الأربعاء، نوفمبر 28، 2012

صورة من محمد محمود

من زمان وانا نفسي اوثق كل شئ حصل في الثورة بالصور بس للأسف ملحقتش لأن مكنش معايا امكانيات ساعتها
بس على العموم دي مش الفكرة :) خلينا في الايام دي
انا جبت النهاردة مجموعة صور من محمد محمود والميدان ، لو حابب تتفرج عليهم بدقة عالية كل ما عليك انك تضغط على الصورة
نبدء نحكي بقى 
يوم 19 نوفمبر 2012 
احتفالية عادية زي اي احتفالية تأبين شهداء ، بس المرة دي كانت في شارع محمد محمود بس ، بصراحة كانت شديدة جداً انا شخصياً اخدت فيها صور كتير هنزلها ان شاء الله في بوست لوحدها 
نزلنا اليوم دا واحنا عارفين ان هيحصل حاجة ، كان لسة حوار الاعلان الدستوري والهري اللي فيه دا مجاش بس فعلاً كنا متوقعين اشتباكات بين الثوار والامن وده اللي فعلاً حصل 
انا متفق ان القصاص لازم يتاخد وكل واحد ياخد حقه ، في من الشباب اللي زل اصحاب ناس ماتت في محمد محمود 1 و 2 ولحد دلوقتي القضاء الشريف مجابش حقهم ، قعدو يضربوا الامن بالطوب فتعاطفت معاهم العيال الصغيرة وكله بقى بيلب الامن بالطوب 
ودا كان جزء من الاحتفالية اللي مكملتش اساساً لأن الداخلية بدأت في الضرب ..
تاني يوم اتجددت الاشتباكات والداخلية ترد بالغاز واحيانا الخرطوش
وتالت ورابع نفس الحكاية مع دخول شارع القصر العيني محيط الاشتباكات
وبعدها جت كارثة الاعلان الدستوري المكمل بتاع مرسي اللغريب
وبعدها القوى المدنية نزلت الشارع تعارض .. وتصاعد حدة الاشتباكات لأن الاعداد كترت طبعا
القوى المدنية اخدت خطوة انها هتعتصم حتى اسقاط الاعلان الدستوري المكمل 
ودلوقتي الاعتصام مفتوح .. وفي اراء انه ينفتح حتى اسقاط النظام 
دايماً في كل بوست كدا بحب اعمله مقدمة كبيرة ، فمتزعلوش من الرغي بتاعي 
تعالو احكيلكم عن قصة الصور



الصورة دي كانت تاني يوم اشتباكات عند مدرسة الاليسية ، الامن كان بيضرب من فوق السطح واحنا بنحتمي في حتة حديد صاج علشان تبعد عننا القنابل


الصورة دي انا :)) وانا في التحرير وكان ساعتها الداخلية عاملة حرب في القصر العيني وبتضرب غاز بكثافة من المدرعات . ورايا ديفيد عبد النور مراسل شبكة اخبار مصر وصديقي الصدوق .. ساعتها كانت كل الناس بتجري من الغاز واحنا بس اللي بنجري ورا الغاز علشان نتصور معاه :))


شباب القصر العيني .. بيولعوا النار علشان تحميهم من الغاز ، مع شوية تدفئة لأن الجو كان تلج .. مع الضرب يعني وكدا كانت بتدي باور جامد .


دا محمد محمود من الداخل ، عند الاليسيه ، ودي بقايا الحرب من طوب وعصيان وحاجات كدا .. طبعاً دا شكل الشارع ساعة الاشتباكات تحس انه ساحة حرب


صورة تانية للشارع 


دي صورة من القنابل اللي كانت بتتحدف علينا ، مش مكتوب عليها اي شئ ولا معروف دي ايه بس المهم انها بتحرق وبتخليك تعيط والله اعلم ان كان فيها مواد بتثير الاعصاب ولا لا .. بس هي قوية جداً لأني مجربها وغير كدا انها مبتنضربش غير من بندقية خرطوش زي الخرطوش كدا بس وساختها انها بتجري في كل مكان لحد ما تفضي اللي جواها


محمد محمود .. بعد الهدنة ، من عند مكتبة الجامعة الامريكية القديمة


المكان دا كنا بنقف نحتمي فيه من الغاز ، ودي اثار الغاز 


دول الاطفال اللي كنت بحكي عنهم في تويتر ، رغم انهم صعبانين عليا بجد وشايف انهم مينفعوش في المواجهات دي بس لما اخدتلهم الصورة وهما بيدفوا وفي منهم اللي نايم .. حسيت بتعبهم ..
وهو دا الواد اللي لما سألته انتا جاي هنا تعمل ايه ؟ قالي بنعمل ثورة على مرسي علشان الفقرا واحنا فقرا


من شارع القصر العيني :) استراحة المحاربين 


نأسف على غباء الصورة ، بس انا بجد كنت بشوف الاشارة كل شوية تتغير رغم ان الشارع مقفول ومفيش اي حاجة ، كتير بقى اللي يقولك دي سيمات عاملنها الامن علشان يضربوا علينا في اوقات معينة ، وفي اللي يقولك مش عارف ايه
انا قولت اخطفها صورة .. معرفش بتعبر عن ايه بس هي صورة 


نيجي في التقيل بقى .. محمد محمود لحظة الاشتباكات والمولوتوف  ، صحيح .. العيال كانت بتجيب بنزين المولوتوف من العربيات المركونة :) فكروني بمقولة : الجيش قالك اتصرف


دي بعد ما ضربوا المولوتوف بس الهدف مصابش حاجة يعتبر .. لأن الجنود كانو كلهم فوق


دي صورة اخدتها للخرفان 


دي القنبلة اللي حكيتلكم عليها في صورة فاتت .. بتنضرب على ناس عاديين جداً ومواطنين حتى مش متظاهرين 


واحد مصاب الشباب بيحاولوا يلحقوه . في طريقهم للمستشفى الميداني


شباب بيحاول يساعد الناس من تفادي الغازات المسيلة للدموع 


مسيرة حزب الدستور في الجمعة اللي فاتت .. كانت حلوة ولله وكان فيها واحد بيطبل .. هنزل صورته البوست الجاي


المجد للشهداء .. والموت للجبناء ، من مسيرة الدستور 


اوعى تغرك دقنك يا مرسي .. رسالة من مواطن لمرسي 



نرجع تاني لمحمد حودة .. الشباب ولعوا في شوية خشب كتير علشان يتفادو بيه الغازات المسيلة .. بيقولوا انه بيقلل منها بس عن تجربة لا قل منها ولا بتنجان 


عموما .. الخشب بعد ما اتولع عمل هالة كدا نارية كان شكلها حلو .. اخدتها بكذا وضع 


دي صورة تانية ليها كمان 

عندي حوالي 150 صورة بحاول افلتر منهم اللي اقدر عليه .. ويارب يعنني وانزل البوست التاني في اقرب فرصة وااتابع معاهكم لحظة بلحظة 
هحاول افلتر على قد ما اقدر وارفع واكتب البوستات على قد ما اقدر 

جميع الحقوق محفوظة لمدونة اصحى يا مصر

الثلاثاء، نوفمبر 20، 2012

ندرت الندر يا طاهرة #محمد_محمود

ندرت الندر يا طاهرة .. ماسيب وقفة ولا مظاهرة

بإختصار ... محمد محمود




me , at mohammed mahmoud street
مش هطول عليكم في الكلام
دخلت على تويتر من التاب بتاعي امبارح لما كنت بنقل اخبار الضرب ، ولقيت عالم كنت فاكر لحد قترة قصيرة انها ناس بتفهم وعندها عقلية لكن للأسف طلعوا ولاد كلب ولا يفهموا .. اسف لقلة ادبي بس دي الحقيقة .
العالم دي دخلت تكتب وتشتم في الشباب اللي كانو بينضربوا امبارح ، والاسئلة العامة اللي كانت متاحة امبارح :
1- هما ليه راحوا اصلاً ( بيفكروني بسؤال الاخوان المستفز ايام احداث مجلس الوزرا)
2- هما ليه بيعملوا كدا ؟؟ ( سؤال عبيط وكتير قالوه )
3- انتو عايزين ايه ؟ تضيعوا الثورة ؟  :)))
كان ناقص يقولوا ان الاحداث دي فوتوشوب ! :D
ما علينا ، بغض النظر عن اللي قالوه البهايم وتفكير البهايم والتفكير البهيمي والحميري اللي شوفته امبارح بكترة على تويتر والفيس ، ياريت نرجع كدا لسنتين الا شهر ورا .. من 25 يناير 2011 .. ، مش هقولك من اول ما خالد سعيد مات اللي لسة مطلعلوش شهادة وفاة لحد دلوقتي .. مع احترامي للشهيد خالد سعيد .. نحسب من ساعة 25 يناير لحد دلوقتي ...
يعني احداث الثورة يموت 800 واحد ومحدش في النظام القديم يتحاسب ، لما يموت في ماسبيرو ومحمد محمود 1 ، 2 ومجلس الوزرا والعباسية وبورسعيد حوالي 200 - 300 واحد ! ، ولما يتصاب ويعتقل الألاف من الشباب اللي هما اساس الثورة، ولما طنطاوي القاتل ومعاه عنان ياخدو براءات رغم انهم السبب ، ولما يجيلنا رئيس لا هو من الثورة ولا هو من الناس اللي دعوا لها ، ولما الفساد يفضل موجود في الداخلية وفي جميع الوزارات ، ولما تسيطر جماعة على دولة بكل مواردها واحتياجاتها ..يبقى المفروض نعمل ايه ؟.
في البداية كانوا بينادو بمطالب شرعية ، حلموا بيها وكان طموح يوصلوا لأهدافهم ، حسوا بالتغيير وقت ما كل الناس كانت بتطاطي للنظام الجديد ..
ولكن في ناس كتير ركبوا على حلمهم
ناس تضامنوا معاهم لتحقيق مصالح شخصية وبعد ما حققوها سابوهم
جت الداخلية .. وقتلوهم
جه الجيش .. واعتقلوهم
يعني لما حاولوا يحلموا انضربوا واتقتلوا واعتقلوا .. ادوهم فرصة يحلموا بأديهم
لكل فعل رد فعل ، وفعل الداخلية والنظام ما ورد على اي فعل شوفته في حياتي
زي بالضبط بلونة عمال تنفخها بغباء .. بغباء .. بغباء ، هيجيلها وقت وهتفرقع في وشك
الشباب كانوا بينادو بالعيش والحرية والعدالة الاجتماعية
دلوقتي مبينادوش غير بشئ واحد
بحق الشهيد والمصابين والمعتقلين اللي نادو بالعيش والحرية والعدالة الاجتماعية
وللأسف حقهم لسة مجاش ، وحلمهم لسة متحققش
يبقى ميزعلش النظام من الانتقام
كفاية كدا

دا فيديو بيوضح حجم الاشتباكات
جميع الحقوق محفوظة لمدونة اصحى يا مصر

الثلاثاء، أغسطس 28، 2012

رسائل من مغرور 1


انا انتي .. انا حبيبتي
انا سيرتك .. انا حكايتك
انا سيرتي اللي محكية في اول باب في قصايدك
انا عوايدك  انا طبيعتك انا عقلك
انا جنونك لما تنعكشي شعرك
انا خواطرك انا شعورك ..
انا قلمك لما بتكتبي سطورك
انا غرورك..
 انا ضفورك ..
انا الوردة اللي مالية الارض بعطورك
انا نورك انا نهارك ..
انا وياكي طول الليل ..انا جوارك
انا ضميرك انا عذابك .. انا حضورك انا غيابك
 انا الكائن في عز البرد عمال بخبط على بابك
انا الرسمة اللي موهومة على شفايفك ..
 انا الرعشة اللي بتحسيها ساعة ما تحضني كفوفك
انا عشقك انا صوتك انا جنونك...
انا جفنك انا روحك انا عيونك...
انا البسمة اللي بين النن ورموشك ..
انا صباحك انا رباحك انا جمالك انا طموحك ..
.انا املك انا سامعك ..انا وداعك انا رجوعك..
انا دماغك انا فكرك انا قربك انا الاصحاب ..
انا حبيبك انا قريبك انا كلمة ف محل اعراب .. 
انا عشقتك بدون اسباب .....

انا وجودك .
انا عاينك انا حافظك انا أصلك  
انا صاينك من اللي ما يصلي حسودك
انا الضحكة اللي مزروعة بين الحُسن وخدودك
انا الفرحة اللي ممنوعة من التكشير
انا الحاجة اللي محتاجة تكون لحدودك
انا مجموعة من كلام وحروف كتير
انا مالك انا حالك انا فكرك انا بالك
انا اللي بّميل راسي على راسك واقول مالك ؟؟
انا خيالك انا سؤالك انا جوابك
انا سهرك انا نومك انا تعبك انا راحتك
انا بيتك انا مكانك انا شارعك انا عنوانك
انا همك على عيالك
انا بردك انا نارك .. انا الخطوة في قرارك
انا جّدك انا هزارك
انا حلاوتك.. انا مرارك
انا الحفاظ بأسرارك
انا المغرور ....
وتاني بقول ..
انا المغرور
انا اللي غيري لو ما يعتر في وطن زيك
يلف يدور !!


جميع الحقوق محفوظة لمدونة اصحى يا مصر

الأحد، أغسطس 26، 2012

سطر ف كتاب


كل الكلام الحلو ليكي سطر ف كتاب ..
واقول فيكي المديح بيسرح عقلي في الملكوت
وقلبي اللي مال ليكي كسب فيا مليون ثواب
من كتر ما بيسمع غنايا دندن ورايا وقال بالصوت
لو يساوها بالألماظ ..يصبح الالماظ تراب
ولما شافني سكت وانا ببكي طال السكوت
بكى قلبي وصلى ركعتين لربه وتاب
****
اسف لأني مش قوي أوي في البلاغ
فمتزعليش من طريقتي في الكتابة
دي مش كآبه .. بس انا محتاج لدماغ..
اديا لما بتبتدي تكتب بتمشي زي الفطر
تبدأ ف سطر وتسيب سطر
اصل الكلام لما يزيد بحتاج لفراغ
عشان املى كل اللي فات مني بدون صبر
بلجأ للسطر اللي انا سبته
واملى فراغه ..
كلام خلاصته بتنكتب سطر ف كتاب
ميزان الكون بيختل لما بشوفك تندهي
سامع غنا .. سامع بكا ..سامع آنين
مهو ياريتك تسمعي
هتعرفي انا ليه بكون واقف هنا
واقف حزين !!
بشوف عنيكي لوحدها...
وكأنها .. تحويشة عمري من الدموع
سايلة على خدود الورق
بين السطور قلمي اتسرق
بين السطور انا قلبي داب
وكل الكلام اللي عشانك اتخلق
سطر ف كتاب ..
والكتاب لما انتهى بقت صفحاته مهجورة
مفضلش منك غير اسرار ..
مفضلش منك غير صورة 

مفضلش غير شرخ ف جدار 
في نفس اسوار المكان 
جمعنا زمان .. نفس الحوار
وكل اللي دار في بعادك مش عارفاه 
معذورة
القلب مال على صورتك كان فاكرها في الاصل أصل !!
مش صورة .. لازقة ف جدار 
ندمان  في بحرك يا سما دليني على مراسية
زعلان على شوق انتحر ياعيني مين يواسيه
عمال انادي انا والقلب مابيسمعشي مين يناديه
رميت شكوتي للندى ، رد الندا بعد الغياب
كل الكلام ده ميساويش .. سطر ف كتاب



جميع الحقوق محفوظة لمدونة اصحى يا مصر

الاثنين، أغسطس 20، 2012

حرية الفشر 1

سألني واحد صاحبي : ايه رأيك في اللي حصل في قناة الفراعين وصاحبها العبيط ؟ غلط قفلها ولا صح؟
قولتله غلط طبعاً اللي حصل ده ، واللذيذ في الامر انك بتقول ان صاحبها عبيط وعارفين انه عبيط بس احنا بنموت في العبط ، ومبنعرفش نميز .. زي بالضبط الكلب لما بتعدي من عليه .. بيّهوهو .. هترد عليه ؟؟ احنا كشعب بقى بنحب هوهوه الكلب لأننا بنموت في ولاد الكلب .
قالي بنوع من الغلاسة : طب مهو هيفضل يهوهو كدا هيوجع دماغي ..
رديت عليه بنفس مقدار الغلاسة لأني غلس بالفطرة : مهو عمره ما هيفضل يهوهو كدا الا لما تكون انت واقف وباصص له وعمال تهوهو انت كمان فيه .. وتتبادلوا مناقشاتكم عن الاوضاع السياسية في الهوهوة .

جميع الحقوق محفوظة لمدونة اصحى يا مصر

الأربعاء، أغسطس 15، 2012

شعر أبيح

من زمان .. هو مش من زمان أوي ، كتبت شوية شعر كدا وركنتهم في المكتب وقولت عيب دا شعر أبيح ، بس ناس كتير غاليين عليا اقنعوني اني اكتبة على المدونة .. فأرجوكم لو عجبكم هذا النوع من الآباحة قولولي علشان اعمل حسابي وانزل شعر غيره  ، ولو معجبكوش اعتبروه جزء من هرتلة الصيف الليلية


ليست اللغات جميعها
تحتاج لتفسر او تشرح او تتحدث
او تستنشق هواء بنكهة الريحان
او تجعل من رقبة تلك الانثى
قيثارة .. تعزف عليها اجمل الألحان
ليست للكلمات وحدها
تكفي لتتخطى الوجدان
فأناملي تلامسك  كالريشة
على نهديك الورديتان
يتزين بهم قوامك الفرعوني
كالوردتان ..
اسفلهم تمر الشمس
من المشرق .. الى المغرب
في منتصف الكون اتحدث
بقبلة تشعرني بالأمان
رغم حرارة شمسك سيدتي
فبرودة قبلاتي ليس لها عنوان
تثيرني خصلاتك السوداء
تثيرني بكونها اشواك
اشواك ناعمة ..دافئتان
يمر منها الإحساس .. تمر منها المشاعر
تمتعني ..تنطلق بي الى اخر الزمان
بداخلي رجل يداعبني
يتحدث في اشتياقه لكِ سيدتي
فهل انت مستعدة لتعطيه الحنان؟
في قبلة او يندمج بإحساسك
بمشاعر ما اجملها من مشاعر
وبحنان .. ما اجمله حنان
يستنشق هواءك العاطر
الصادر منك ..
يتذوق قطراتك ..كأمطار حزيران
يتتبع بخطوات حساسة
يعود ذهاباً واياب
في لمسة مطلقة للعنان
يتزين بقطرات دماءك
وانظر الى عينايك
وما اجملهم من عينان
تضحكين لي فتضحك الدنيا
للأسراب من الطيور في السماء
تتألمين .. رغم جمال الألم ..
قد تتلخص قصتنا هذه ... في كلمتان
جنون حبك سيدتي 
في قوة اجمل انسان


الأحد، أبريل 22، 2012

الحرية لأحمد الجيزاوي


واحد مصري عشان يروح يعمل عمرة يتمسك ويصدر قرار بجلده وبحبسه .. ليه؟؟ هو لا جاسوس ولا حرامي ولا نصاب ولا بريالة .. هو بس رفع قضية في حق الملك عبدلله وطبعاً دا مينفعش .. لازم يتجلد ويتحبس ، لو كان واحد سعودي حصل فيه كدا كانت السعودية كلها قامت ومش هتقعد الا لما يتحرر .. انما المصري بقى رخيص جوا بلده وكمان بره بلده ؟؟ ، السعوديين بيجوا مصر يتفسحوا ويشربوا وياكلوا وبيهنونا وبرده محدش بيقول لهم تلت التلاتة كام .. وحتى لما بنروح هناك بنتحبس ونتجلد !! ، ياجدعان حرام عليكوا وشاطرين بس تقولوا مصر لن تركع ..! لو مواطن مصري واحد ركع يبقى مصر كلها ركعت ياولاد الكلب


يمكنكم التواصل والتضامن من خلال هاش تاج احمد جيزاوي على تويتر #FreeGezawy او #طظ_في_ذاتك_الملكية_طال_عمرك
جميع الحقوق محفوظة لمدونة اصحى يا مصر

الخميس، مارس 29، 2012

أتنين ملهمش آمان !


“في ناس عندها شبابيك بتفتحها علشان تشوف وتفهم وتتفرج لحد ما بتتعلم .. وفي ناس عندها مرايات ، مبتبصش الا لنفسها ومش بتقتنع غير بنفسها.. لحد ما بتتجنن” ، كتبت الجملة دي منذ فترة طويلة لتجعلك على قائمة المتفائلين ، لا اعلم ان لكل شئ مغزى ومعنى سياسي برده ، حيث ان هناك قوى مش شايفة غير نفسها لدرجة انها اصابت بجنون العظمة ، يعتقدون انهم الأغلبية وان الأخرون "أقلية" علماً بأن هذه الجملة كفيلة بخلق الفتن ، يعتقدون انهم الوحيدون الذين ذاقوا مرار التعذيب في سجون امن الدولة ونسيوا ان احنا اللي طلعناهم من السجون ، يعتقدون ان النزول يوم 25 يناير هو في حد ذاته خطر على البلد من الاناركية الفاشية الليبرالية العلمانية التي تريد خراب البلاد وعجلة الانتاج ، فمات من مات .. واصيب من اصيب من الثوار ، وضاعت عيون الكثير من الشباب لأجلهم ، وهم كالشياطين صامتون عن الحق وهذه عادتهم .. ومن المضحك انهم الأن يدعون من مات ومن اصيب ومن فقع عينه للنزول والحشد لأجل مصلحة البلد لا لمصالحهم الشخصية، يعتقدون انهم يملكون مصباح علاء الدين يمكن "فركه" في اي لحظة يطلع بمليونية ، يعتقدون انهم مفجري ثورة الخامس والعشرين من يناير وهم اول من ركبوها واستغنوا عنها وباعوها ، يستغلون الدين لأجل المصالح السياسية وهذا ما ادى لإضعاف الكثيرين من ابناء الشعب لإرضائهم ، قالوا نحن نعشق تراب الوطن وسنطبق "الحرية والعدالة" في دولة انعدمت منها العدالة والوطنية.. وبقيت السياسة هي اللغة الرسمية التي يتعامل بها هؤلاء .. مستمتعين بقذارتها .

وفي اطار المطامع السياسية ، كانت صفقة البرلمان من اشهر الصفقات التي تمت مع المجلس العسكري ، وغيرها من الصفقات التي عمل عليها اصحاب المبدء والمهنج حتى وصل الأمر الى اللجنة التأسيسية لدستور الدولة ، ف عليه العوض ومنه العوض .

بهذا المشهد يذكرني بقصة قصيرة قرأتها .. تقول : كان هناك رجلاً ايرلندي ثري من الإقطاعيين لديه 100 فدان وعدد غفير من الفلاحين يعملون لديه ويزرعون ويروون الأرض يومياً ، ومن ضمن هؤلاء الفلاحين رجلاً شديد الفقر ، كان يحلم دوماً بإمتلاك هذه الأرض حيث قال ذلك لصاحبها وجها لوجه وبدون خوف جعلته يبتسم له ويقول : موافق احقق لك امنيتك ، بس على شرط .. تلف الأرض دي كلها جري في مدة اقصاها ساعة ، اختار نقطة بداية وعد إليها ، ولو رجعت قبل الساعة سأحسب لك المساحة التي تخطيتها وسأعطيها لك مهما كانت تضم اي عدد من الفدادين ، ... وافق الفلاح على الفور وفرح بهذه الصفقة ، وبدء يعدو تلك المساحة بسرعة ، لم يكتفي بعدد معين من الفدادين ولكن اخذ يعدو بعمق الأرض بأكملها ، حيث كان بإمكانه ان يحصل على عدد لا بأس به من الفدادين ولكن الطمع جعله ينظر لل 100 ، حتى وصل إلى نقطة البداية بالفعل .. ونجح ..ولكن قلبه لم يحتمل و مات ! ، ولم يفوز هذا الرجل إلا بقطعة صغيره دفن فيها وصارت قبره .

اتنين ملهمش امان .. السياسي والطمعان

إسلام جاويش .

جميع الحقوق محفوظة لمدونة اصحى يا مصر

الاثنين، فبراير 20، 2012

اعلان منير الجديد

انا من القليل لما بشير فيديوهات هنا .. بس شكلي هشير كتير :))
اعلان فودافون الجديد تقديم الكينج محمد منير ، واضح ان الراجل دا استاذ حتى في الاعلانات
الاعلان بيحكي عن قصة نجاحة ، لو كان دا فيلم كان هيحقق نسبة مشاهدة ونجاح اكتر من نجاح منير نفسه
كل المفروض مرفوض .. اثبت للعالم انك موجود ، متخليش حاجة توقفك :)


جميع الحقوق محفوظة لمدونة اصحى يا مصر

الخميس، يناير 26، 2012

في ذكرى ثورة 25 يناير ... الثورة مستمرة


يوم من اجمل الايام اللي هنعاصرها في حياتنا ! ، 25 يناير 2012 بقى احلى من اللي فات مليون مرة ، مش عايز اقول عليه احتفالية لأننا لسة وبعد مرور سنة على الثورة مرجعناش حق الشهداء ، قاتلهم حر طليق في مستشفى بغرفة عبارة عن اوضتين وصالة كبيرة تسع من الحبايب الف ، بيروح المحكمة وكأنه بيروح المدرسة كل يوم الصبح بس بطيارة مش باص ، بقالة سنة على كدا وللأسف مفيش اي رد من اي جهة على اي حاجة ! ، ولا حتى اتحكم عليه بأي شئ ، الامر اللي خلانا ننزل بالعدد الكبير دا علشان نعيد امجاد الثورة وننزل نطالب بحق الشهيد اللي حقه هيرجع بإذن الله طول ما في ناس بتطالب .
كنت في مسيرة الزقازيق اللي اتحركت من ميدان المحطة ، واتجهت لموقف المنصورة وبعد كدا على القومية ورجعت تاني لميدان المحطة ، كانت بالفعل مسيرة حاشدة ، لحد ما وقفنا تحت تمثال الزعيم احمد عرابي والشباب هتفوا والكل كان بينادي وراهم ، كان المنظر جميل جداً ،  كنا عاملين زي غرفة عمليات كدا في القهوة وقدرنا نصور عدد كبير من الصور ، كان يوم بالفعل جميل . 
بالنسبة لرأيي في البرلمان انا هكتب بوست منفرد عنه في القريب العاجل بإذن الله - واسيبكم مع الصور


















جميع الحقوق محفوظة لمدونة اصحى يا مصر

الثلاثاء، يناير 24، 2012

جولة في شارع محمود بعد ما شوهوه وشالوا الجرافيتي



شارع محمد محمود طبعاً محدش يقدر ينسى افضالة علينا ايام الثورة .. مأوى للثوار ، جدران مكتوب عليها بالدم ايام الكفاح والثورة ، انكتب عليها ذكريات جميلة وجرافيتيات من الصعب اننا نرجع نرسمها من اول وجديد ، من اول مبنى الجامعة الامريكية لحااااد مكتبة الجامعة ، حتى بمداخل باب اللوق ..! ، للأسف بعد ما حولوه لثكنات عسكرية وبناء جدران عازلة .. ممشيوش الا لما طمسوا كل اللي مكتوب على الجدران .. مسحوا الجرافيتيات .. مسحوا ذكرياتنا وذكريات الثورة .. مسحوا ذكريات الشهداء ، للأسف مكنش فيه ولا جرافيتاية سابوها مما ادى لحرقة دم كبيرة اوي في نفوس البشر واولهم انا .. حسيت كأن الدنيا اتغيرت ..حسيت كأن اخر امل لينا ضاع ، مسحوا كل حاجة في الشارع اللي شرب من دماء الكتير من الشهداء ... ودي الثور اللي انا اخدتها واللقطات اللي قدرت اخدها لكم علشان تشوفوها وتشوفوا هما بعد ما مشيو ومن جبروتهم عملوا ايه علشان يحرقوا دمنا ، مش همهم ان احنا عملنا ثورة وان الجرافيتي دا بيحكي عن الشهداء وايام الكفاح ، مسحوا جرافيتيات الشهداء ، مسحوا كل حاجة ، كنت اتمنى  ان الشكل يكون غير كدا ولكن للأسف .. دا اللي حصل ، الشارع كله بقى مدهون باللون البيج !



دي صورة على يمين ، الشكل يوضح لكم مدى الاذى اللي حصل ، الشباب جابو الاسبراي وكتبوا يسقط المشير والشعب يريد اعدام المشير 


دي على نفس جدارية الجامعة الامريكية مكتوب عليها الثورة مستمرة والمجد للشهداء 


دا الجدار العازل اللي اتبنى بجانب مكتبة الجامعة الامريكية القديمة ، في نفس الشارع .. للأسف محدش تقريبا بقى بيدخل الشارع من عربيات او غيره ، وزي ما انتم شايفين الجرافيتيات مكتوبة على الجدار وبعد ما سابو المكان مش راضيين يشيلوه كمان ! 


صورة اخرى للجدار 

جرافيتي لا للعسكر  على شمال الشارع 


جزء للجرافيتي مكتوب على جدار مكتبة الجامعة الامريكية 


دي بقايا الثكنات العسكرية ويظهر فيها الاسلاك الشائكة اللي اقامها العسكر اثناء مواجهات مجلس الوزراء قبل ما يسيبوها ويرجعوا لحماية وزارة الداخلية




دا جزء تاني 


دا جدارية من شارع محمد محمود ، مسحوا كل الجرافيتي اللي فيه ، وهننزل نرش فيه تاني ان شاء الله لما البلد ترجع حره 



ثورة تاني من جديد ، هنجيبك من قفاك يا شناوي دم بدم ورصاص ب...  دا جرافيتي مبعوت تهديد لشناوي بتاع الامن المركزي اللي ضرب الشباب في عيونهم واللي للأسف اخد براءه وافراج ويتعامل حالياً بكل حرية


بعض الجرافيتيات على الجدار العازل ، ويظهر طبعاً قدامكم مسحهم للكلام باللون البيج والشباب رجعوا يرشوا تاني ، صامدون
" طبعاً في كتير هيسألو .. هما لية سابوا الجدران دي؟؟ مشالوهاش ليه طالمها هما مشيو ؟؟ ، احب اقولك ان هما سابوها علشان لو حصل مواجهات يوم 25 يناير يقدروا يتحكموا في الشباب ويعملولهم مصيدة بكذا طريقة ، وكدا افضل لهم بدل ما يقعدوا يجروا وراهم في الشوارع ، معتقدين ان كدا بيحموا مبنى وزراة الداخلية !


انسى الثورة اللي فاتت .. خالتك سلمية ماتت ، جرافيتية على الجدار العازل 
بعدها "على في سور السجن وعلي ، بكرة الثورة تقوم ما تخلي" .


دا على يمين الشارع وانت قادم من التحرير بعض الجرافيتيات


دي صورة لشارع محمد محمود من عند الجدار العازل ... الشارع بقى اشبه استعداده بحالة حرب



عسكر كاذبون .. وهنا اترش V For Vendetta 

هنا واحد سألني قالي هي وزارة الداخلية فين ؟؟ : قولتله على بعد كيلو من هنا تقريباً ..فرد وقالي مش هي في لاظوغلي؟؟ قولتله ايوة ..قالي وهو هنا مش لاظوغلي ؟؟ قولتله لا لاظوغلي قدام .. قالي امال ليه الحاجات اللي حاطينها دي ؟؟، قولتله اسأل الحكومة هي اللي عارفة وهي اللي فاهمة 


اتصورت جنب يسقط حكم العسكر ، عند الجدار العازل ، وهننتصر ان شاء الله عاجلاً او اجلاً 


متظاهر بمجلس الشعب يرفع لافته ، الراجل دا قالي لازم المرأه تعمل حزب وتنادي بصوتها لأنها مش اقل من الراجل ، ولازم يكون لها مكان في البرلمان 

للأسف الشديد دي صورة محمد محمود ..التحرير كان بكل اسف وشوش الناس مش تبشر بالخير  ، لكن في امل ..
ان النصر قادم لا محالة 
جميع الحقوق محفوظة لمدونة اصحى يا مصر