ِAdventure Time من وجهة نظر مختلفة

بقالي فترة طويلة جداً مبفتحش التلفزيون ، بالنسبالي مضيعة للوقت في اشياء تافهه ، شاء القدر اني اتابع - بحكم شغلي - بعض القنوات الكرتونية علشان اقدر استلهم منها اساليب جديدة في الرسم ، كان النصيب الاكبر من القنوات دي هي كارتون نت ورك .

من فترة طويلة - ربما عشر سنين - اعلنت كارتون نت ورك اصدار “وقت المغامرة” اللي كان ساعتها استوديو “ فريديراتور ستوديوز” اللي بينتج وقت المغامرة متفق مع نكلودجن بس متمش الاتفاق مش عارف ليه ، وقررت كارتون نت ورك شراءه عرض الحلقات من خلالها وحققت نسبة نجاح رما تصل للخيالية ، دا بسبب حاجات كتير اهمها : 

اصل القصة :

القصة ابعد كتير جداً عن مجال تفكير اي حد ، بما اني بقالي فترة مهتم بالحاجات ال  post apocalyptic او الانتاجات السينمائية لأحداث قبل او اثناء او بعد نهاية العالم ، يعتبر وقت المغامرة هو اهم برنامج رسوم متحركة أنتج للحديث عن ما بعد فناء البشرية في شكل كرتوني ، ومهما بلغت المعاني في تعقيدها قدر المؤلف انه يوظفها بطرق سهلة وبسيطة للجمهور .. ، استلهم مؤلف القصة “بندليتون وارد ” اربع عناصر اساسية : الحلوى ، النار ، الجليد ، الطين .. من وجهة نظري هم على غرار الاربع عناصر اللي كان بيستخدمها ال Illuminati او المتنورين في السر “راجع رواية ملايكة وشياطين لدان براون او اتفرج على الفيلم احسن” ، كل عنصر من العناصر دي كانت محفوظة في هيئة اشخاص كانت من ضمن قواهم الاساسية قبل تدمير العالم من خلال حرب نووية سميت بأسم “حرب الفطر العالمية” ، قدرت العناصر تتحكم بعد هلاك الارض وكونت مملكات ، مملكة الجليد والنار والحلوى والطين ، اثرت الصواريخ النووية في قطعة ما في الكوكب لدرجة انها كلت جزء كبير منه اتسمى بعد كدا مملكة أرض اووو  ooo ، والسحر هو سيد المكان ، ظهور عدد من الاكوان الموازية وكذلك ظهور كائنات فضائية بتسكن منطقة اسمها lumpy space  او الفضاء الوعر ، وكانت مملكة .. خلينا نتفق ان اي حاجة ممكن تدور في خيالك فهي ممكن تكون مملكة في ارض اوو ، يعني في مملكة اسمها مملكة الصناديق ، المسامير ، حتى السجق ليه مملكة.

الطفل البشري الناجي الوحيد اسمه “فين” وهو البطل ، ومعاه كلب صغير اسمه “جيك” ، كلب سحري بيقدر يحول جسمه لأي شئ كان ، وباقي الابطال هم امراء او ممالك ، زي ملك الجيد ، اميرة الفضاء الوعر ، اميرة النار ، ملكة العلكة”الحلوى” 

الاحدث :

اثرت الصواريخ النووية في قطعة ما في الكوكب لدرجة انها كلت جزء كبير منه اتسمى بعد كدا مملكة أرض اووو  ooo 

بتدور الاحداث في سياق منفصل مش متصل ، مش متسلسل ، يعني كل حلقة ليها حكاية وفي ربط بين الاحداث بيحصل احياناً ، المشكلة ان الكرتون يبان خارجه كوميدي لطيف لكن مخلوط بواقعية مخيفة في داخلة ، ودا الخط الفاصل بين العمل المبدع والعمل العادي ، يعني مظاهر الارض بعد الدمار حقيقية وواقعية جدا ، بقايا صواريخ ، مباني بشرية تحت المحيط ، دبابات وآليات عسكرية في اشارة لسبب الحرب في الخلفية ، وشخصيات عايشة في العالم دا ومتأثرة بيه عادي ، اغلب الرسوم المتحركة المخصصة للأطفال كانت خلفياتها الخارجية عبارة عن شجر وحدائق والوان مبهجة ـ وقت المغامرة كان مختلف شوية ، حيث ان في خلفيات كتير بتوضح بصور مختلفة حجم الدمار اللي تسبب فيه البشر سواء بإستخدام مشاهد سوداوية او لا لكن مبيخرجش عن سياق الالوان المبهجة برضه عدا كام مشهد .

ننهي التكست لحد هنا ونكمل في يوم تاني لحكاية باقي التفاصيل 

نستقبل الاراء من خلال تويتر