الجمعة، مايو 08، 2009

الفراعنة والفضاء..ومشروع ايزيس..وحقائق بالصور من الاستخبارات الروسية

اول مرة اجيبلكم بوست بيحكى عن الفراعنة ويارب يكون الفتحة خير
الموضوع خاص بملف من ملفات الاستخبارات الروسية
عن موضوع : مشروع ايزيس ، اكتشاف المخابرات الروسية لمقبرة الزوار
ISIS PROJECT..The KGB DISCOVERY OF THE TOMP OF THE VISITORS
هتقولولى ايه الخرف دا ...هقولوكم لا مش خرف وان الموضوع كبييييييير اوى اوى
نزل له فيلم وثائقى ومحدش فاهم ايه الحكاية
ياريت استاذى الفاضل ومؤرخ المدونين صاحب مدونة اللؤلؤة ، والاستاذ فشكول يكونو معانا فى الموضوع دا لأنه فعلاً مثير للجدل
بسم الله الرحمن الرحيم
الحكاية من اولها كدة .... طائفة تسمى نفسها بالأتباع ، ودى طائفة منتظرة زوار من العالم الأخر ..متقلقوش هتفهمو كل حاجة بس ركزوا كويس ، وهم تقريباً 12 شخص روسى جاءوا الى مصر ، وطلعوا من فندق فى القاهرة من غير ما يعلموا حد وتم تحرير محضر تحرى فى يوم 23 ابريل 1985 بأختفائهم وذكر فى المحضر ان اللى فضل عبارة عن كاميرا فقط هى اللى موجودة ، ولما الناس جم فتحوا الكاميرا دية لاقوا المشاهد اللى انتم هتشوفوها دلوقتى
وزى منتم شايفين فى الصور معانا ...مجموعة واقفة ، ولاقوا فعلاً ان فى ضوء جاى عليهم والضوء ظاهر فى الصورة رقم2، وبعد ما النور دا ينزل عليهم هتلاقو شخص بدأ يركع فى الصورة رقم 3 ، وبعد كدة ...طشاش فى الصورة وان الله بالسر عليم.
قالوا ان النور اللى نزل عليهم غير اى نور احنا بنشوفة...طيب ماشى ، جابو عالم فى الضوء ووضح ان الضوء فيه قوى ايونية غريبة وحتى شرح الوان الضوء ، قال انه بيمشى بسرعة قوية اوى ، عمرنا ما شوفنا سرعة زية فى الكون.......












فى المشهد التالى ، الناس دول بقا امتى عرفوا وقت ومكان زيارة الناس اللى جاية من العالم الأخر؟؟؟؟ ، اسئلة غريبة هيتجاوب عليها لما نكمل تقريرنا عن الفيلم الغريب دا.
يقال ان وجد جسم مدفوناً داخل القبر بالهرم ، جسم غريب تم العثور عليه من خلال علماء روس ، وتم ترحيل الجمجمة الى معمل ابحاث
وتم ايضاً العثور على اهرامات اخرى فى بلدان حضارتها تختلف عن حضارة مصر، والكتير بيقولوا ان فيه رابطة تاريخية بينهم ، وفى الشكل التالى يوضح اماكن الاهرامات دى بالتفاصيل المفصلة ، وهى فعلاً صدفة غريبة بتقول ان فى حضارة عامة ، او ان فى حضارة رئيسة اثرت على الحضارات دى ، إن كانت من كوكب الارض ، او من خارج كوكبنا ، وفى الاساطير كلها قالوا ان فى اجسام كبيرة وعمالقة كانت بتيجى من العالم الاخر فى سفن فضائية وكانت بتتنقل بين النجوم ودا اللى جه فى كتابات احمس من 3 الاف سنة ، على حسب ذكرهم ، وهما اللى جابولنا الحضارات والخير والعلوم والحروف واللغات ، استخدمت كلمة "المتنقلون بين النجوم" فى الكتابات المصرية للكشف عن عمالقة كانت تتنقل بين النجوم ويختلفون عن البشر ، او بمعنى اصح غير بشريين ،ويخرجون من الارض بسفنهم ، انهم خارقون بالنسبة لنا ...البشر ،وبصراحة ناس كتير قالوا انها مجرد اكاذيب ، بس بقى لما تيجى تسمع من اكتر من 10 حضارات ان المخلوقات دى موجودة فعلاً !! ..هنا نتوقف
تشابه الاساطير...وبناء الاهرامات فى اماكن مختلفة ، شكك المختصين ان الحضارات كلها انبثقت من الحضارة الام.
قالوا ان هذا الجسم الغريب ترك لنا مفتاح العلم والعلوم ، ومن الواضح ان الفريق العلمى فى الجيزة قد كشف اسرار الاهرامات كعامة فى سائر العالم بقولهم انها كانت تستخدم للملاحة الفضائية وقد استخدمت لتفسير تلك النظرية الابراج والنجوم .



وعلى العلماء المختصين فى المشروع ، رسم سماء الليل كما يبدو منذ الاف السنين ، وفى عام 1050 قبل الميلاد...حصل حاجة غريبة اوى بيقول الباحثين ان اهرامات الجيزة التلاتة كانت متطابقة وعلى نفس الخط الفلكى مع نجوم برج الجوزاء ، استبعد انها تكون صدفة!! ، وهذا بناء على خطط وضعت فى القرن 21 قبل الميلاد ، اى قبل بناء الاهرامات الفعلى!!!!!!!!!!!
ايه ياعم اللى انتا بتقولة دا؟؟؟
عتر علماء الفريق على رابطة مشابهه!! ، بحثوا عن عينات اشعاعية نشطة ، والنتيجة ان المومياء وبقية الجثث سلبية ، وتشير العينات المجهرية عن مكونات معدنية ،وكذلك نيترون الممغنط بيبين انها مزيج من معادن مجهولة المصدر!!!، وبعد ما قعدوا يختبروا هذا النوع من المادة بينلهم حاجة غريبة جداً ، ان الحاجات دى بعد من سنة 10000 الاف قبل الميلاد ، وان التاريخ بيطابق مع تاريخ تصميم اهرامات الجيزة ، وتوصل العلماء ان فى رابط صلة فعلية فى تصميم الاهرامات والمومياء الموجودة داخل القبر ، وطبعاً جابوا علماء وحانيات لدراسة الظواهر الخارقة للطبيعة ، وبصراحة انا هشيل النقطة بتاعت علماء الروحانيات دى لأنى مش معترف بيها .




تم تصوير هذه المومياء الغريبة ، الى معمل ابحاث لكيفية اعادة بناء الشكل المماثل لها ، وقال الباحثون ان من امكانهم اعادة هيكلة بناء الجسم من خلال فسيولوجية الجسم نفسة ...طيب ، تم اعادة تقاسيم الوجه ، واوصافة هى : جمجمته كبيرة ، حجم عنيه غير طبيعي ، ذقن صغيرة وفم صغير ، علامات تدل على وجود اسنان ، رقبة طويلة ، طولة متران .
العالم اللى ماسك المشروع اقسم بأنه لو لم يكن فى المعمل ، ماكان صدق اللى شافه ، وقال ان احنا وصلنا لأكتشاف ان المومياء ليست بشرية ، وان الاساطير حقيقة ، ربما وجدنا فعلاً رجل فضاء ، فى داخل القبر.











كان يحيط مشروع ايزيس السرية ، سرية جاااااااااامدة جداً ، ولكن من كبرة عمل فيه بروفيسيرات وطلاب المنح والعلماء ، وطبعاً بكدة اتفشت الاسرار وانتشرت اشاعات بالنسبة للموضوع دا ، وبدأ مجموعة من الناس تتقابل ، عبارة عن موظفين عملوا فى السابق فى المشروع ، والفنيون ، وخبراء الكومبيوتر ، اطلق هؤلاء الناس على انفسهم لقب.....الاتباع .
استمدت هذه الطائفة او الجماعة اسمها من كتاب الموت المظلم المصرى ، ومن المعتقدات المصرية القديمة هى هبوط عائلةمن الالهة من النجوم ،جلبت لشعب مصر المعارف الكونية ، وفى يوم عادت الالهة الى موطنهم بإستثناء اوزريس ، وقام الاله بتشكيل مجموعة من الناس ، علمتهم الكثير من الحكم والعلوم ، ومن ضمنها سحر الارقام ، وكانو يدعون...بالأتباع ...، وذلك للحفاظ على العلوم ، حتى تكون الارض مستعدة ...لبداية التطوير العلمى .
الالهة اوزيريس ،كان يأتى من خلال ممر العالم الاخر الموجود بالهرم الاكبر ،و كان مسؤلاً عن نمو الحضارة ، وقد عبده الناس.
تجاهل الكى جى بى (المخابرات الروسية) ذلك ، وامرت الناس بمتابعة الابحاث والمشروعات ، وبعد كدة جابو ردار لتحديد اذا كان فى غرف تانية ولا لا ، واللى ظهرلهم ان ميش غير غرفة المقبرة ، والممر ، ومفيش اى شئ غريب حصل ، وكانوا على وشك الانتهاء من العمل ، لولا ان ظهر شئ غريب!!
غرفة كبييييييييييييييييييييييرة فى قاع الهرم!!.

وطبعاً الاشكال مبينة هنا اوى :

















ادى ذلك الوضع لحدوث انقسام فى مشروع ايزيس ، ناس قالوا انها الغرفة المليئة بالمعارف اللى احنا منتظرينها ، والنبش فيها ، والناس قالوا من دراساتهم ان فتح الحجرة الكروية دى سيعرض العالم للهلاك.
وبالتالى اغلقت ملفات مشروع ايزيس رسمياً فى عام 1981 ، وبعد ذلك جائت اخبار بأقالة جميع من كانوا على المشروع ، وقد حدث بالعاملين بالمشروع ...بعدها ...حوادث جنون واختفاءات وانتحار وانتقالات دينية لمعتقدات اخرى ،وظهرت قضية اخرى وهى الاتباع
يعتقد الاتباع ان المدفون فى قبر الزوار هو اوزيس -الاله القادم من النجوم - وان فى حجرته يمكن ان يخترق الزمان والمكان ، وان بها حجر من الكوكب الفضائى ، عليها رسومات على الحائظ ، وفهمت الجماعة ان البوابة ستفتح يوم 23 ابريل عام 1985 .
هل جاءو ذلك السياح لأختطافهم من قبل المتنقلون بين النجوم او المخلوقات الفضائية ؟؟ ، ام بحثاً عن البوابة المؤدية للعالم الاخر؟؟
انا عن نفسى مش عارف .
ياريت تجاوبوا على البوست دا وانا بعت ايميل للدكتور زاهى حواس علشان يجيبلنا التفاصيل كلها ، ومنتظر رده.
الملفات المرفقة....بعض مشاهد من الفيلم الوثائقى غير مترجم

جميع الحقوق محفوظة لمدونة اصحى يا مصر

هناك 33 تعليقًا:

  1. كل دي صور
    هاتفرج بتمعن وارجع اقول رايي

    ردحذف
  2. انا مش عارفة اقول ايه
    بس انا منتظرة رد الدكتور زاهي حواس عشاق الجيبتولوجي
    اتمني انه يوصل الرد في اسرع وقت
    تحياتي

    ردحذف
  3. حقراها و بعدين اعلق
    ديه عايزة تركيز و صحيان

    ردحذف
  4. لالالا
    لالالا مش قادرة اصدق
    مش معقول
    لالالالالا

    ردحذف
  5. انا فى انتظار رد زاهى حواس
    فعلاً شىء محير و غريب و غامض
    و موضوع ملىء بالتشويق و المتعة و الرعب

    ردحذف
  6. لاء انا مش فاهمة حاجة ومعنديش تعليق

    بس تفتكر ان زاهى حواس هيرد عليك فعلا

    ردحذف
  7. الموضوع عجيب اوي

    كل يوم بستغرب اوي من الفراعنه واسرارهم

    وان كنت مش مؤمنه بحجات كتير بتتقال عنهم

    زي حكايه الغرفه الي هتكون سبب ف هلاك العالم دي

    عموما

    منتظرين رد دكتور زاهي

    التقرير ممتع اوي يا اسلام

    ردحذف
  8. بصراحة ان ركزت جدا ومن كتر ا ركزت هيست
    ايه ده كله
    تفتكر ان في يوم ممكن الخرفات تصبح حقيقة
    وافلام الرعب والفضاء الخارجي تكون واقع
    ؟؟؟
    انا قريت البوست مرتين
    ونفسي ارجع تاني
    بس خايفة علي حبة العقل اللي فاضلين
    لما تسأل زاهي حواس وتتأكد
    حرجع اكيد
    لا حول ولا قوة الا بالله
    سلام

    ردحذف
  9. موضوع غريب جدا
    الفراعنه دول حاجه عجيبه بجد
    شكرا يا سولم وفى انتظار رد زاهى بيك حواس

    ردحذف
  10. معرفش الموضوع بتاع كائنات من عالم تانى مش بصدقه وحتى لو كان حقيقى مش هيفرق معنا فى اى حاجة المفروض نشوف الارض اللى هتتدمر دى بافعالنا قبل ما نفكر فى عوالم اخرى
    تسلم ايديك يااسلام على المجهود الكبير فى البوست ده

    ردحذف
  11. معلومات جديدة بصراحة تشكر عليها
    اكيد منقدرش نفتى فيها
    بس منتظرين رد حد متخصص
    شكرا

    ردحذف
  12. انا صعب انى اصدق الكلام ده....بس الحقائق دى مؤكده ولا سيناريو زى سيناريوهات بنسمع عنها كل شويه....على العموم يا رب د.زاهى يرد عليك
    دمت بخير...تقبل مرورى

    ردحذف
  13. شوف يا اسلام كلامك ده فكرنى بحاجة سمعتها زمان مش فاكرة مين قالها بالضبط ان الكون لا يقتصر علينا بس أنا فاكرة انه عالم مسلم وكان بيجى له برنامج فى الراديو مش فاكرة بجد اسمه حتى انى سألت ماما وهى نسياه بس لما أعرف اسمه هقولك أكيد المهم كان بيقول ايه قال يا سيدى إن مش الأرض لوحدها المأهولة بالسكان وان كلمة رب العالمين ان ربنا خلق أكتر من آدم ده والله أعلم وعلشان كده مفيش كون واحد وكل الأكوان دى فيها سكان والله أعلم اللى بجد فاكراه انى استغربت من كلامه بس مش عارفة قولت يمكن ده حقيقى فعلا ربنا قادر على كل شئ وده فعلا من أسرار الغيب اللى ربنا سترها عنا لسبب ما وربما أظهر لنا تلك الأشياء لحكمة هو يعلمها...........

    كل اللى يجب انى أقوله وأدعى بيه ربنا لا تجعل هذا يبعدنا عن رضاك وانما يقربنا إليك اللهم آمين

    موضوع كويس بس بينى وبينك الله أعلم هو وحده علام الغيوب

    ردحذف
  14. ايه شغل الرعب ده

    انا طول عمرى بكره الخيال العلمى

    بس بصرف النظر عن ده

    انا اساسا بدرس تاريخ

    ومهتمية بوجه خاص بالحضارة المصرية القديمة وناوية اخلى دراساتى العليا فيها

    بس انا سمعت الاشاعات عن الموضوع ده وكان الدكاترة بيكذبوا الحاجات دى

    على العموم انا منتظرة زيك رد الدكتور زاهى حواس

    وليك عليا أسألك كم دكتور من عندنا من دكاترة الاثار بس مش عارفة امتى عشان الامتحانات اللى فيها

    منتظرين تكملة للموضوع المثير للتفكير والجدل ده

    ردحذف
  15. اخى العزيز

    اكيد الفارعنه كان مصدر ازعاج لكل علاماء العالم وعلماء الاصار ولكن اخى العزيز منز خلق الله ادم عليه السلام حتى جاء نبينا محمد صلى الله عليه وسلم لا يكون ولا يأتى ولا خلق الله احد ألا على وجه الارض ولم يخلق احد فى اى مركذ من الكواب او الفضاء وهذا ما اتانا بهى سيدنا محمد صلى الله عليه وسلم والله اعلم

    ولكن هذا ما حكمهو عقلى انا قرأت فى السيره والفقه والسنه وجلست مع علماء حتى تأكت من وجه نظرى والله اعلم ايضا

    ولكن اخى العزيز الحقيقه واضحه من نحيت هذه الغرفه فما هيه الا غرفه ولا تنسو ان الفراعنه كان يشركون بلله فلا يجوز ان نأخذ بوجهت نظر هؤلاء القوم ترك لنا سيد الخلق محمد صلى الله عليه وسلم علمات الساعه الصغرى والكبره ويوم الحشر وشرح لنا احوال كل شيئ واسباب الساعه ونزول المسيح عيسى ابن مريم وظهور الدخال وخروج يأجوج ومأجوج

    ولا يقول ان الغرفه ستهلك العالم فما هيا الا وجهت نظر علماء لا يعرفون العقيده الاسلاميه ولا يقدسون كتاب الله ولا سنه رسوله فأكيد مش هيكون وصقين فى تركتنا من السنه والعقيده وشرح دقيق لعلمات الساعه

    اتمنى تكون وصلت وجه نظرى وهذا على حد علمى والله اعلم وما انا الى عبد من عبيد الله لا اعلم شيئ ولا افقه شيئ ان هوا الا كتاب الله وسنه رسوله

    ردحذف
  16. ما لا افهم فية لا اتكلم فية
    علشان ملبخش

    بس انا مع رأى الاستاذ ادم المصرى
    ولو ان فى شئ فيها خطر على البشرية كان سيخبرنا بيها نبينا ..فهو بعث رحمة للعالمين ..ليس للمسلمين فقط ..
    وطبعا الكلام دة كلام بشر يحتمل الصوا ويحتمل الخطأ.

    هذا ما استطيع ان اشارك بية ولكن نحن نريد ان نستفتى فية رجل اثار ويكون عالم بأمور الدين والاسلام ..ليقدر على الاجابة الصحيحة فى هذا الموضوع.

    تحياتى

    ردحذف
  17. السلام عليكم

    حاجه غريبه جداً
    ولكن هل لديك جديد
    متابعين بشغف

    وتقبل تحيتى ومرورى

    ردحذف
  18. مساء الخير

    البوست حلو بس انا بكرة الاثارة ومليش فى المتاحف والحجات القديمة بتخنقنى


    تحياتى

    ردحذف
  19. السلام عليكم اسلام
    تحياتى
    شوف يا اسلام
    انا تعبت من حكاية الاهرام دى .. انا قريت كتير عن الاهرام واكتر من 10 كتب والاشعه الكونيه وهجرة الدفن وحاجات كتير عن الاهرام

    تصدق بالله بعد دا كله ما انا فاهم حاجه ولا وصلت لحاجه

    فيه ناس بتقول ان البناء كان بالطوب المحمى على النار - بمعنى انه بيجيبوا الطين ويرصوه وبعدين يحموه بالنار وبعدين يبقى صخور

    وفيه ناس بتقول ان الاهرام بنيت بالراوفع الهيدروليكيه.

    وفيه ناس بتقول انه تم بناؤه بواسطة جر الاحجار فى شك حلزونى بواسطة البشر

    وفيه ناس بتقول انهم وصلوا الى سر انعدام الجازبيه وكانوا يجرون ذلك على الاحجار ويرفعونها الى مكانها

    وفيها حكايات كثيره واساطير كثيره

    ومن كل دا مش فاهم حاجه ولا عارف حاجه

    فيه بعثه امريكيه جات وعملت مسح بالاشعه الكونيه.. وما قالوش لنا ايه اللى حصل
    وفيه بعثه يابانيه جات وجابت معاها روبوت فى حجم الصرصار ودخلته الهرم وراحوا وما قالوش لنا حاجه
    وفيه بعثه فرنسيه برضه بروبوت واشتغلوا وراحوا وبرضه ما قالوش لنا حاجه
    وفيه بعثه صينيه
    وفيه بعثه انجليزيه
    وفيه بعثه روسيه
    والدنيا كلها صاحبة زمام العلم والتكنولوجيا جم وما حدش قال لنا حاجه والارجح انهم ما وصلوش لحاجه
    كله بيدور على غرفة الدفن وايه اللى فيها
    وما حدش وصل لحاجه او على الاصح لو كانوا وصلوا لحاجه ما قالوش لنا حاجه

    اوؤمن ومتأكد من انه هناك علوما مخفيه عن العامه وعن المتخصصين ايضا تقوم بها امريكا وروسيا. وهم من يملكون نواصى العلم والمعرفه.ولا يعرف الناس عنها شيئا ومخفيه عن الناس
    انا دى الوقت حاروح اشوف اللينك اللى عندك واشوف فيه ايه؟
    تحياتى

    ردحذف
  20. اسلام
    قرأت كثير من التعليقات وكلها على ما اعتقد تعليقات تنقصها الدقه
    فان رسولنا الكريم فى رحلة الاسراء والمعراج علمه الله علما لم يطلعنا عليه لان عقولنا قاصرة على فهمه. ولم يقل لنا الرسول الكريم عليه الصلاة والسلام عن تلك العلوم والمعرفه التى عرفه الله بها
    اى ان هناك اشياء يعرفها الرسول الكريم لم يقل لنا عليها لقلة عقلنا وعدم استيعابه لمعطيات كثيرة واشياء كثيره
    والعلوم الدينيه تقول ان هناك دابة ستخرج من باطن الارض من علامات القيامه وما يدريك انها ستخرج من تحت الهرم الاكبر مثلا او من اى مكان آخر ... مثلا مثلا
    غيبيات تخفى علينا.
    وتحياتى

    ردحذف
  21. بالنسبة لموضوع بنى الاهرام انا درسته

    وكمان هما اكتشفوا كم جثة ظهرها محنى نتيجة لعملهم فى بنا الاهرام وده نتيجة جر الاحجار وعمليات رفعها

    وطبعا لأننا فى مصر منزلناش وقتها اى رحلات ميدانية عشان اقدر افيد اكتر كل الكلام اللى عندى نظرى بس اللى درسته ان البناء كان عن طريق جر الاحجار فعلا وتفريغ الهواء فيما بينها وبالتالى مكنش فيه اى مثبتات للأحجار دى وكمان الفراعنة كانوا بيعملوا جبانة للعمال فى بناء الاهرام مكان يندفنوا فيه يعنى وكل الصور والكتابات التاريخية اللى اتعرضت علينا كانت بتؤكد ان الاهرامات مكان للدفن فقط ولذلك يتم تجهيزه إعتقادا منهم بالحياة الاخرى والخلود

    انا فى الموضوع ده ممكن اجيبلكم نصوص الاهرام المسجلة ومعانيها

    ردحذف
  22. يا خبر دة الموضوع كبير قوى وإحنا نامين ومش واخدين بالنا
    أحييك على موضوعك الهام والهادف

    ردحذف
  23. زماااان من أكتر من عشرين سنة كنت معجب إعجاب شديد بأنيس منصور.. أيامها كنت تلميذ بالمرحلة الإعدادية و قريت ييجى 20 كتاب من كتبه منها الذين هبطوا من السماء و الذين عادوا إلى السماء.. قراية الكتب من النوع ده كانت بتخلينى أحس بخليط من الرهبة و التطلع و الخليط ده تحديدا هو سر نجاح النوع ده من الكتب و سر شيوع الأفكار اللى فيها بالمقارنة بالكتب المتخصصة فى التاريخ و علوم الآثار و تقنيات تأريخ الحفريات و الكلام المجعلص ده.

    لكن الواقع إن حقائق ما نعرفه عن التاريخ ممكن تيجى بس من نتائج الأبحاث المنهجية اللى بيقوم بيها علماء فى الأثار بيفنوا حياتهم فى دراسة أدق التفاصيل و تجميع شذرات متناثرة و تدقيق أدلة مبهمة فى سبيل بناء قصة واضحة أقرب ما تكون إلى الحقيقة اللى طواها النسيان و من المستحيل إستعادتها بالكامل دلوقت.

    حلو البقيين الكبار دول؟..

    المهم.. هو مجهود أكيد كبير و تشكر عليه لأنك قدمتلنا قصة مثيرة و ممتعة.. لكن كون إن ده يكون له أى علاقة بحقائق التاريخ فهو شيئ بعيد..

    ردحذف
  24. صباح الخير

    المواضيع دي كلها معروفة من زمان اوي

    راجع بعض كتب انيس منصور و الكائنات الفضائية موجودة ده اعتقادي و ممكن تروح ليوتيوب و تكتب يوفو و شوف في فيدوهات لطبق طاير وقع في بيرو تقريبا علي ما اتذكر و هتلاقي الهيكل العضمي بتاع الكائنات دي

    تحياتي

    ردحذف
  25. انا شايفة بوستاتك الفترة الخيرة ومكنتش فايقة قلت اخليهم للاخر عشان اقراهم وانا مركزة

    اصلي بحب الحاجات دي

    بصراحة البوست دا عجيب فعلا

    هروح اقرأ الباقي

    تسلم ايدك

    ردحذف
  26. ياريت نعرف نعمل جزء من مليون من اللي عملوه الفراعنة
    احنا لحد دلوقتى عايشين علي قولة احنا الحضارة وياريتنا احنا اللي بنيناها

    ردحذف
  27. موضوع رائع

    ردحذف
  28. سلام
    عدم معرفتنا بالشئ لا ينفي وجودهاااااا

    ردحذف
  29. قصة قريبة للحقيقة شاهدو الفيلم الوثائقي كجب و الهرام

    ردحذف
  30. لااله الا الله ولو فى حاجة كده كان محمد صلى اله عليه و سلماخبرنا بها و كانت ذكرت فى القران الكريم

    ردحذف
  31. ma39oul w akid sa7 100%

    ردحذف
  32. كل شىء وارد ولكن لابد من تحليل علمى متخصص ودقبق مدعوم بحقائق وليس ظنون وشكوك

    ردحذف
  33. هنفضل لحد امتة الدولة المتخلفة الى انتو قراتوا دة حصل احنا شعب مش بنصدق حاجة ازاى الفراعنة قدروا يوصلة انو يعملو هرام بنفس مسار النجوم الدلائل كتيرة بس احنا مش بندورا الناس الى شافت اضواء فى السماء بلغ 10 مليون شخص كل دول هيكونة كدابين امريكا عرفى انهم هنا من زمان الرئيس جون كيندى كان هيقول الحقيقة علشان كدة اغتالوا و جيمى كارتر كان هيتكلم بس هما هددوا التاريخ ليس الاكذبة متفق عليها

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم