الخميس، يناير 26، 2012

في ذكرى ثورة 25 يناير ... الثورة مستمرة


يوم من اجمل الايام اللي هنعاصرها في حياتنا ! ، 25 يناير 2012 بقى احلى من اللي فات مليون مرة ، مش عايز اقول عليه احتفالية لأننا لسة وبعد مرور سنة على الثورة مرجعناش حق الشهداء ، قاتلهم حر طليق في مستشفى بغرفة عبارة عن اوضتين وصالة كبيرة تسع من الحبايب الف ، بيروح المحكمة وكأنه بيروح المدرسة كل يوم الصبح بس بطيارة مش باص ، بقالة سنة على كدا وللأسف مفيش اي رد من اي جهة على اي حاجة ! ، ولا حتى اتحكم عليه بأي شئ ، الامر اللي خلانا ننزل بالعدد الكبير دا علشان نعيد امجاد الثورة وننزل نطالب بحق الشهيد اللي حقه هيرجع بإذن الله طول ما في ناس بتطالب .
كنت في مسيرة الزقازيق اللي اتحركت من ميدان المحطة ، واتجهت لموقف المنصورة وبعد كدا على القومية ورجعت تاني لميدان المحطة ، كانت بالفعل مسيرة حاشدة ، لحد ما وقفنا تحت تمثال الزعيم احمد عرابي والشباب هتفوا والكل كان بينادي وراهم ، كان المنظر جميل جداً ،  كنا عاملين زي غرفة عمليات كدا في القهوة وقدرنا نصور عدد كبير من الصور ، كان يوم بالفعل جميل . 
بالنسبة لرأيي في البرلمان انا هكتب بوست منفرد عنه في القريب العاجل بإذن الله - واسيبكم مع الصور


















جميع الحقوق محفوظة لمدونة اصحى يا مصر

الثلاثاء، يناير 24، 2012

جولة في شارع محمود بعد ما شوهوه وشالوا الجرافيتي



شارع محمد محمود طبعاً محدش يقدر ينسى افضالة علينا ايام الثورة .. مأوى للثوار ، جدران مكتوب عليها بالدم ايام الكفاح والثورة ، انكتب عليها ذكريات جميلة وجرافيتيات من الصعب اننا نرجع نرسمها من اول وجديد ، من اول مبنى الجامعة الامريكية لحااااد مكتبة الجامعة ، حتى بمداخل باب اللوق ..! ، للأسف بعد ما حولوه لثكنات عسكرية وبناء جدران عازلة .. ممشيوش الا لما طمسوا كل اللي مكتوب على الجدران .. مسحوا الجرافيتيات .. مسحوا ذكرياتنا وذكريات الثورة .. مسحوا ذكريات الشهداء ، للأسف مكنش فيه ولا جرافيتاية سابوها مما ادى لحرقة دم كبيرة اوي في نفوس البشر واولهم انا .. حسيت كأن الدنيا اتغيرت ..حسيت كأن اخر امل لينا ضاع ، مسحوا كل حاجة في الشارع اللي شرب من دماء الكتير من الشهداء ... ودي الثور اللي انا اخدتها واللقطات اللي قدرت اخدها لكم علشان تشوفوها وتشوفوا هما بعد ما مشيو ومن جبروتهم عملوا ايه علشان يحرقوا دمنا ، مش همهم ان احنا عملنا ثورة وان الجرافيتي دا بيحكي عن الشهداء وايام الكفاح ، مسحوا جرافيتيات الشهداء ، مسحوا كل حاجة ، كنت اتمنى  ان الشكل يكون غير كدا ولكن للأسف .. دا اللي حصل ، الشارع كله بقى مدهون باللون البيج !



دي صورة على يمين ، الشكل يوضح لكم مدى الاذى اللي حصل ، الشباب جابو الاسبراي وكتبوا يسقط المشير والشعب يريد اعدام المشير 


دي على نفس جدارية الجامعة الامريكية مكتوب عليها الثورة مستمرة والمجد للشهداء 


دا الجدار العازل اللي اتبنى بجانب مكتبة الجامعة الامريكية القديمة ، في نفس الشارع .. للأسف محدش تقريبا بقى بيدخل الشارع من عربيات او غيره ، وزي ما انتم شايفين الجرافيتيات مكتوبة على الجدار وبعد ما سابو المكان مش راضيين يشيلوه كمان ! 


صورة اخرى للجدار 

جرافيتي لا للعسكر  على شمال الشارع 


جزء للجرافيتي مكتوب على جدار مكتبة الجامعة الامريكية 


دي بقايا الثكنات العسكرية ويظهر فيها الاسلاك الشائكة اللي اقامها العسكر اثناء مواجهات مجلس الوزراء قبل ما يسيبوها ويرجعوا لحماية وزارة الداخلية




دا جزء تاني 


دا جدارية من شارع محمد محمود ، مسحوا كل الجرافيتي اللي فيه ، وهننزل نرش فيه تاني ان شاء الله لما البلد ترجع حره 



ثورة تاني من جديد ، هنجيبك من قفاك يا شناوي دم بدم ورصاص ب...  دا جرافيتي مبعوت تهديد لشناوي بتاع الامن المركزي اللي ضرب الشباب في عيونهم واللي للأسف اخد براءه وافراج ويتعامل حالياً بكل حرية


بعض الجرافيتيات على الجدار العازل ، ويظهر طبعاً قدامكم مسحهم للكلام باللون البيج والشباب رجعوا يرشوا تاني ، صامدون
" طبعاً في كتير هيسألو .. هما لية سابوا الجدران دي؟؟ مشالوهاش ليه طالمها هما مشيو ؟؟ ، احب اقولك ان هما سابوها علشان لو حصل مواجهات يوم 25 يناير يقدروا يتحكموا في الشباب ويعملولهم مصيدة بكذا طريقة ، وكدا افضل لهم بدل ما يقعدوا يجروا وراهم في الشوارع ، معتقدين ان كدا بيحموا مبنى وزراة الداخلية !


انسى الثورة اللي فاتت .. خالتك سلمية ماتت ، جرافيتية على الجدار العازل 
بعدها "على في سور السجن وعلي ، بكرة الثورة تقوم ما تخلي" .


دا على يمين الشارع وانت قادم من التحرير بعض الجرافيتيات


دي صورة لشارع محمد محمود من عند الجدار العازل ... الشارع بقى اشبه استعداده بحالة حرب



عسكر كاذبون .. وهنا اترش V For Vendetta 

هنا واحد سألني قالي هي وزارة الداخلية فين ؟؟ : قولتله على بعد كيلو من هنا تقريباً ..فرد وقالي مش هي في لاظوغلي؟؟ قولتله ايوة ..قالي وهو هنا مش لاظوغلي ؟؟ قولتله لا لاظوغلي قدام .. قالي امال ليه الحاجات اللي حاطينها دي ؟؟، قولتله اسأل الحكومة هي اللي عارفة وهي اللي فاهمة 


اتصورت جنب يسقط حكم العسكر ، عند الجدار العازل ، وهننتصر ان شاء الله عاجلاً او اجلاً 


متظاهر بمجلس الشعب يرفع لافته ، الراجل دا قالي لازم المرأه تعمل حزب وتنادي بصوتها لأنها مش اقل من الراجل ، ولازم يكون لها مكان في البرلمان 

للأسف الشديد دي صورة محمد محمود ..التحرير كان بكل اسف وشوش الناس مش تبشر بالخير  ، لكن في امل ..
ان النصر قادم لا محالة 
جميع الحقوق محفوظة لمدونة اصحى يا مصر

الاثنين، يناير 16، 2012

لبن العصفور .. كتابي الجديد :)


من عادتي وانا بكتب تدوينة او مشروع جديد ان كان كتاب او رواية او حتى تصميم لأغلفتي بصرف عنهم نظر بعد اخلصهم مباشرة .. بعملهم بقدر بسيط من الحب علشان مفقدهمش اللذة والمتعة اللي هيكونو ملازمين للقارئ .. لكن مش بأكبر قدر من الحب والراحة وكذلك لم افقد فيه "شخصياً بقى" المتعة واللذة الشديدين وانا بكتبه ، كتاب خرجني بره قاعدة المكتب والكومبيوتر والتفكير الوحدوي ، الى الشارع والبراح والخروج الى الكون اللي بنتخم فيه كتير ، استرجعت ايام طفولتي وفلسفتي التي تتميز بالهرتلة المطلقة مع مزيج من الضحك ، استرجعت "سعد نبيهة" اللي كان في اغنية العيد فرحة كنت فاكره اللي بيبيع البلالين ، وكوتشي الاميجو اللي بينور و بيزمر وكنا بنلبسه في نفس العيد .. احيانا كنا بنلبسة قبل العيد ونقف بيه قدام المراية ونطفى النور علشان نشوفه وهو بينور :) ، ومنتجات طاهر القويري اللي مكسبناش منها غير حبنا في الشمعدان ، ثورة اجهزة الووكمان قبل ما يخترعوا الايبود ولما كان بينحط في حزام البنطلون الشارلستون ونازل منه ميدالية المفاتيح بشكل لولبي ، ولا اقلام الليزر اللي كانت بتنزل مع 20 شكل هدية !  ، او العاب الاتاري والملص من الدروس ، مشاكل كتير زي العزوبية والتعليم ..اللي ليها حلول كتير ورغم كدا مبنقدرش نطبقها رغم ان الحلول موجودة قصادنا ،  .. حاجات كتير بنشوف جواها اسرار مش مفهومة ، ومحاولتنا لفهم اي حاجة بطريقتنا ، مش قاصدين نهرتل ولا قاصدين نضحك الكلام كان جد جداً .. مكنتش في على ايامنا نت علشان نقدر نحفر ويا حاجة مش فاهمينها .. لأن المدارس اصلاً مكانوش مديينا فرصة اننا نتكلم عن اللي جوانا ونفهمه ، فبالتالي عملنا نظريات غريبة الشكل والمنطق ، لما تيجي تبص للنظريات دي بتحمد ربنا انه اداك عقل علشان تفكر .. يقوم يجي واحد زي مبارك مثلاً يقفلهولك بترباس ساتنلس ، نظريات لما بتفتكرها دلوقتي بتقول كانت فيييين الايام دي وامتى ترجع .. لأننا فعلاً كنا بنسعى جاهدين لتحقيق مفهومنا ، نظريات عملناها علشان نقدر نصدق الشئ اللي جوانا ، زي الجواز والطلاق .. والحب والعواطف .. ولبن العصفور ! .


انتهيت من لبن العصفور في 2011 ، وان شاء الله اول انطلاقة ليه في معرض الكتاب 2012 ، في انظاركم وانتظار اراءكم واحب اقولكم ان الكتاب مختلف تماما عن الراجل اللي واقف ورا الكتاب بغض النظر عن الافكار .. فهو مختلف في التناول وترتيب المواضيع عموماً ، تقدروا تقولوا حاجة جديدة من كافة الطرق ، كتاب اجتماعي ساخر بيحكي عن المجتمع المصري بكافة اساليبة واختراعاته وفئاته ، لو انت مخنوق بجد من فئه معينة من الشعل او حد معين من الشعب او الشعب نفسه .. هات الكتاب واقراه وانا بوعدك انك هتطفي غليلك كله .. لأني مسبتش حد في الكتاب الا لما اديته فرصة كبيرة يعبر عن نفسه ، زي سواقين الميكروباصات ، والتاكسي ، واصحابك اللي لسة متجوزوش ، وبالنسبة للبنات ليهم برده سيكشن كبير جواه ، متقلقوش مش ناسيكم .. افتحوا البرومو اللي تحت دا  :))

وفي النهاية دا برومو الكتاب ، بيحكي عن بعض الحاجات اللي مكتوبة في الكتاب واللي هي اساها عن البنات ، البرومو انا هعمله في بوست خاص بيه المرة الجاية علشان اقدر اشرحه بوضوح ، مع بعض المقتطفات الهامة اللي جوا الكتاب (قراءه بسيطة) وان شاء الله يارب ياعجبكم
جميع الحقوق محفوظة لمدونة اصحى يا مصر

الثلاثاء، يناير 10، 2012

تعالوا نتعلم الجرافيتي ... ونثور على الجدران - جزء اول

ازيكم يا شباب ..
طبعاً التدوينة جت بمبادرة من كل من زعيم القلة المندسة عبدلله مرجان ، وعمو حسام .. وبصراحة انا دورت على تدوينات كتير بتحاول تشرح اصول الجرافيتي للأسف ملقتش اي حاجة تقدر تخلي الناس تتعلمه لا من قريب ولا من بعيد .. فقررت اشرح لكم الطرق اللذيذة اللي منها نقدر نعمل جرافيتي من الألف للياء وبطريقة سهلة وسريعة .

خلي بالك ان الجرافيتي فن ومش تخريب وهو افضل طريقة للتعبير عن شعورك تجاه موقف اجتماعي معين وزي ما انتم عارفين اغلب مواقفنا المنيلة بنيلة بنعبر عنها يابلشتيمة او البسب .. جه الوقت اننا نعبر عن اللي جوانا بجد بقى :) ، وان شاء الله معايا هتقدر تعرف كل خطوات وطرق عمل الجرافيتي بجميع انواعه حتى لو مكنتش بتعرف ترسم .. ازاي تقدر تعمل جرافيتي جميل وفي نفس الوقت يمثل وجهة حضارية .
نبتدي بالطرق .. اول طريقة وهي اسهلهم اسمها الطباعة او التفريغ :
بتعمل ايه الطباعة ولا التفريغ دي ؟؟ ، دي يا سيدي عبارة اننا بنستخدم ادوات لرش شريحة معينة مفروغ منها حروف كلمات انت بتصممها وبتختارها .. وطبعاً هتسألني سؤال ..ودي بتيجي ازاي ؟؟
بص يا سيدي الموضوع سهل اوي .. الحكاية كلها ان لازم يكون معانا الاول شوية ادوات وبعد كدا نبتدي نصمم .. والادوات دي بتكون :
1- ورق مقوى .. ودا ممكن نشتريه الفرخ ب 2 جنيه تقريباً من اي مكتبة 
2- سبراي رش اللوان .. ودا ممكن نشترية من اي محل حدايد وبويات ب 7 جنيه الواحدة 
3- كتر (CUTTER)  لقطع الشرائح وتحديدها 
5-برنامج كلك ممكن تحمله بالضغط هنا
6- برنامج فوتوشوب
7- طباعة كومبيوتر
الشغل بقى .. بينقسم لقسمين : 
1- تصميم كلام 
2- تصميم اشخاص 

نبتدي بأول واحد .. تصميم الكلام ، تابع الصور 
الخطوة الاولى : اكتب الكلام اللي انت عايزه يكون في الجرافيتي ، انا مثلاً كتبت اسم المدونة "اصحي يا مصر" ، وعملته بالشكل اللي انتم شايفينه دا بإستخدام برنامج الكلك .. ممكن لو مش بتفهم في برنامج الكلك تستخدم الفوتوشوب او اي برامج اخرى تقدر تعملك شكل زي الكلمة دي ، بس انا بفضل الكلك لإنه يقدر يعمل اشكال جميلة جداً تقريباً اغلب الجرافيتيات اللي بتشوفوها بتكون معمولة بيه ، في فونتات برده موجودة على الفوتوشوب تقدر تعمل بيها الجرافيتي وتصممه بمزاجك .

الخطوة التانية : خلاص بعد ما عملت الأسم وظبتطه تمام ، لازم نخرجه لونين ليس ثالث لهما ، وهو الابيض والاسود .. وزي ما انتم شايفين الجزء اللي هيتفرغ مكتوب بالاسود (اللي هو الاسم يعني) بينما باقي الصفحة بيضة ، .. نطبعة بقى عند اقرب مطبعة ، ياريت يكون بالحجم الكبير علشان نقدر نقصة على الفرح بسهولة ومن غير ضرر ..، وبعد ما نطبعة عند اقرب مطبعة ليك نروح حاطينه على الفرخ الورق المقوى ونبتدي بالكتر (Cutter) اننا نقص واحدة واحدة الاسم المكتوب بالأسود ..وهيبقى عندنا الفراغ الابيض بس وهو دا المهم عندنا ..وبنسميه (الشريحة) .

الخطوة التالتة : بعد ما قصينها الشريحة وصبحت جاهزة .. نقدر دلوقتي نحطها على الجدار اللي احنا عايزين نعمل عليه الجرافيتي ، وهتطلع بالشكل اللي موجود في الصورة تحت دا ، بحيث الفارغ هو الاسم والباقي هو الفرخ المقوى ، هنلزقه على الحيطة بأي بكرة لزق معاك علشان مش يضايقك وانت بترش بالبخاخ .


الخطوة الرابعة : هتبتدي عملية الرش ، وحاول انك تملى كل الفراغات بلون البخاخ ومتحاولش تخطى الحاجز الابيض علشان الجرافيتهاية تطلع تمام ، ابدء رش واستمتع بالرش وحاول تحط كمامة علشان ريحة الاسبراي بتعمل احياناً حساسية وربو .. انا عارف اننا متعودين على الاسخم منها والسي ار والدموع لكن برده مش هيبقى الاسبراي والعسكر :)) .


الخطوة الخامسة : خلاص يا معلم كدا .. شيل بقى ام الورقة خالص واتفرج .. شوف الفن بتاعك وشوف انت عملت ايه ، اهيه احلى جرافيتي على الحيطة بأيدك .. وانت اللي مصممة وعامله كمان ، الله ينور :)



القسم التاني : تصميم الاشخاص

نيجي للقسم التاني والغلس شوية ، بس مش غلس علينا طبعاً هههههههههه ، مادام هنستعين بثائرين يبقى بعون الله مش صعب ، المهم انك تركز فيه جامد وهو شبيه باللي قبله اوي والفرق واحد وبسيط ، بس انت لو عامل كباية شاي فليا رجاء عندك اعمل كباية كمان لأن واحدة مش هتنفع :))

طبعاً انا اخترت لكم الشخصية اللي هنعملها الجرافيتي وهي صورة البطل الجميل احمد حرارة :) 
الخطوة الأولى :  طبعاً هنحاول نخلي الصورة لونين ، كتير منكم هيسألني ازاي ؟ ..الموضوع بسيط جداً وهو بيعتمد على الفوتوشوب ، نفتح برنامج الفوتوشوب وبعد كدا نجيب صورة البطل ... ونتأكد تماماً ان البرنامج بيعتمد على اللونين الاسود والابيض كما موضح على شمال الصورة ، وبعدين نختار من قايمة Filter تالت اختيار وهو Filter Gallery وهيفتح لنا مربع كبير زي اللي في الصورة تحت دا ، نبتدي نحدد وجه البطل من خلال الاوبشنات اللي متعلم عليها بالأحمر ، بحيث اننا نتجنب الندبات السوداء ونخليها صافية كدا زي ماهي طالعة في الصورة



الخطوة الثانية : بعد ما ظبطنا صورة البطل ، كدا يبقى مش قدامنا غير الخطوات القديمة بتاعت الاستايل اللي فات ..  نبتدي نقص الاسود ونسيب الابيض ..ونفرغ الرسمة اللي تحت دي بعد ما طلعناها بالفوتوشوب ، وبعدها نحطها على الجدار بسهولة جداً
الخطوة الثالثة : وزي ما عملنا المرة اللي فاتت .. هنلزق الصورة بأي لازق على الجدار ونثبتها كويس جداً علشان نجيب البخاخ ونبخ كويس عليها .. وبرده علشان متقعش مننا واحنا بنرش .


الخطوة الرابعة : هنرش الصورة .. انا شخصياً اخترت اللون الاسود .. وزي ما انتم شايفين في الصورة تحت اهوة ابتديت ارشها بالأسود ومحاولتش اخترق الحاجز الابيض علشان تطلع حلوة زي ما اتعلمنا في الدرس اللي فات .



الخطوة الخامسة : مبروك عليك الجرافيتي يا معلم ... وتحيا الثورة 


وبكدا انتهينا من اول جزء ، وهو التفريغ او الطباعة زي ما بيسموها الفنانين التشكيليين ، المرة الجاية هنبتدي في التقيل بقى .. عايزك تحضر كباية النسكافيه لأنه هيبقى فيه رغي كتير ... اشوفكم في الجزء التاني ان شاء الله ..تحياتي :)

جميع الحقوق محفوظة لمدونة اصحى يا مصر