الاثنين، مايو 30، 2011

أصوات .. بترسم الأغنية ، عن منير وبلاك تيما


يمكن انت بتسمع الأغنية علشان بتحب صوت المطرب .. او اللحن عجبك .. او الكلمات جميلة ، او قد تكون بتساعدك في تغيير المود :) ...، لكن لما تسمع أغاني تجمع بين كل دول، وبتجمع بشئ كمان وهو نادراً لما تلاقيه في اغاني حد .. وهو انك متزهقش من سماع الأغنية ولو حتى بتسمعها في اليوم اكتر من عشر مرات !! ، لإنك بكل بساطة بتكتشف في كل مرة جديدة بتسمع فيها شئ جديد بتفهمه من الأغنية .. مش معني كدا ان الأغاني معقدة - لا - انت بتكتشف فيها حاجة جواك موجودة جوا الأغنية دي ، بتعبر عن مدى الترابط اللي بينك وبين الحياه .. تقدر تقول فعلاً .. هي بتتكلم عنك ، بس بطريقة غير مباشرة . 

في اغنية لمحمد منير إسمها "الشتاء" اغنية جميلة وكلماتها خفيفة بتقول : بعد ما ادى وبعد ماخد ، بعد ما هد وبنى واحتد .. شد لحاف الشتا م البرد ..بعد ما لف وبعد ما دار ، بعد ما هدى وبعد ما ثار .. بعد ما داب واشتاق واحتار .. حط الدبلة وحط الساعة ، حط سجايرة والولاعة .. علق حلمه على الشماعة ، شد لحاف الشتا على جسمة ، دحرج حلمه وهمه واسمه ، داري عيون عايزين يبتسموا .. اللي قضى العمر هزار ، واللي قضى العمر بجد .. شد لحاف الشتا من البرد .. ، حط الدبلة وحط الساعة ..حط سجايره والولاعة ، علق حلمه على الشماعة :) . 

كنت بسمع الاغنية دي كتير بس كنت بعتقد انها بتتكلم عن المواطن التعبان ، بتحكي قصته في اغنية خفيفة في محاولة لنسيان ألام الواقع ، ولكن تفسير الأغنية دي طلع غير ما كنت متوقع ، وطلع تفسير أشد ألم ، من صديقي واحنا كنا ماشيين في الشارع قاللي انها بتتكلم في الأساس عن الحياه والموت !! .

تخيل ؟؟ رغم انها بتحكي عن ألم بجد ، إلا انها وصفته بإبداع خلاك تحب الأعنية دي اكتر ، اللي اكدلي فعلاً انها بتتكلم عن الحياه والموت .. لما بيقول : اللي قضى العمر هزار .. واللي قضى العمر بجد ، شد لحاف الشتا من البرد ، قدرت بإستطاعة شخصية ان افسر الأغنية ومعانيها بالضبط : الشتاء لمحمد منير .

بعد ما ادى وبعد ماخد (التعامل مع الحياه)
 بعد ما هد وبنى واحتد (النجاح والفشل)
شد لحاف الشتا م البرد ( شد كفن الموت)
بعد ما لف وبعد ما دار (الحياه
بعد ما هدى وبعد ما ثار (الحزن والفرح)
بعد ما داب واشتاق واحتار (الحب)
حط الدبلة وحط الساعة (ساب همومه ومشاغله)
حط سجايرة والولاعة (وساب متعته وراحته)
علق حلمه على الشماعة (حتى الأحلام انتهت!)
شد لحاف الشتا على جسمة (شد كفن الموت)
دحرج حلمه وهمه واسمه (يموت الإنسان وتموت معاه الأحلام والأسم والهم)
داري عيون عايزين يبتسموا ( بعد الموت الإنسان بيغمض عينيه)
اللي قضى العمر هزار (اللي أخد حياته كلها علشان المزاج والمتعة)
واللي قضى العمر بجد (اللي أخد حياته كلها جد وكفاح وتعب)
 شد لحاف الشتا من البرد (في كلنا الحالات .. الإتنين ليهم نفس المصير)
حط الدبلة وحط الساعة ..حط سجايره والولاعة ، علق حلمه على الشماعة :) 


طبعاً دا غير أغاني كتير جدا جدا جدا لمنير ، مش هقدر اعدهم الصراحة لإنهم كتير ، ولكن ما علينا .. دي كانت واحدة من الأغاني اللي شغلاني جداً .. بس في حاجة بقى عايز اتكلم معاكم فيها .. وهي بلاك تيما . 
بلاك تيما هو فريق من الشباب بيحبوا الغنا وبيحبوا مصر وبيحبوا يقولوا كلام كبير بس يدخل قلبك على طول ، في اغنية انا بحبها ليهم جداً جداً من مجموعة اغاني الشريط بتاعهم " بحار"  ، الأغنية اسمها " زحمة" ، وهي اغنية بتحكي عن مصر ماقبل ثورة 25 يناي . 
بتقول : 
إسأليني يا حبيبتي على اللي داير في البلاد .. ، إللى فيها صادروا حلمي وباعوا صوتي في المزاد .. ، إسأليني عن ولاد شفتهم بعنيا دول ..جربوا كل الحلول وبيفشلوا بالإجتهاد!! .. أحكي ليكي 1000 قصة من حكاوي التعبانين .. اللي عايش نص ميت واللي ميت من سنين ، إللى كل كلامه كحة ..اللي شاف خمارة راحها ..اللي اكل العيش دا بحة ..دايرة دور على السكرانين .
اللى نامية وفيها ثروة من الفلوس تعمل جبال .. إسأليني عن كباري نايمة تحتيها العيال، إسأليني عن الغلابة وإسأليني ع التقال ، إسأليني ع الديابة وإسأليني ع الفساد .
إسأليني اشمعنى صابر ع المأسي الملهية؟ .. هقولك اني كنت واحد من الغلابة الأعبيا .. اللي صبروا في إنتظار المعجزات والأنبيا .. اللي فاق من وهمة فجأه لقى كفر قوم عاد .
زحمة زحمة زحمة زحمة .....
كلمات الأغنية بسيطة ، بس فيها متعة في الإستماع فوق الرهيبة ، بتحس ان الكلام بيتقال من القلب ، وتحس ان الأغنية فعلاً هادفة ومؤثرة جداً ، رغم ان ليهم أغاني كتير جميلة إلا أن الأغنية دي بالذات اثرت فيا من اول مرة سمعت فيها الشريط دا . 
نتكلم بقى في المهم ، اغاني بلاك تيما ساعات بيكون ليها بُعد فلسفي بحت ، زي اغنية "زحمة المترو" ، بيحكي فيها عن قصة حب قصيرة جداً حصلت جوا المترو .. مع إستخدام الكلمات المصرية الشعبية البسيطة .. يمكن علشان تأثر عليك بسرعة ؟؟، كل الحكاية انه شاف بنت وعجبته فالمترو مش مديله فرصة انه يتكلم معاها وفضل انه يتكلم معاها بعنيه ، ولكن اللحظة بتمر .. ومن كتر ما المترو كان سريع فكان بيترجاه وبيقول : كفاية عذاب يا مترو اتلم .. دا 100 مشتاق ومشتاقة ، محطاتك تجمعهم على قضبان ما تتلاقى !.
مهما فكرت او حاولت تسمعلهم اغنية .. هتلاقي فيها حاجة بتشدك لإنك أكيد هتلاقي فيها حاجات بتتكلم عنك .. وحاجات كتيييير قريبة منك ، لإن الناس دي مش بتغني بس يا جماعة .. الناس دي بترسم الأغنية .


جميع الحقوق محفوظة لمدونة اصحى يا مصر

السبت، مايو 28، 2011

الليبرالية من وجهة نظري


بسم الله الرحمن الرحيم
قبل ما ابتدي البوست دا احب اقولكم اننا مهما اختلفنا في وجهات النظر نظل متفقين على مبدأ واحد وهي حرية الفكر والتعبير ، وإنه برده مهما كان السبب لا يفسد في الود قضية .
في البداية محبتش اتكلم عن الليبرالية في اي بوست من بوستاتي ، لإن احنا مش محتاجين نتكلم عنها لإننا بنمارسها في حياتنا بشكل او بأخر  رغم وجود العادات والتقاليد في المجتمع الشرقي التي قد تتنافى ، إلا انها موجودة في الحياه قبل ما تكون اساسها ايدولوجيا سياسية ، كتير مننا ممكن يعتقد انها حرية مطلقة في الحياه ولهذا السبب قد تختلف مع المبادئ الدينية - على حد قول بعض من الناس - مع ان العقائد الدينية السماوية منها والغير سماوية بتدعو للتسامح والحرية ..، وبدون ان نخوض داخل اطار الدين اسمحولي اكتب كام مفهوم عن الليبرالية ومدى تأثيرها واثبات نجاحها داخل الناس .
الليبرالية : هي في الأساس منهج سياسي او كما يطلق عليه (ايدولوجيا) - تتحدث عن التحرر ..تحرر الفرد او الجماعة من ثلاث قيود سلطوية هم :  السياسية والإقتصادية والثقافية ، بمعنى اصح او توضيح للأمر اكتر هي فلسفة التي تقوم على "استقلال" الفرد والتزام الحريات الشخصية وحماية الحريات السياسية والمدنية (طيب فين بقى اختلافها مع الدين؟؟)
الليبرالية هي التحكم في افعالك كفرد ، يعني انت اللي تختار بنفسك كل شئ ومحدش يقدر يقيدك بشئ ، يعني انت اللي تختار تخرج امتى وتروح امتى وتذاكر امتى ، وتاكل وتشرب امتى ، لو كنت ملتزم دينياً (فدا شئ وعلاقة خاصة بيك انت وربنا، مش شرط اني اكون ملتزم يبقى لازم اوري الناس كلها اني بنزل اصلي في الجامع علشان يقولوا عليا الواد دا ملتزم واخلاقه عاليه .. مش هنضحك على نفسنا) ، بمعنى اصح للتوضيح انت سيد قرارك ، وانت ملتزم بقراراتك اللي بتاخدها في حياتك ان كانت صح او خطاً .
كتير مننا ممكن يقول : انا اتعلمت من الحياة دي كتير اوي .. ، ودايماً يا جماعة اللي بيتعلم منها ويصبر بينجح ، لإن انت اخترت بحريتك انك تتعرف على الأشخاص فعرفت منهم الحلو والوحش من خلال تعاملك معاهم ، عرفت تفرق بين الأكل اللذيذ والأكل اللي ميتاكلش من خلال نزولك للمطاعم مثلاً ، قدرت ان انت تحط قواعد ومبادئ لنفسك من خلال قدرتك في حريتك الشخصية دون ادنى مساعدة .. مش معني كدا انك مش هتلاقي مساعدة من حد !! ، لا طبعاً انت ممكن تلاقي اللي ينصحك بس هتبقى هنا حريتك في الإقتناع يا إما تقتنع او متقتنعش ..دا اذا كان بيصب في الأخر لصالحك .
تلاقي مثلاً في حاجات بتضحكك .. يقولك الليبرالية دي يعني البنت تروح لصاحبها البيت عادي جداً !! ، وان الست تنزل البيت من غير حجاب !! ، ولله يا جماعة الليبرالية مبتضربش حد على إيده .. ، كل الحاجات دي حاجات فرديه جوانا احنا ، انما الليبرالية ملهاش اي علاقة من اي نوع فيها ... مش معنى اني بدعوا للحرية يبقى اقول للست تنزلي من غير حجاب !! - اذا كنت انا بدعوها للحرية ازاي بقى افرض عليها شئ .. مهو دا معناه اني بفرض عليها قيود وهذا ما يتنافى مع الليبرالية ، ومش معنى الليبرالية اني اخلى البنت تروح بيت صاحبها ( مهو لامؤخذة في ليبرالية او مفيش ليبرالية الكلام دا كان بيحصل في مصر الحديثة والقديمة) .. فمعلش يعني مينفعش نتهم اتهام باطل ان الحرية المطلقة هي التي تؤدي للموقف دا .
بالنسبة بقى للدولة المدنية ، اللي السلفيين للأسف عاملينها بعبع وبيقولوا بكل بجاحة انها "اقصاء دين الله" ، الدولة المدنية هي تطبيق للديمقراطية "الليبرالية" بس كدولة وليست كفرد ، يتعامل الفرض فيها بمساواة وإتاحة الفرص ، وكذلك محاربة التطرف والعنصرية بكافة انواعها ، يتمتع فيها المواطن بكامل حقوقة المادية والمعنوية والأدبية ، لو تحدثنا عن المساواة فأننا مش بنتكلم عن المساواة بين الطبقات في التعامل والتعايش ، ولو تحدثنا عن اتاحة الفرص فهي اساليب المشاركة في الدولة من خلال المنظومة الإقتصادية او الثقافية ، مع الحرية الكاملة للفرد .
مينفعش انكر ان الليبرالية بتدعو لفصل الدين عن السياسة ، ودا الأصح .. الكل هيسألني ليه طبعاً ؟؟؟
لإن السياسة يحدث داخلها الاعيب ومراوغات وحاجات كتير جداً بتتنافى تماماً مع اساليب الدين ، أي ان من الممكن ان تكون السياسة بداخلها العاب قذرة ولذلك يكون الدين برئ منها ..
انما بالنسبة للتشريع ، فالليبرالية ليست لها علاقة به ، في الأساس يكون بالمبادئ الدينية
لحد كدا فل اوي وانشاء الله البوست الجاي بعنوان "الليبرالية والدولة المدنية"
جميع الحقوق محفوظة لمدونة اصحى يا مصر