحلم ...عندها
تعبنا .. ودوبنا
فى البعد من غيرك .. وانا ليا مين غيرك؟
ازاى هننسى ف بعدنا
ياعمرنا
شئ كان بيجرى ف دمنا
يا قلبنا
مهما افترقنا .. وطال فراقنا
راجعين بشوقنا..لبعضنا..

تعبنا ..ودوبنا
فى البعد من غيرك ، وانا ليا مين غيرك ؟
عمر اللى بينا ما انتهى
ياعمرنا
عمرى اللى عشته ف حبها
يا قلبنا
سنين حياتنا .. ذكرايتنا .. امنياتنا ..كلها
تعبنا .. ودوبنا