الثلاثاء، أبريل 28، 2009

طرووق 7 : طرووق المزنووق



ولله يا جدعان انا معنت عارف اعيش فى البيت دا ، حرام اوى بجد اللى بيحصلى ، اقعد اذاكر ينشقت فى وشى جزمة ، اقعد العب يوجا ينشقط فى وشى جزمة تانية برضة ، طب بدل ما يخلفونى كانوا جابو جزامة ، بدل منا شغال مصد للجزم كدة ، اعمل ايه انا بس علشان ارضيك ياعم صبحى ؟؟؟؟؟؟؟؟ اعمل ايه علشان ارضيك بس انت والست اللى قعدة جمبك تتفرج على الاعلانات اللى كرفت دماغها .
مش عارف بيعملو فيا كدة ليه ، ولما دخلت المطبخ علشان هموت من الجوع الاقى المطبخ كلللللللة مليان مية وعمال اغوص فيها
طرووق : ياماما متجيبى اى حاجة اعمل بيها البلاط الملزق دا
ام طرووق : منا هجيب يا ولا الشرشوبة اللهلوبة اللى بيعلنوا عنها فى التلفزيون
طرووق : لهلوبة ايه ...مش قلتلكم ، الاعلانات لحست دماغها .
ام طرووق : متقلقش مش هتلاقى اى حاجة تطفحها
طرووق : ههههه انتى بتفهمى على طول كدة؟
ام طرووق : مهو يا عبيط سألتك من شوية تاكل ايه وانت مردتش
طرووق : يبقى اكيد كنتى بتوشوشى نفسك لأنى مسمعتش
ام طرووق : مش تناغشنى ياولا ... قولتلك مفيش اكل يبقى مفيش اكل
طرووق : ياااااااارب هنفضل فى المجاعة دى لحد امتى بس يااارب؟
ام طرووق : بتبرطم بتقول ايه يا واد
طرووق : مفيش يا ماما
نزل طرووق علشان يقابل صحابة والشلة الفسدانة , ولما قابلهم اقنعوة انهم هيعملوا بطولة فى البلاى ستيشن , واللى هياخدها هيكسب 200 جنيه عداً ونقداً ، وصاحبنا مكدبش خبر ، طلع معاهم وحجز مكان فى البطولة ، وبدأ يلعب
طرووق : ليه بس كدة لييييييييه بس كدة ، انت راشى الحكم دا يا زيزو ولا ايه؟؟
زيزو : هرشى الحكم ازاى ياغبى ؟؟
وفـــجــــأة
طرووق مع نفسه : لييييه بس كدة؟؟...محنا كنا فى البيت .
طرووق قعد يسايس نفسه كتير ، وكل شوية الازمة بتشد ، وطبعاً لو خسر هيخسر ال 20 جنيه والبطولة .
زيزو : مالك يا طروق بتتهز كدة ليه؟؟



طرووق : ملكش دعوة يا زيزو خلينا فى الماتش .
زيزو : يابنى لو فى نفسك حاجة اطع على بيتكو .. مفيش بيت راحة هنا .
طرووق : ياعم هو انا قولتلك انى متأزم ..كمل لعب
زيزو : شكلك يا طرووق واكل اكلة هنية من ايد الحاجة .
طرووق : ههه منجيلكش فى حاجة وحشة .
الأزمة اشدت اوى ، والأخ مستحملش .. راح قايم وجارى
زيزو :ايه يابنى مالك؟؟
طرووق : مفيييييييش ، سلام دلوقتى علشان منفجرش
زيزو : البطولة هضيع عليك يا صحبى ، يلا المرة الجاية بقى
طرووق : يخربيت معرفتك انت والعيال دى
ولما صاحبنا وصل البيت ، ودخل بيت الراحة ، طبعاً بعد نصاص الليالى
طرووق : يا سلام ، الواحد كااااااااان فين وبقى فييييييين ، فعلاً اعز اللحظات
للأسف الحج صحى ولقاه
ابو طرووق : فاستترو .... فاستترو يا خويا ، كنت فين ياض الساعات دى كلها؟
طرووق: يابابا كنت قافل الباب ولله
طرووق : كنت مع صحابى يا بابا
ابو طرووق : وصحابك دول هيفيدوك بأيه يا لا ؟
ولسة طرووق بيرد ، لقى اول جزمة ....
طرووق : اجــــــــــــــــــــــــرى






فى مدونة سيمفونية الحب الجميل

لأجل الحب..نتصدى النزاع ، أعلان عن حالة حب من مدونة زميلتنا ياريت كلنا نروح نباركلها

جميع الحقوق محفوظة لمدونة اصحى يا مصر

هناك 36 تعليقًا:

  1. أ الحق اول تعليق وده طبعآ من حقى أكون الاولى
    ههههههههههههههههههه

    ردحذف
  2. ههههههههههههههه
    حلوة قوووى طروووووق المزنوووووق دى يا غسلام
    الله يخربيت عقلك يا طررروووق
    طرووق : فاستترو .... فاستترو يا خويا ، كنت فين ياض الساعات دى كلها؟طرووق: يابابا كنت قافل الباب ولله طرووق : كنت مع صحابى يا بابا ابو طرووق : وصحابك دول هيفيدوك بأيه يا لا ؟ ولسة طرووق بيرد ، لقى اول جزمة ....طرووق : اجــــــــــــــــــــــــرى

    هههههههههههههههههه
    عسل والله ياسلام جامده
    طررروق ده بجد بعيش معاه وبحس ان موجود بالفعل
    حسيته قووى وعشته
    بكل شىء
    يارب يسعدك يا إسلام
    ويارب دايمآ
    أكون عند حسن ظنك
    ويارب ما يحرمنى منك أبدآ أنت وحبيبى
    إيناس

    ردحذف
  3. أحترامى الكبير ليك يا إسلام
    الصور هايله قوووى
    برافو عليك
    ياريت ما تحرمناش متعة القرءه لك ايها المبدع
    المتألق
    بحبك قووى
    إيناس

    ردحذف
  4. اسلام
    السلام عليكم ورحمة الله وبركاته
    اهلااوي يا حبيب قلبي
    انا اهلااوي للنخاااااااااااااااااااااااااااااااااااااااااااااااع
    صور روعة بجد
    والله ضحكتني يا اسلام
    فكرتني بي ابويا الله يرحمة
    كان فاكرني الحضري باين
    بس ابويا مكنش مقتصر علي تصويب
    اهداف بالجزم لالا وكوبايات واطباق
    اي شي قريب من ايدة يسجل بيها
    اهداف في نفوخي
    ههههههههههههههههه
    تحياتي
    وتقبل مروري
    واسمحلي انشل منك
    طابع الاهلي احطة في مدونتي

    ردحذف
  5. لا عندك حق
    الجزامه احسن من البهدله دى

    اروح بقى اشوف البوست التانى ايه حكايته

    ردحذف
  6. والله يا اسلام طرووووووق ده بيقطع قلبى صعبان عليا جدا
    بجد دى فعلا بهدله ومش اى بهدله

    طرووووووق:

    اهانات وساكت ....شتيمه وساكت ...
    وجزم كمان... لاء بقى حرام كده ده
    كتير .كتير اوى انا اظاهر اتساهلت مع العيله دى:

    جميله بوستات طروق اوى
    بجد تسلم ايدك

    عاشقه الاحزان
    جوجو

    ردحذف
  7. صديقى الفنان
    السلام عليكم
    ينفع كدة يا جماعة الراجل يتبهدل كدة شتيمة وجزم
    ههههههههههههههههه
    أضحك الله سنك يا فنان
    دمت بكل الخير

    ردحذف
  8. لا كتير كتير عليه هى وصلت للجزم ماكانت شباشب وموافقين بقت جزم يا عينى يا ابنى هى ايه الحكاية هو مفيش غيرك فى البيت تصدق أنا شكيت انك مش المقصود يمكن كنت واقف فى وقت مش مناسب فكان من نصيبك جزمة ولا اتنين من اللى بيترموا ....... يعنى هو انت متأكد ان الجزم دى مصدرها البيت ولا يمكن جايه من الشباك واللى قصادك بالذات فكر كده يا طروووق وقولى مين بجد بيحقد عليك ولا يمكن زعلان منك . . . . .

    دمت فى تألق

    ردحذف
  9. هههههههههههههههه

    بجد دمك زي العسل يا اسلام

    انا اول مره اقرا حاجه لطروق

    بس بجد دمك زي العسل وموتتني من الضحك

    تسلم ايدك

    وربنا يبارك ف عمره ومايمتش مقطوع رباط ولا حاجه ههههههههه

    ومبروك اول بوست ^-*

    ردحذف
  10. طروووق ده مش حيجيبها لبره غير لما مرة من دووول الجزمة تخرم عينه
    هههههههه
    اسلوبك بجد تحفة ويموت من الضحك
    ربنا يوفقك
    تسلم ايدك
    سلام

    ردحذف
  11. ههههههههههههههه
    كا العاده ياسلولم دمك زى العسل
    طروق ده مسخرة وخصوصا وهو مزنوق هههههههههههههههه
    ياترى كان بيلعب بفريق ايه اكيد اكيد الزمالك او الريال :D

    دمت بكل خير يا سولم

    ردحذف
  12. اسلام
    جميلة جدا
    على فكرة انت ممكن تعمل قصص اطفال من اولها لآخرها رسومات وموضوعات متميزة جدا
    وطبعا انت قدها وقدود
    بجد رسوماتك جميلة
    بهنيك على التأليف والرسم معا
    تحياتى

    ردحذف
  13. جامد اوي طروووووووق دا
    لا بجد انت دمك خفيف اوي
    ان شاء الله هتابعك باستمرار

    بس انا ليا ملحوظة
    والله تكتب كدا مش كدا ولله

    تقبل مروري

    ردحذف
  14. ههههههههههههههههههههههه

    ياعينى على طرووووووق واللى بيتعمل فى طروووووووووق

    بجد جميييييييييله

    تقبل مرورى

    ردحذف
  15. السلام عليكم و رحمة الله و بركاته
    حلوة الحودايت بتاعتك ده
    لو اتجهت للتأليف ممكن تنفع
    بس هى كلها ضرب كده
    و لا انت مخلى الرومانسية للــ بالى بالك
    قصدى المدونة الجديدة تفكيرك ميرحش لبعيد
    سلام من نجمة قمر حبيب و بعيد بس بيحبنى

    ردحذف
  16. السلام عليكم
    ايه الجزم دي كلها يابني
    هو ابوه ده مش بيحبه واللا التربية اصلها جزم
    والله مابقتش عارفة
    بس حقيقي ربنا يستر عليك يا اسلام من الحسد

    ردحذف
  17. هههههههههههههه

    والله انت زى العسل يا اسلام

    هى وصلت للشوز كمان

    هههههههههههه

    رسمك يجنن بجد وعجب بنتى جدا كل شوية تطلب منى انها تشوفه

    انت موهوب اوي بجد ما شاء الله عليك

    على فكرة ميرسي اوي لزيارتك مدونتى اللى بتسعدنى جدا

    ردحذف
  18. يادي طرووق وسنينه حبكت يعني يتزنق وقتها حاجه غريبه والله

    بس عاادي بتحصل في احسن الحاالات والماتشات

    ردحذف
  19. ههههههههههههههههههههه
    ههههههههههه

    ياعيني على طروق الغلبان الجزم وراه من كل حتة هههههههههههه

    اسلووووووووبك يجنن

    ردحذف
  20. طاروق ده لو انا منه اهاجر استراليا
    بس بامانة مامته ست زى السكر
    دى سهل الواحد يشتغلها جدا
    وانا بموت فى الناس اللى من النوع ده
    :))
    تحياتى اسلام

    ردحذف
  21. اسلام اسلوبك جميل اوي
    وكتابك دمها خفيف
    عجبتني اوي
    كانو بدل م يخلفوني كان جابو جزامة
    حلوة اوي
    استمر وخليها يوميات كل فترة كده
    تحياتي

    ردحذف
  22. ههههههههههههه الله يكو ن فى عون طاروق ههههههههههههه

    بجد وخليه فى جزمتو اسهل

    ردحذف
  23. صباحك سكر
    دى اول زيارة لمدونتك وان شاء الله مش هتكون الاخيره يعنى

    بصراحة انا عملت جولة شاملة فى مدونتك و بجد عجبتى جدا جدا وكمان احنا ناس اهلاوية زى بعضينا يعنى ههههههههههههه

    اسلوبك حلو اوى فى الكتابة
    انا متعاطفة اوى مع الاخ طروووق دا يا عينى هههههههههههه دا يعنى كله ضرب ضرب كدا وكمان تهزيق وشتيمة الواد يعمل ايه يعنى يقطع نفسه ههههههههههههههههههههه

    فكرتينى بشخصية بحبها اوى كانت فى كتاب فلاش وسماش للاستاذ خالد الصفتى كان اسمه الدلجمونى حمادة ههههههههههههه لازم يعنى الحلقة تنتهى وابو وردة بيقوم بالمهام المطلوبة على دماغه وفى اى مكان هههههههههههههههههههه مع الاختلاف هنا بقى طرووق تخصص جزم

    تسلم ايدك
    ارجوك ان تتقبلى مرورى
    واشكرك لزيارتك مدونتى

    تحياتى
    يويو

    ردحذف
  24. ههههههههههه دايما بتعرف تخرجنى من اى مود الموضوع وصل للجزم هههه ربنا يستر عليك يا طرووووق سلااااااامى

    ردحذف
  25. السلام عليكم و رحمة الله و بركاته

    ايه يا طروووووق دا يا طروووووووق؟؟؟

    آدى جزاة اللى ما يسمعش كلمة ماما تقولها
    صحيح هو ماكنش صوتها عالى ..و عشان كدا ماسمعتهاش

    بس هات مكبر من اللى بيعلنوا عنه دا
    يمكن ينصلح الحال
    هههههههههه




    و كل جزمة و انت طيب

    ردحذف
  26. السلام عليكم / أولاً ألف مبروك ليك ولإيناس الغالية وربنا يباركلكم ويوفقكم ، بس من فضلك أنا مش عارفه أقرأ تدوينات مدونتك التانيه بسبب لون الخط الأصفر لو ممكن تغيره أنا فهمت الموضوع من التعليقات :)
    وبالنسبة لطروق بجد صعبان عليا إيه القهر اللى هوه فيه ده .
    ربنا يوفقه فى أى حاجه .

    ردحذف
  27. فناننا الكبير
    تحياتى
    الواد طروووق وحشنى قلت اجى اسلم عليه
    بس حرام عليك اللى بتعمله فيه ده يااسلام
    هى وصلت للجزم !!!!!!
    لا كده كتير
    خلى بالك انا ممكن اخده معايا الحلف
    وامسكه وزارة الروشنه
    ههههههههههههه
    تحياتى يافنان

    ردحذف
  28. السلام عليكم


    الكبير كبير يا معلم

    اقل ما يقال عليك يا سلم
    تسلم ايدك وسلم على طروق وقوله حرام عليك ريحته قلبت المكان الله يخرب بيت زنقته :)

    تحياتى لك انت وطروق يا باشا

    على فكره محدش واخد باله انك عامل رسومات كمان توضح الموضوع تسلم ايدك
    ويسلم فنك الجميل

    ردحذف
  29. ههههههههههههههههه

    كم انت رااااااائع يا اسلام

    بارك الله فيك يا اخي والله

    في حفظ الله

    ردحذف
  30. يخرب بيت فقر دمك يا ولا اوعى الحرنكشات ديه ايه الحلاوة والشربتات ديه
    المدونة ملزقة والله يا سلام طب ما تيجي تلزق عندي المدونة ولا اقولك بلاش احسن انت عثل وتلم ال... حوليك

    حبيبي يا ديو

    ردحذف
  31. اسلوب جميل بجد ورائع
    ودمه خفيف
    والصور رائعة جدا
    متابعين ان شاء الله

    ردحذف
  32. بجد انا حاسه انهم لقيوا طرروووق على باب الجامع...ولا يمكن فاكرينه بوش
    جميل بجد....ربنا يوفقك....انت موهوب جدا
    دمت بخير...تقبل مرورى

    ردحذف
  33. ههههه
    والله جميلة قوى القصة
    وموضوع الجذمة دة فكرنى بجورج بوش وال حصل فية
    ههههه
    تحياتى

    عاشقة الورد

    ردحذف
  34. هههههههه
    أولا دي أول زيارة و خليني أقولك بمنهى الصراحة المدونة بتاعتك جامده جداً جداً و الرسومات أجمد بصراحة ... و أنا برده و أنا قاعدة في بيتنا بلاقي الجزم بتتحدف عليه ياللا إن الله مع الصابرين مستنية جديدك و أتمنى دوام التواصل

    ردحذف
  35. طيب حاسب حاسب الجزمة وراك
    موضوع جميل وجزمة جميلة وبصراحة كمان عجبنى رسمك كمان والقصة رائعة

    تحياتى

    ردحذف
  36. ههههههههههههههه
    تسلم ايدك
    جد شي خفيف ولطيف
    انا كنت مدايقه
    ولم قريت البوست بتاعك
    جد دحكت من قلب
    ربنا يباركلك
    دمت بكل ابداع
    تحيـــــاتي

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم