الخميس، أبريل 09، 2009

طرووق5 : انا والحرنكش

فى البداية احب اشكركم كلكم على تعليقاتكم الجميلة اللى فاتت ، ومع ان الاخت ايناس والاخت نوارة مرروا ليا التاج ، فمن ناحييتى سأجاوب على كل الاسئلة طبعاً لأنى مقدرش ارفضلكم طلب ، فى بوست بإذن الله عن قريب ، وبالمرة تحتفلوا معايا بعيد ميلاد المدونة ، وبتأسف على التأخير



اههههههههههههههه دا الحوار كبير ،كنت قاعد انا وماما فى ساعة صفا ، وكل واحد فينا فى حالة انشكاح تامة ، وكل واحد فينا بيمرمط اللى فى قلبه للتانى ، طبعاً
من خلال ساعة الصفا دى عرفت منها معلومات تودى فى داهية ، ا امى طيبة وبتحب تدردح وتطلع اللى فى قلبها مع اى حد وحصل كدة
ام طروووق :معلشى ياطروووق يا حبيبى اصل طنطك شادية معدتش عليا ، الولية كانت مديانى معاد الساعة اربعة علشان ننزل نعمل
طرووق : ههههههه ، اومى بقت مودرن يا جدعان ، دانتوا اخركوا سوق التلات يا ماما وترجعوا ، شوبنج ايه
ام طرووق : اختشى يا ولا على
طروووق : صحيح يا ماما هو بابا زعلك كام مرة؟
ام طرووق : ههههه ، ابوك ياولا غلبان ، قصدك انا اللى بزعله ، اصله حب يعيش دور "سى السيد" وقولتله انى مش واكل عليا دور "
امينة"خالص يا صبحى ، مصدقش ، فجأة لاقيته راح قايللى روحى عند امك

طروووق: وعملتى ايه بعديها يا ماما؟
ام طروووق: جبتله خيلانك كلهم وستك وقعدوله فى الشقه لحد ما زهق وساب البيت
طرووق : ورجع ازاى؟
ام طرووق : مش قلتلك ابوك غلبان ،رجع فى ثانية اتأسفلى
طرووق : ههه إن كيدهن عظيم
ام طروق : انت بتقوووووووول ايه ياولالالا؟.
طرووق : بقول انتى صح والله العظيم
ام طرووق:اه بحسب
طرووق : ماما ...انا ليه ساعات بحس انك مش بتحبينى؟
ام طرووق : لصلك اهبل زى ابوك
طرووق : ماما فكك منى بقى وقوليلى هتطبخيلنا ايه النهارضة؟
ام طرووق : شوفت الواد اللى ينشك فى قلبه ،فكك ايه ياولا ، طب وحياة ابوك منا طبخالك حاجة ، كولو ف نفسيكم بقى انتوا الجوز
طرووق : ماشى يا ماما مفيش مشاكل
الموبايل رن على اغنية : كايدة العزال انا من يومى ، الاغنية اللى ام طرووق مخصصاها لطنط شادية
ام طرووق : استنى يا ولا الوليه الهبلة فاكرة ترن عليا دلوقت ، شكلك هتاكل النهارضة يا منيل ، استنى ارد عليه
اوبعد ما طنط شادية قعدت ترن ، ام طرووق بقى فين وفيييييين لما افتكرت ان الزرار الاخضر اللى فيه التليفون هو اللى بيفتح على المتصل
وبعد كدة ردت عليها : ايه ياشادية الله ، افضل مستنياكى دا كله ؟ ، الواد طرووق مطفحش حاجة من صباحية ربنا ، يلا ياختى بقى علشان
ننزل نروح نجيب الحاجة
وبعد ما ام طرووق وطنط شادية اتفقوا على ميعاد ينزلوا يتقابلوا فيه ،
طرووووق : ولله امى دى حنينة يا جدعان ههههههههه

قعد طرووووق يحلم ..هى ماما هتجيبلى ايه ؟ ، اكيد فرخة ، لا لا لا ، اكيد اتنين كيلو لحمة وتعمل معاهم محشى يااااااااه ، او ممكن تعمل
شوية اكل حلمنتيشى بتوعها .. ليه بس ياماما تسيبى عصافير بطنى لحد ما فتحت صالة دسكو فى بطنى؟؟ هو لازم شوية غلاسة؟؟
مفيش دقيقتين عدوا وجرز الباب دق
طرووووق : ايه السرعة دى ....اشطة
فتح طرووق الباب .. وللأسف لقى قدامه طفل
الطفل : انت طرووق ؟؟
طرووق : اه
الطفل : طز فيك
طرووق : انتا مين يا حبيبى ؟
الطفل : متدخلش فلى ملكش فيه
طروووق: انتا عيل لمض اوى ، متقول انتا مين؟
الطفل : انتا بتزعل من الهزار؟
طروووق: لا ياعم
الطفل : يبقى معندكش دم
طروووق : ولاااااااااااااااااااا مش ناقصاااك
وراح قافل طرووق الباب فى وش الطفل اللمض ، وطبعاً علشان الطفل لمض راح ضارب الجرز تانى
الطفل : ايه ياعم طرووق ، متدخلنى واعملنا كوبايتين شاى دانا جايلك بخصوص ابلة جىجى
طرووق : مالها جىجى؟
الطفل:بتقولك متتصلش النهارضة وبطل سهتنه ووجع دماغ
:غووووووور ياض من وشششششششى
وراح قافل طرووق البابوراح الجرز ر تانى ، ولما فتح طرووق
طرووق : انتا اصلاً كيس زبالة ياا.......... يا...........يا......
المشكلة ان اللى كان على باب هى مامته
.ام طرووق : انتا بتشتم مين ياولااااا
طرووق: ايه انا اسف يا ماما ، اسف بجد ، ها هتعمليلنا ايه النهارضة؟
ام طرووق : حرنــــكش
طروووق : نعم ياااااااااختى؟
ام طرووق : مالك يا ولا فى ايه ؟
طرووق: يعنى كل دا ياماما ، والشوبنج ، وشادية ، والأكل ، وفى الاخر حرنكش
ام طرووق : مالك ياولا في ايه لم لسانك لحسن اقطعــــــ
ـطرووق: متكمليش ، وحياة تيتا يا شيخة منتى مكملة ، خلاص انا سايبلكم البيت وهطفح برة

هناك 27 تعليقًا:

  1. هييييييييييييييييييه

    اووووووول تعللللللليق

    الحمد لله على سلامتك يا اسلاموووو

    هقرأ وراجعة عطووووول

    سي يو

    ردحذف
  2. حمد الله على سلامتك يااسلام
    اجمل مافى البوست بقى الواد اللمض ده
    والله عسسسسسل
    عجبتنى لماضته قوى
    ههههههههههههههههه
    تسلم ايدك

    ردحذف
  3. هههههههههههه
    هههههههههههه

    ياعيني عليك كل الانتظار دا بالاخر جيبالك حرنكش تصدق بقى انا مكنتش عارفة الحرنكش دا يبقى ايه بس بحثت عنه ولما شفت صورته عرفته

    عندنا بنسميه حاجة تانية خالص

    البوست جاااامد اوي كالعادة

    بس صغنووون المرة الجاية عاوزين عشر صفحات عشان نضحك للصبح

    منتظرينك ترد على اسئلة التاج

    وكل سنة وانت طيب و مدونتك ملعلعة علطول ههههههههه

    ربنا يوفقك

    ردحذف
  4. ههههههههههههههه
    يعينى عليك يا طرووووووق

    ده انا كنت سامعة العصافير بتصرخ مش بتصوصو
    ههههههههههههههه

    مقدرة احساسه قوى
    بس مامته دى فالجر اوى .. ياااااى
    ههههههههههههههههههه

    خالص ودى
    سالى

    ردحذف
  5. السلام عليكم يا سمسم
    وكل سنة ومدونتك بخير وسلامة وضحك واشراق
    علي فكرة الولد ده واكل ياناس
    حد مديله رشوة
    عشان يزعل طرووق كدة

    ردحذف
  6. قبل الكلام نبتدى بالسلام السلام عليكم ورحمة الله وبركاته
    ألف سلامة عليك والحمد لله انك رجعت بألف سلامة
    بجد مدونتك هايلة جدا أنا تابعت البوست اللى فات طبعا مع قراءة كل البوستات اللى فاتت بجد هايلة هايلة بصراحة الدم خفيف بجد استمر على كده

    وكل سنة وانت طيب ومدونتك بخير وفيها حاجات هايلة كتيييييييير

    تقبل مرورى

    ردحذف
  7. يا طارووق
    يا طارووق
    خلى بالك من كتر اللماضه دى ؟
    اسمع الكلام واسكت ؟
    دى نصيحه يا مان

    ردحذف
  8. هو مين بس اللي لمض ؟؟؟
    العيل الصغير والا طرووووق؟؟؟؟؟

    ده العيل ده أكيد طروووق نفسه وهو صغير

    ده عقله الباطن هو اللي خبط عليه ومامته مش موجوده

    عشان كده جابتله حرنكش ... العيال الصغيرين بيحبوه

    ردحذف
  9. حمدلله على سلامتك يا اسلام
    _____________
    هههههههههه البوست دمه خفيف كا العادة
    بس ليه جى جى تفاريح قلبت كده على طروق هههههههه
    والواد الصغير ده دمه زى العسل

    حمدلله على سلامتك
    سلاااااااااااام

    ردحذف
  10. ههههههههههههه
    يا عيني يا طروووق
    انت جعان للدرجة ديه
    امي شايلة في الثلاجة طبق فاصوليا خضرا بايت من اسبوع
    اجيبهولك واجي علي طول
    اصل طارق ده اسم الغالي اخويا الصغير حتي اسأل"بسمة صلاح"
    ومش حستخسر فيك حاجة
    وكل ده كوم والواد اللمض كوم تاني
    الا هو عرف جي جي منين
    لا مينفعش
    اعرف الحوار ده
    وقولنا عليه
    ماشي
    سلام

    ردحذف
  11. طرووووووووووق يا جاااااااااامد عجبتنى حلقة خروجة جى جى جداااااااا يا طروق انت مبدع قصدى يا سمسم

    ردحذف
  12. السلام عليكم
    هو الحرنكش ده اكل ؟؟؟؟ يعنى اكل غدى ؟؟
    بصراحه ماما طرووق ليئه عليه؟؟
    شفاك الله وعفاك

    ردحذف
  13. العجبنى غير طنط ام طروووقه الكووول الواد اللمض ده بس يبقه مين ؟؟ اخو جيجي ولا عيل رخم من الشارع

    بس حلوة

    وكل سنه ومدونتك جميله وطروقه معانا

    يعيش طرووووقه يعيش يعيش مش بالله عليك ينفع رايس جمهوريه هو وشعره ده

    كفايه رغى
    ياله سلام

    ردحذف
  14. لا حلقة جميلة يا إسلام

    بس هو الحرنكش بقي أكلة :(

    أنا أخر حاجة سمعتها عنه انه كان فاكهة

    وغير معترف بيها كمان :D

    ليه حق ياكل برا

    ****************

    لا بجد حلقة جميلة تحياتى ليك ,,

    ردحذف
  15. حمدا لله عالسلامه الاول ..

    وبعدين يا اخي مالة الحرنكش ...

    احسن حاجه عملتها هي الاكل بره ..

    سيبك انت .. هما لازم يتعبونا لحد ما نشوف طبق المحشي مع فرخة ولا الاتنين كيلو لحمة ... وشوية طحينة وشوربة والذي منه ...

    تسلم عالبوست الظريف يا طروووووووووووق ... :)

    ردحذف
  16. كل سنه وانتى طيبه يامدونه وكده اشوفك فى تألق جامد وموجوده انتى وطروووووووق اللى بموت فيه العسل ده
    هههههههههههههههههههههه
    الله على الحرنكش انا بمووت فيه كده

    طروووق : نعم ياااااااااختى؟
    ام طرووق : مالك يا ولا فى ايه ؟
    طرووق: يعنى كل دا ياماما ، والشوبنج ، وشادية ، والأكل ، وفى الاخر حرنكش
    ام طرووق : مالك ياولا في ايه لم لسانك لحسن اقطعــــــ
    ـطرووق: متكمليش ، وحياة تيتا يا شيخة منتى مكملة ، خلاص انا سايبلكم البيت وهطفح برة
    هههههههههههههههههههه
    فى الاخر ياطروق طلع حرنكش
    ياعينى عليك بعد ما حلمت بالذى منه يطلع
    حرنكش
    ههههههههههههههههههههه
    لك حبى واحترامى الكبير يا اسلام
    وربنا يشفيك يارب ويسعدك
    تقبل تحياتى
    إيناس

    ردحذف
  17. حرنكش اخرة الحكاية ههههههههههه طب والله بحبو مش عندك شوية يا اسلام يسلم قلمك الساخر

    ردحذف
  18. ههههههههههههههههههههههههههههه

    بجد البوست تحفففففففففففة
    كنت عاوزة أقولك الاول حمدلله على سلامتك و سلامة طروق من العلقة اياها

    بس ماقدرتش امسك نفسى من الضحك
    هههههههههههههههههههههههههههههه



    طروووق دا طلع طيب اوى
    حتى مش قادر على الطفل اللمض


    بس الست الحاجة مامته عملت فيه مقلب بردوا
    طلعت جامدة اوى يعنى



    يسلم قلمك
    و ريشتك


    و فى انتظار التاج


    و مبرووووووووووووك مقدما ميلاد المدونة
    و دايما بمزيد من التوفيق



    دمت بود

    ردحذف
  19. هههههههههههههههه
    بعد كل ده ويا حرام هتاكلهم حرنكش
    صعبان عليا خاااالص
    ...ز
    ولا بجد الولد الي جاي من طرف جيجي ده
    كارثه بجد

    تسلم ايدك
    وتحياتي لك

    ردحذف
  20. ههههههههههههههههههههههههههههههههههههههههههههههههههههههههههههههههههههه

    لا بجد
    عيل فقرى يا اسلام

    ولا الواد الصغير بجد خلانى فطست على نفسى من الضحك

    ردحذف
  21. السلام عليكم / يعنى مامته عملت كل الاتصالات دى على شوية حرنكش :):)
    حمداً لله ع السلامه ننتظر تشريفك .

    ردحذف
  22. عزيزى اسلام

    ياسلام على الحرنكش وانت شارية ويكون زى الوردة كدة وتفضل تاكل ويكون وحدة مزة ووحدة مسكرة الله جميل والله بس مش للغدى خلية للعشى

    بوستك يجنن تسلم ايدك تحياتى

    ردحذف
  23. وايه الحرنكش دا بقى
    يعني حاجه قد القيمه يالا ياطرووووووووق ولا لا؟
    ههههههههههههههههههههه
    لزيز انت ياواد
    يلا روح كل حرنكش
    سلاموز
    خليني اسلم على استاذ اسلام اللي شكله زعلان
    اخبارك ايه يا استاذ يارب تكون بخير

    ردحذف
  24. أخى فى الاسلام والدين والاخلاق والعفه أسرع وأحذف معدومه الاخلاق والعفه من مدونتك حتى لاتشارك فى الاثم وانصحك ألا تفتحها حسبنا الله ونعم الوكيل
    tovisitmy
    jennifer
    :
    اسرع أخى

    ردحذف
  25. أخى فى الاسلام والدين والاخلاق والعفه أسرع وأحذف معدومه الاخلاق والعفه من مدونتك حتى لاتشارك فى الاثم وانصحك لن تفتحها حسب الله ونعم الوكيل
    tovisitmy
    jennifer
    :
    اسرع أخى فى حذفها من التدوينة السابقة

    ردحذف
  26. حمد الله علي السلامه
    طرووق ده مش جايبها البر

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم