الجمعة، أبريل 10، 2009

ذكرى ميلاد...وذكرى رحيل

انا بتأسف بجد للكل انى فعلاً كنت بمر بظرووف كتير مش لذيذة ، بظروف صحية واكتئابية وكل ما هو بقافية (ية) ، فعلشان كدة مكنش بدخل المدونات كتير او حتى مدونتى واعلق ، يادوب احط يومية طرووق واقفل ، علشان اشغال تانية طبعاً ، مع انى نفسى طول الوقت ابقى فى المدونة ومسبهاش ولا اسيبكم ، بس يلا ظرووف طارئة وانا بتأسف وبوعدكم انى مش هسيبكم تانى واحاول بقدر من الامكان هبقى معاكم طول الوقت.
بكرر اعتزارى للأستاذ (فركشاوى) ، وبقوله : يا عم فركشاوى انا اللى فاكرك زعلت بس فهمتك اكتر لما دخلت على مدونة عم فشكول ، وفطست على روحى من الضحك ، متزعلش منى بجد ، ومتحذفش الاسم من البوست لأنى مش زعلان خااالص ، لك تحياتى
تانى هام بقى الاخت نوارة ملكة جمال التدوين ، واينااااااس ملكة الاحزان، وبسمة صلاح صاحبة مدونة ايام زمان ، حطونى فى الامر الوائع ، واهدولى التاج وانا طبعاً مش هقدر ارفضلهم طلب فعلشان كدة انا هجاوب على الاسئلة بكل صراحة وبكل امانة
وبقول لأخى "اشراقة اونلاين" الف مبرووووك على نجاحك ويارب كل يوم يزيدك نجاح ، عارف انها جت متأخرة بس متأسفلك بجد
نيجى بقى فى اصل البوست : ذكرى ميلاد
اول ما ابتديت المدونة ، لما حسيت ان البلد محتاجة بجد حد يصحيها ، كل يوم ببص بعيونى للناس بحس بضعف جوايا بس بقول املى فى ربنا كبير ، انا مش عايز اغير الكون ، انا عايز اغير البلد دى ، لأنى بجد بحبها ، حاولت كتير انى اعرض رسوماتى ، بس للأسف كنت فى كل مرة بفشل ويتركنوا فى البيت ، حاولت كتير اوى انى انحت تمثال معبر وفى كل مرة اكسرة ، حاولت كتير انى اعمل تراك موسيقى معبر ، ودى يمكن اللى نجحت شوية ، خفت لحسن احساسى يدفن تحت صخور الكتمان اللى فى البلد اللى بعشقها ، رجع قلمى يصرخ ، وريشتى تنده لكم ، وموسيقتى تسمع ، لما فتحت المدونة ، مدونتى الصغيرة ، مع العلم انى امتلك الكثير من المواقع لأنى مصمم مواقع اصلاً ، بس بحس فى المدونة دى انها بتحكى بجد اللى جوايا ، ولما نجحت فى انها توصل صوتها لناس كتييير اوى ، عرفت ان لسة فى امل ان الناس تصحى ، والامل ابتدى بيكم...يامدونين ، ياللى من لحمى ودمى ، فعلشان كدة فتحت اصحى يا مصر
وفى اول سنة ليها فى ذكرى مرورها بقولها : كل سنة وانتى طيبة يا مدونتى


نيجى بقى للحاجة التانية : ذكرى رحيل
فى نفس الوقت دا ، او قبله ، ذكرى وفاة والدى ، الله يرحمة ، بس بقولة اشكرك ، اشكرك اوى اوى اوى ، لأن انتا اللى وصلتنى للى انا فيه دا ، بيك عرفت الحياة مع انك بعدت عنى وانا لسة طفل ، بس بتنوريك ليا عرفت حاجات ليا ، وبمساعدتك ليا عرفت اشياء كتير انا مكنتش اعرفها ، ربيت انسان لاهو منطورى ولا مضطرب ، كفاية انك بنيته بعقلية غرييبة الطباع ، وهادئة ، وصريحة .
وفى ذكرى رحيلة بهديلة حاجة متواضعة ، اقل حاجة ليه بس ، ناحتها بأيدى ، لأحياء ذكراه ال 12 ، وهى وجهة :



وحشتنىىىى اوىى ...إسلام
نيجى بقى للنهاية وهى اجابتى على اسئلة التاج

أسمك ؟
إسلام جاويش
المشهور بيه وسط أصحابك ؟
إسلام ديو - عبقرينو - الفنان ههههههههههههه
مجال دراستك ؟
الخدمة الإجتماعية
أسم مدونتك ؟
إصحى يا مصر
صورتك الرمزيه فى المدونه بتعبر عن أيه ؟
صورتى مبتعبرش عن حاجة خالص
هل فكرت بإغلاق المدونه ؟
معتقدش ، لأنى لو قفلتها يبقى الموت افضل
إيه رد فعلك لوحد قل أدبه فى تعليق ؟
بكل احترام يتحذف ويترد عليه بكل أدب
أسوأ مدونه ؟
هما كتير بس معظمهم مش مصريين ، وبما انى شخص ليبرالى فمش هقول مين
هيحصل أيه للأيميل بعد ما تموت ؟
دا لما اموت بقى
المود بتاعك أيه ؟
هادى ، متجاوب ، مش بحب الشخص اللى بيرغى كتير ، واقعى ، وخيالى اوسع من الكون
بتعمل أيه فى أوقات فراغك ؟
نحت - العزف على الجيتار او البيانو او تأليف نوتة ، رسم الكاريكاتير طبعاً ، كتابة الرويات والقصص ، او ازور اماكن الطبيعة
الأكله المفضله ؟
ههههههههه المحشى ورق عنب او كرنب مع دكر بط
الصفات التى اخذتها من والدك؟
الثقة ، حب الناس ، الاحترام ، القناعة والاقناع ، التفكير للمستقبل وطى صفحات الماضى
وحاجات كتيييييييير اوى
الصفات اللى اخدتها من والداتك ؟
الحنية ، الصراحة ، حب الفن والحياة ، الحفاظ على الذات ، الخـــير وعمل الخير
اكتر ست حاجات بتكرهم ؟
الحكومة
الغرور
عقدة النقص
الفساد
الخيانة
الكدب
اكتر ست حاجات بتحبهم؟
ربنا ورسولى واهلى
طرووق وجىجى
مصر
الحياة
الناس المحترمة
الصدق
شخصيتك نوعها أيه ؟
يمكن غريبة شوية ، محدش فاهمها ، ولا انا فاهمها ، بس كل اللى عرفته انى طيب ، لأنى عايش وحيد فى بيت طويل عريض
ممكن تكون الوحدة هى اللى عملت كدة
أحلى جمله قيلت فى وصف مدونتك ؟
كتيييييير اوى ومن ناس انا بحبهم لأنهم
التعليقات بالنسبه لك ؟
زى البنزين والنار
احلى بوست كتبته؟ضع اللينك بتاعه؟
مجموعة طرووق اللى لسة بكتب فيها
ورواية تسعة فى الخير لسة هتنزل قريب
أفضل مدونه قرأتها ؟
كل المدونات
االشغل بالنسبه لك أيه ؟
حياتى ، مينفعش منشتغلش
الأنترنت بالنسبه لك أيه ؟
حياتى التانية ، لأنه الهدف من تحقيق احلامى
تمرر التاج لمين؟
سما الحب
بسمة مسلم
اسماء جمعة
aidy
خرابيش قطة

وكان نفسى فى ناس كتييييييييير اوى ، بس تمام لحد كدة





جميع الحقوق محفوظة لمدونة اصحى يا مص

هناك 38 تعليقًا:

  1. واوووووووووووووووووووو
    ييييييييييييييسسسسسسسسسسسسسسس
    أول تعليق
    هههههههههههههههه

    ردحذف
  2. السلام عليكم ورحمة الله وبركاته
    اخى الفاضل اسلام بجد والله العظيم كلامك ابكانى
    أولاالله يرحم الوالد ويسكنه فسيح جنته ويكون من الابرار والصدقين والشهداء اللهم أمين يارب العالمين
    ثانيآ : كل سنه والمدونه طيبه بمناسبة مرور عامآ عليها
    ثلاتآ : بلاش نقطة اليأس دى ياإسلام دايمآ المبدعين والعباقره بيقبلهم صعوبات وحاجات كتير بتعرقل طريقهم بس ما ضعفوش ولا إستسلمو لليأس أبدآ والنتيجه زى ما أنت عارف وأكيد شايف
    ذاكراهم باقيه فى قلوبنا
    وإن شاء الله ربنا هيقف معاك لأنك بجد تستاهل الخير كله وده من خلال كلامى معاك مباشر
    حسيت فيك انسان طيب محب للحياه واقعى بيحب بلده قووى وده بذاته يااسلام انتماء للوطن
    أحيك يا اسلام
    يلا بقا نضحك شويه ونخرج من المود ده
    هههههههههههههههه
    اه عليك بتحب المحشى والبط
    أنا كمان بموووت فيهم ياسمسم
    وكمان بكره الحكومه والكدب
    بصراحه مبروك عليك التاج
    عجبنى قوى أسلوبك فى إجابتك شخصيه محترمه قووى
    وبجد لك حبى الكبير
    وأحترامى يا اسلام الذى لاينتهى
    تقبل تحياتى
    سلالالالالالالالالالالالالالالالالالالالامى

    ردحذف
  3. صديقى الفنان
    السلام عليكم
    محتار أقول لك ألف مبروك على مرور سنة على مدونتك
    أم أقول لك الدوام لله على ذكرى وفاة والدك
    إختار إنت لأنى أنا محتار
    أما عن إجاباتك على أسئلة التاج أظهرت لى الكثير من شخصيتك
    وزادنى ذلك حباً لك
    دمت بكل خير

    ردحذف
  4. اسلام
    بوست رائع أحيك على صدق كلامك النابع من القلب
    وصدقنى يا إسلام النجاح مش بيجى مره وحده
    لاذم نطلع السلم درجه درجه
    مش نطلعها كله مره وحده
    ولاذم نفشل فى الاول
    وبعد الفشل بيكون النجاح النابع من العند والاصرار
    ربنا يوفقك ويكرمك وتحقق كل اللى بتتمناه يا اسلام لانى بجد حاسه قوووى بيك
    بس ابقا افتكرنا مش تنجح وترمينا وراك
    احنا بقا لاذقين فيك
    ههههههههههههههههه
    سلالالالالالالالالالالام

    ردحذف
  5. السلام عليكم ورحمة الله وبركاته
    سمسم انا طبعا كل الكلام اللي كتبته عن نفسك عرفته او حسيته من حواراتي معاك
    الله يرحم والدك وتعيش وتفتكر
    وكل سنة والمدونة بالف خير وعقبال المئوية
    مش عارفة اقولك ايه بس شكرا علي تمريرك التاج
    دي حاجة جامدة قوي
    ربنا يرضي عليك يارب
    الله يرضي عليك ويرفعك دايما دايما في عليين

    ردحذف
  6. بجد رائع البوست ده وبجد كل سنة وانت طيب ومدونتك فى تقدم ويزيد متابعينها ان شاء الله ده بالنسبة لذكرا الميلاد.

    أما بالنسبة لذكرى الرحيل تعيش وتفتكر وتفضل تخلد ذكرى والدك ويارب يرزقك باولاد تكون لهم خير عون فى الدنيا وتعطيهم من الحنان والطيبة اللى شوفتهم مع والدك.

    أما التاج اجاباتك دمها خفيف وفى حاجة لقيتها فى كذا مكان اللى هى محشى ورق العنب كتيييير بيحبوه وانا كمان طبعا حلو جدا طلعنا مشتركين فى حاجة وكمان الهدوء بس طبعا انت هدوء شكله مختلف.

    دمت بكل ود وخير...

    تقبل مرورى

    ردحذف
  7. أولا : كل سنة و مدونتك طيبة
    و أنت طيب قبلها و دايما بخير

    ثانيا : رحم الله والدك رحمة واسعة
    و جمعك به فى جنان الخلد

    ثالثا : فعلا اجاباتك بتنم عن شخصية هادية
    ربنا يوفقك يارب
    و نجاح دائم و مستمر

    ردحذف
  8. اولا ربنا يرحمك والدك ويسكنه فسيح جناته
    ________
    الف مبروك النجاح
    ومبروك للمدونه ويارب تفضل لما يبقى عندها 100 سنه وعشر مدونات صغيرين
    __________

    اجابتك جميله اوى يا اسلام
    ومشاء الله مواهبك كتير يا فنان ربنا يذيدك

    تاج جميل اوى علشان عرفنا على انسان جميل زيك
    تقبل تحياتى
    سلام

    ردحذف
  9. اخي العزيز
    الاستاذ اسلام
    حمدا لله علي سلامتك والف الف سلامه
    اولا*الله يرحم والدك ويسكنه فسيح جناته
    ثانيا**كل سنه وانت ومدونتك بخير
    ثالثا***انا من اول زياره للمدونه
    عرفت انك انسان موهوب
    ومتعدد الاتجاهات الفنيه
    وربنا يزيدك من نعيمه وفضله
    وكمان اجابتك علي التاج
    بمقام مدونه
    وبلاش تتأسف لان المفروض احنا اللي نتأسف لك علي الظروف الي انت مريت بيها
    لاني زعلت لما لقيتك مش رادد علي
    تعليقات المدونين
    علشان كل مدون بيعلق او حتي قبل ما يعلق بينتظر الرد كرد السلام واكتر
    اسف لاني طولت عليك
    مع تمنياتي لك بتحقيق ما تتمناه
    وما نتمناه لك بالخير والمحبه
    ان شاء الله

    ردحذف
  10. كل سنة ومدونتك بخير
    بالتوفيق دايما
    ربنا يرحم والدك ويسكنه فسيح جناته

    ردحذف
  11. السلام عليكم / سلامتك من الضيق والحزن أوصيك بكثرة الاستغفار فهو يزيل الهم وربنا يرحم والدك ويقبله فى فسيح جنته .
    جميله مواهبك ومعلش فى بلدنا للأسف الموهوبين مالهمش مكان ومش محل للإهتمام بس كفايه إننا عرفناك وربنا يوفقك فى كل مجالاتك . على فكره حب النغم والموسيقى والتأليف أشاركك فيه ، يارب نطمن عليك وتبقى بخير حال آمين .

    ردحذف
  12. التعليقات بالنسبه لك ؟
    زى البنزين والنار
    استغرب قوى للرد ده يااسلام
    واستغربت اكتر لما لقيت ان مجال دراستك بعيد عن كل المواهب الجميله دى
    رحم الله والدك ووالدى وجمع اموات المسلمين

    ردحذف
  13. اسلام انتا انسان طيب وانا عارفة كدة
    اينعم انا دخلت على السايت بتاعك لما كنت ببحث عن مدونات كتيير و مش عارفة احساس جالى بأنك انسان غرييييييب وشخصية جمييييييلة جداً جداً واتمنى انى اقابلك واعرف شخصيتك اكتر
    وانا اسفة انى معلقتش على الباقى بس لسة عارفة دلوقتى حالاً ازاى اعلق

    هدير

    ردحذف
  14. نفسى بجد اتعرف عليك ويارب تكون ضفتنى على الميل

    ردحذف
  15. اولا اول مرة اعرف انك بتعرف تنحت وتعزف كمان

    كده فعلا فنان:)

    التمثال اللى نحته لوالدك حلو اوى بجد

    تعيش وتفتكره .........

    وان شاء الله تحتفل بمدونتك فى عامها الخمسين والمية ههههههههه (( يلا انشالله ما عن حد حوش))

    إجاباتك على التاج جميله جدا
    ولو انك اقتصدت فيها يا ترى ده توفير :D

    اما عن حالة الاكتئاب واليأس اللى كنت فيها فحاول دايما ً ان تقف على رجليك بسرعة بدون ما حاجة تأثر فيك

    وده بتعمله الارادة القوية
    وطول ما إرادتك قوية هتوصل بإذن الله

    **********************

    انت كتبت إسمى فى اللى بتهديهم التاج

    بس انت عشان بقالك كتير مدخلتش مدونتى

    متعرفش انى جاوبت عليه لسة طازة

    واللينك بتاعه اهو : ـ

    http://searching4identity.blogspot.com/2009/04/blog-post.html

    أنا عارفة انه لينك مش أد المقام بس مش بعرف أحط الرابط فى التعليق الا كده ههههههههههههه

    تحياتى ليك ,,

    ردحذف
  16. أخى الفنان المبدع الجميل : إسلام
    ( صاحب الريشة والقلم )
    السلام عليكم ورحمة الله وبركاته
    رحم الله والدك وأسكنه فسيح جناته

    أخى أحييك على كلماتك البسيطة والعميقة والمؤثرة وأدعو الله تعالى أن يحقق لك كل آمالك وطموحاتك
    اللهم آمين

    وتقبل أخى تقديرى واحترامى
    بارك الله فيك وأعزك
    أخوك
    محمد

    ردحذف
  17. الله يرحم ولدك يا اسلام
    انت واموات المسلمين

    كلهم يار ب العالمين

    عارف لما قولتله وحشتنى
    خلتنى عيطت
    لان دايما بقول الكلمه دى لصورة بابا الله يرحمه
    بس الحمد لله
    انه خلف ولد صالح زيك

    اما بالنسبه لردودك على التاج
    فبجد جامده قوى
    بجد شخصيتك محترمه قوى

    دمت بكل خير

    اه صح نسيت اقولك
    كل سنه ومدونتك طيبه وبخير
    وفى تقدم دائم ان شاء الله

    ردحذف
  18. هااااااااي

    كيفك يااسلام يارب تكون بالف خير قلقتنا عليك بس اكيد امورك بقت تمام والحمد لله

    الله يرحم الوالد ويسكنه فسيح جناته

    عجبني جداااا النحت بتاعك ماشاء الله مواهبك كتيرة جدا ربنا يوفقك ويحققلك احلامك

    وكل سنة وانت طيب والمدونة بتقدم يارب

    التاج عرفنا عليك اكتر واكتر

    عنجد البووست رااائع جدا

    وعرفنا على فنان موهوب باكتر من شي

    ربنا يوفقك و يسعدك

    ردحذف
  19. ابنى اسلام كل عام وانت فى تقدم ونجاح ورحم الله والدك وجعلك الله (ولد صالح تدعو له)،ابنى اسلام زادك الله من فضله ماشاء الله لا قوة الا بالله نحتك رائع ورسمك جميل واحساسك مرهف ،كل هذه نعم أنعم الله بها عليك فعليك بحمد الله وشكره والحفاظ على هذه النعم بتنميتها وأستخدامها فى الخير دمت ابنى طائعا وكل عام وانت بالف خير

    ردحذف
  20. اولا احب ادعى لوالدك بالرحمه وربنا يغفر ليه ويسكنه فسيح جناته
    واحب احييك على النحت الجميل
    بعد كده اقولك اجاباتك عن التاج مختصرة جدا بس الى حد ما معبرة.
    من اجاباتك شايف انك متعدد المواهب وهادى الطباع تحب الوحدة ..
    احييك على البوست الجميل وعلى التاج

    ردحذف
  21. اولا حمد الله على سلامتك من الاكتئاب

    ثانيا : ربنا يرحم بباك وتعيش وتفتكر والنحت بتاعك تمام جدا

    ثالثا بقه

    الاجابات

    : لذيذه وكويس اوى محشي ورق العنب ودكر بط

    ابقي هات طبق هههههههههه

    يلا مش هطول بقه

    سلام وسلملى على طرووووووق

    ردحذف
  22. كل سنة ومدونتك بخير
    ودايما تكون مبسوط وبلاش مود الحزن خالص
    وربنا يرحم والدك وكفاية ان له ابن زيك
    دايما بيترحم عليه
    اما اجابتك عن الاسئلة فهي جميلة طبعا
    ربنا يكرمك
    وفي انتظار جديدك دوما
    سلملي علي طرووووق اكيد
    سلام

    ردحذف
  23. ان شاء الله السنه الجايه تكون مصر صحيت

    و تكون انت بخير و بصحه و الجميع ان شاء الله


    ---

    اللهم تقبل كل اموات المسلمين و تجاوز عنا و عنهم و زينا و اياهم من فضلك


    --

    ردحذف
  24. أزيك يا اسلام
    بجد مدونتك حلوة أوى ومن أكتر المدونات اللى بحبها لإنى صراحة كدة بحس فيها بالتلقائية والصراحة
    ودول عملة نادرة
    ربنا يغفر لوالدك ويرزقه ويرزق والدى الفردو س الاعلى
    قول معايا أمين

    ردحذف
  25. اسلام ديو ازيك
    عاااااااااامل ايه في الدنيا
    كل سنه وانت ومدونتك الجميله دي بألف خير ياااااااااااارب وربنا يرحم والدك ويغفرله ذنوبه يارب
    ادعيلو ربنا يرحمه يا اسلام
    نيجي بقى للتاج ده اللي اتبعتلي وجاوبت عليه اخيييييييييييييرا
    وتسلم ايدك على الرسمه الجميله دي
    انا من زمان كان نفسي فعلا اتعلم النحت بس مفيش حد هنا بيعلم الحاجات دي لو تعرف مكان في مدينه نصر ابقى قلي عليه وسؤال كده في الرخامه
    لو رحت عند نحات وعملي صورتي انا كده ياخد مني كام لو في مصر يعني
    وتفضل موجوده لحد كام سنه يعني ولا كام شهر
    معلش الغبااااااااااااااااااااء نعمه
    ههههههههههههههههههه
    بس احنا كمان بنألف اغاني وشعر وخواطر وبنرسم جامد جدا يعني وبنكتب في المجلاااااات اوماااااااال ايه
    تحياتي ليك ولمدونتك الجميله دي

    ردحذف
  26. اولا سلامتك يا سمسم
    تانى حاجة
    ربنا يرحم باباك ويكون فى الجنو ان شاء الله
    وبعدين تعالى هنا قولى
    فين الصورة
    شكلك هتضرب

    ردحذف
  27. التمثال جميل جدا واضح انك شبه والدك الله يرحمه
    سلامتك من الاكتئاب
    اجاباتك علي التاج لطيفه وعرفتني جوانب من شخصيتك
    ربنا يوفقك ويريح قلبك وتحقق كل احلامك
    وكل سنه ومدونتك منوره البلوجر

    ردحذف
  28. ازيك يا اسلام
    يارب تكون بخير وتعدى كل ازماتك على خير ان شاء الله
    وربنا يرحم والدك وموتا المسلمين جميعا
    =============================
    اما التاج بقى

    ردودك جميله جدا وصريحه
    وتفتح النفس ياابو محشى
    ودكر البط ده انت شكلك كده اكيل
    وعلى العموم بالهنا والشفا يا سيدى

    تحياتى لك

    ردحذف
  29. اخى اسلام

    سلام الله عليك اولا

    ثانيا عقبال مليون سنة لمدونتك

    ثالثا
    جعلك الله خير الولد البار بوالده

    وتحيا ذكراه بما يفرح قلبه

    وتطمئنة بطاعة ربك دائما

    واضح انك شخصية بتفهم

    مضمون الاكل الجيد محشى وبط يا سلام

    الله يمسيهم بالخير ههههههههههههههه

    كنت زمااااااااااااااااان زمااااان


    بموت فيهم قبل القولون ما يعمل هجوم

    بس على مين ولا بياثر معانا الكلام

    دا ههههههههههههههههههههه


    اجاباتك جميلة وشخصيتك واضح

    انها بسيطة ومميزة

    ربنا يوفقك

    smilyrose

    وردشان

    روح الحب الصادق

    ردحذف
  30. اولا : ربنا يتغمد والدك برحمته ويدخله فسيح جناته
    ويجعلك سبب في امتداد ذكره ووجوده على الارض بعملك الطيب وخلقكك الحسن يارب..
    ....
    ثاني حاجه
    كل سنه ومدونتك بخير ومليانه كلام جديد وجميل ديما ان شاء الله
    .......
    انا من كلامك كنت حاسه انك يا فنون تطبيقيه يا جميله حاجه كده
    بجد ربنا يباركلك في مواهبك كلها وتقدر تحافظ عليها ديما وتنميها
    ......
    جمليله كتير ردودك على التاج
    ماعلش طولت عليك
    تحياتي لك

    ردحذف
  31. السلام عليكم

    إزيك يا عم اسلام

    انا كمان هقسم تعليقى على ثلاث مراحل زى ما انت عملتى موضوعك فى تلات مواضيع

    اولا انا مش زعلان من تأخيرك المهم انك تتابع وترجع فى مود احسن وبلاش كلمة الوحده دى ولو تعتبرنى صديق لسد خانه اسمها الوحده انا يشرفنى ده

    بالنسبه للتاج فهو فعلا تاج لأنك جاوبت بدبلوماسيه جميله لذيذه وعرفت تخلع من الأسئله المحرجه بلذاذه

    اما بالنسبه لوالدك رحمه الله
    فالحمد لله انك فاكره بالخير
    ولكن اعلم انه لا يطلب منك تمثالا ولا لوحه فنيه وانما يطلب منك الدعاء
    وقبل الدعاء لابد ان تكون صالح ليس من اجلك انت انما من اجل والدك
    فكن انت الولد الصالح الذى تدعوا له فلا ينقطع عمله ابدا
    واللهم اجمعكم سويا فى دارا خير من دار الدنيا فى جنة الخلد مع النبين والصديقين والشهداء

    تحياتى اخى وأعتزر لطول التعليق

    ناجح

    ردحذف
  32. احلي حاجه العنوان

    زري الميلاد وزكري الرحيل

    ماتعوقش بعد كده كتيير ماشي

    ردحذف
  33. السلام عليكم

    مدونتك بجد تحفة قريت بوستات طرووووق وموتتنى من الضحك انت بقى دكتور الكوميديا

    على فكرة انت شبة والدك خالص ونحتك جميل جد يا فنان

    دمت بكل خير

    ردحذف
  34. الله يرحم والدك اخى

    كل سنه ومدونتك من الاوائل لمرور سنه على بقائها فى اوائل المدونات

    ومش هعلق على اليأس الى عندك لئنو عندى ومش لاقيلو حل

    ردحذف
  35. اخي العزيز
    الاستاذ الاسلام
    اخبارك ايه طمنا عليك
    طالت غيبتك لعل المانع خير ان شاء الله وما يكنش اكثر من شوية كسل
    قلقتنا عليك وخصوصا مسحى اليأس اللي كنت عليها عند كتابة الموضوع
    تمنياتي ان تكون بخير
    وربنا يطمنا عليك
    ان شاء الله

    ردحذف
  36. السلام عليكم
    أولا كل سنه و مدونتك و انت فى خير وتواصل دائم
    ثانيا الله يرحم امواتنات و اموات المسلمين
    على فكره انت فى شبه كبير لوالدك
    ثالثا بوست جميل و التاج إجاباتك فيه حلو

    ردحذف
  37. السلام عليكم كل سنة وانت طيب ومدونتك بصوتك بتنور الدنيا ولا تنسى ان البقاء لله وحده ربنا يرحمه بس اجمل حاجة انه جبلنا اسلام الفنان ربنا يوفقك

    ردحذف
  38. لحضرتك تاج عندى ياريت تقبله هو موجودفى مدونتى كلمات من ذهب ولك من جزيل الاحترام والتقدير

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم