كل سنة وانتم طيبين

اكيد زمان كنا كلنا لينا ذكريات مع رمضان ، ذكريات بتجمعنا في بيوت العيلة ..، في الشارع ، واحنا بنصلي او احنا بنفطر 

القصيدة دي كتبتها قبل رمضان ، وعلى الرغم اني مش شاعر ... لكن قولت ما اعبر شوية عن رمضان بطريقتي 

وحشتني ايام زمان ..

ايام النشا والخيط ..

وشوية اللاخبيط ..

مع حبة الألوان .

.ايام الورق في الحيط ..

ونعلقه بتنطيط ..

من بلكونة لبلكونة ،

وبأفكارنا المجنونة .

.نعمل زينة رمضان ،

وف وسط الزينة فانوس ،

معمول بورق سلوفان ..

منور كل البيوت ..

ومزين كل الحيطان

تدخل بقلبك بيوت

مفتوحة كل البيبان

وجنب بيتنا خيمة 

فيها خير الرحمن

لو مقدرتش تعدي علينا

هتلاقي هناك امان 

ناس مستنياك بفرحة

وحب واكل كمان 

وجارنا نزوره في داره

او يجي يزورنا في دارنا

نفطر معاه بفطاره

او كلنا نفطر بفطارنا

نلعب احنا وعياله 

لحد ما نقول اتسحرنا 

وكمالة عليها صلاتنا 

بقلوب مليانة ايمان

متفتكروش دا شعر

ولا مدح مكتوب في ديوان

انا نفسي بس الايام كلها

تبقى ف كرم رمضان

وحشتني ايام زمان

إسلام جاويش 

كل عام وانتم بخير وصحة وسعادة

جميع الحقوق محفوظة لمدونة اصحى يا مصر