الرسالة الأولى
متزعليش لو قلت اثور
منا ياما صبرت عليكي كتير
يمكن بدمى اهديكي نور
يمحى ظلامك من التحرير
..متزعليش لو قلت اثور
اهديكي موتى يمكن بدمى يترسم
صورة كبيرة جواها هم بينقسم
فرق ما بين الظالم والمظلوم
وترجع سماكى بعد الهموم ..حاضنة الطيور
فمتزعليش لو قلت اثور ..
نزلت لما حسيت إنى إنسان
ساعة الظلم راضيها
وساعة البكى بيبان
بس ترضى اتهان؟؟
منا داويت ألمى وألمك
وحاولت ارسم بريشتى كيان
نهبونى تانى بإسمك
وبرضة راضي
كان حلمى اكون فنان
والظلم كان واقف قصادى
كسروا اللوحة والألوان
ومفضلش منها غير ..بلادى
فاكرة زمان؟
لما كنت بلعب فى شوارعك
وف مدرستى واقف بندهلك
وبردد النشيد
حاولوا يخلونى بعيد
علشان ماكنش سامعك
ومحبتش اكون تاعبك...
ولا اتعب صفوت ولا سرور
متزعليش لو قلت اثور
زى ماقلتلك .. انا إنسان
قدامك اهوة بإرادتى
ضمينى جواكى بحنان
وعلشان اثبتلك..إنى مش جبان
تقدرى تقبلى شهادتى؟؟
لجل ما اكتب بدمى إسمك
جوا الميدان
يمكن يشوفه الظالم يغور
ومتزعليش لو قلت اثور
إسلام
ليست هناك تعليقات:
إرسال تعليق
لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم