السبت، مايو 23، 2009

قررت اعمل اضراب جديد...الوضع بقى مش مستحمل يا جدعان

بشكركم على كلامكم الجميل والمؤثر فيا فى البوست اللى فات
ويا ابناء شعبى البار ، قررت تانى قرار اخده فى حياتى
هنعمل اضراب ...اه هنعمل اضراب
ولازم لازم تشاركونى فيه كلكم
احنا خلاص زهقنا ، خلاص بجد تعبنا
مش كل شوية وانا قاعد على الكومبيوتر ، وانا صاحى ، وانا نايم الاقى جيش واساطيل وفرق جوية نازلة عليا قرص
ولما بصحى وابص لنفسى الاقى اثار الخسائر كتير اوى ،..اهئ اهئ

انا النموس ضرب سكور عالى فى مص دمى يا بشر
لازم من دلوقتى نعمل اضراب ضد الناموس
دانا لما بجهز اسلحتى وابدء اضرب فيه بالرش ، الاقيه بيغظنى وبيروح طاير قدامى ...حاجة بجحة اوى يعنى

عملت معاه كل المحاولات ، رش ورشيت ، جبت فوطة وقعدت اضرب ومفيش برضة ، حطيت نفسى تحت اللحاف وعنده قدره لا متناهية فى اختراقه




مطالبنا من كبير النموسنجية
1- يطلعوا فوق الهرم ويمصوا من الناس اللى فيه ...احنا غلابة وملناش فيه
2-يحدو من ازمة التطورات اللى فى مجتمعهم ، عمر الحق ماكان يمنعهم
3- اتاحة الفرصة لمزاولة الاعمال من الساعة 1-3 ، وبعد كدة ياخدوا اجازة
4- غير مسئولين عن موت او فعص او رش اى واحد منكم
ولو ماوفقتوش عن االمطالب دى ... هنكمل اضرابنا ، وهندخل حرب بقى



وعلى العموم ، تنبيه لجميع المدونين ، رفع حالة الطوارئ والبدء فى تدريب ماليشيات

جميع الحقوق محفوظة لمدونة اصحى يا مصر

هناك 30 تعليقًا:

  1. اول تصويت لصالح الاضراب
    ربنا بجد يكون فى عونك
    تلاقيها منين والا منين

    تحياتى دوما

    ردحذف
  2. هههههههههههههه
    انا الناموس
    قتلنى خلاص
    ده يا اخى
    غريب
    بيقولك يأخذ المبيد
    و تلاقيه مسخسخ على روحه من الضحك
    مش فارق معاه
    خلاص
    ههههههههههههههههه

    تدوينة حلوة

    ردحذف
  3. معا ضد الناموس
    بس اهم حاجة فى الموضوع دا الاسلحه
    http://kot-cha.blogspot.com/

    ردحذف
  4. بس الخوف من الامن المركزى الناموسى
    يهجم علينا فى الاضراب
    وينزل فينا قرص
    ويسقط منا بعض الشهداء ضحايا اللدغ
    بسبب فقر الدم
    ممكن ترجع للحلول القديمه
    شمعه وكبابه مياه
    وبعدين احنا لسه فى بدايه الصيف
    وباقى الناموس لسه مصحيش

    ردحذف
  5. هههههههههههه
    ايه ده ربنا يعييينك يامستر
    انا بايدك طبعا بالاضراب ده
    بس شو ف مين هيعبرنا
    ههههههههههههههه
    لا بجد
    موضوووووووع
    بجننن
    وهنشوف
    يا احنا ياهم
    واحنا وراهم والزمن طويل
    هم فكرين نفسهم ايه
    هم شوية نموس
    ايه يعني صغير وبيطير
    محنا كبار وبنمشي كمان
    هههههههههههههه
    وهنوريهم
    تحيـــاتي

    ردحذف
  6. ناموس دراكولا بجد.....هو اسمه باعوض علشان كبير وبيدخل جوه الغطا
    معاك فى الاضراب ان شاء الله....والهمه عاليه وهنقدر عليه
    معا ضد الناموس
    دمت بخير.......تقبل مرورى

    ردحذف
  7. ههههههههههههه

    امشى يا ناموسه يا مفعوصه متقرصنيش

    يا بنى انت محتاج حل قوى

    بس مش عارفه ايه هو

    ردحذف
  8. يا اسلام النموس كتر فى الاونه الاخيره دى عشان احنا نضفنا والخربات انقردت والحدائق قلت وكثره الاشجار والمسحات الفضيه طينتها يعنى نخلص من نصيبه تطلع لنا كرثه وربنا يكون فى عونا بس الحمد لله عندنا فى المهندسين الناموس مش كتير يعنى فى البيت وانا نايم نادر جدا لما اقفش نموسه تكون متمخطره عليه واكيد بكلها بل قلم على وشها واجبها أرضن وش

    ردحذف
  9. السلام عليكم

    هههههههههههههههههه
    اول ما دخلت وشوفت اضراب حاجات كده قولت خير فيه ايه


    لقيتك عامل اضراب عشان خاطر النموس
    بصراحه يا سلم انا لا اعانى من هذه المشكله فى بيتنا ابدا والحمد لله والكيتو عمره ما بيدخل غرفتى
    انا بعانى منها لما اسافر فى الشغل وبس بس اليومين دول السفر قل خالص ومستريح من الصواعق النموسيه

    ردحذف
  10. سيبهم يابنى يمصوا احنا اصلا بقيت فينا حاجة تتمص انا اعتقد ان الناموس المصرى اصلا عنده فقر دم وبلاوى من الدم الملوث اللى بيمصوا مننا

    ردحذف
  11. ههههههههههه
    الناموس
    عادي يعني
    الواحد في الكام سنة اللي فاتو اتعود
    هههههههههه
    المشكلة بقي ان الناموس السنة ديه مبقاش ناموس
    حاجة كده شبه الجراد
    ماشاء الله متربي علي الغالي
    وجيناته الوراثية اتغيرت
    ولارش ولا اقلااص كيتو العبقرية بتأثر
    مفيش بقي غير المقاومة اليدوية
    وربنا يقوينا
    ههههههههه
    سلام

    ردحذف
  12. ايه ده ناوى تضرب مين استنا كده النموس طيب استنــــــــــــــــــونى أنا جاية أنضم معاكو هو لا كيتو نافع ولا رش نافع ولا أى حاجة خالص ده زى ما يكون عندهم مناعة لا والمشكلة انهم زى ما تقول كده خير اللهم أجعله خير ترش عليهم ويقولولك كمان وتلاقى الواحدة منهم عندها بجاحة غير متناهية بتبص لك بعين ونص وانت بتحايلها انها تمشى لدرجة انك مش فاضل غير انك كل شوية تضرب نفسك علشان تموت واحدة وان ما اتصابتش من لسعتها تتصاب بايدك بس طمنى عندكوا سلاح جديد وكويس ولا هاجى الاضراب وهنضرب طيب انا هاجى وأعمل حسابى وهجيب معايا كل أنواع المبيدات الحشرية وربنا معانا فى الحرب دى

    اوعى تمشوا من غيرى أنا جاية جاية ولو اتأخرت يبقى راحت عليا نومة فبلاش تصحونى

    ردحذف
  13. ياااااااعينى صوعبت عليا والله..
    بس لفت نظرى حاجه مهمه جدااا ان مصر والمصريين مستحملين حجات كتير اوى حتى الناموس تخيل:)

    ردحذف
  14. (:
    أنا معاك في الاضراب
    (:
    ياخوفي يفتكرو الناموس ده رمز
    (:
    ولا تطلع أساسا بتكتب بالشفرة
    (:
    (:
    تحيــــــاتي

    ردحذف
  15. انسى يا اسلام

    الفاضي كلها محاولات ستبوء بالفشل

    ههههههههههههههههه

    يابيه اخوك اللي بيكلمك دلوقتي عمل حاجات أبشع من كده ومفيش فايدة

    لدرجة اني بقيت اجيب له أقراص الكيتو ياكلها .. واجيب له الرش وبقى يبللللع بيييييييه

    ههههههههههههههه

    وجي تقولي اضراب لالالالالالالالالا ياعم

    دا ملوش حل غير السلاح النووي
    ههههههههههه

    بوست جميل جدا

    دمت في حفظ الله

    ردحذف
  16. لا يا جماعة انا مليش دعوة بالاضرابات

    انا بمشى جنب الحيط

    ههههههههههههههههههههههه


    طب ما تجرب يا اسلام المفاوضات

    ممكن يحصل سلام فى النهاية ونقدر نتعايش مع النموس

    :D

    ردحذف
  17. صباحك سكر يا اسلام
    انا معاك قلبا وقالبا فى الاضراب
    اهىء اهىء اهىء اهىء
    الهجوم بدا والخسائر كتيرة اوى
    لازمنا ولا بد نشوف لنا حل يا كبير
    احنا نعمل رئيس و تفاوض مع الشغب دا اما يعيشوا بينا فى سلام وامان على راى المثل
    يا نحلة لا تقرصينى ولا عاوز عسل منك
    اما الحرب الحرب عليهم بقى ونعمل فى الاول اضراب
    لا ناموس بعد اليوم
    و الناموس الناموس لا حياة مع الناموس
    ههههههههههههههه
    ههههههههههههههههههههههههه

    بوست زى العسل يا اسلام
    تسلم ايدك و الله
    تحياتى
    يويو

    ردحذف
  18. لالالالالالالالا
    هو الناموس فى كل حتة..وانا اللى فاكرة عندنا بس...لا يبقى لازم اضراب

    والل الواحد حاسس انة بيتبرع بدمة للناموس..غصب.

    مع انة مبيهموش فصيلة o ولا A ولا حتى z

    انا معاك هنلبس احمر..ونرفع اعلام مكتوب عليها..لا للنموس

    تحياتى

    ردحذف
  19. اسلام
    تحفة بجد
    انا شخصيا هعلن معاك حالة الطوارىء وكمان هشترك فى الاضراب
    الناموس بقى حاجة مزعجة
    انا ساعات بحس انه هيضربنى
    تحياااااااتى

    ردحذف
  20. محدش رد عليه بردو وقالى الاسلحه هتكون ايه يعنى شباشب ولا هنشتر اقراص ولو هنشترى مين اللى هيدفع اه انا مش هضرب وادفع كمان

    بس اهم حاجه ترقبه الطريق كويس

    ردحذف
  21. لا يافنان
    انا شايف انك متهاون معاهم كده قووووى
    انا بقول اننا نعلن الحرب على طول وناخدهم على حين غرة
    بس هى المشكله فى الاسلحه
    مش عارف ايه اللى ينفع معاهم
    اقراص وجبنا
    سايل وحطينا
    رش ورشينا
    تلطيع ولطعنا لما الحيطان باظت
    احنا لازم ندور على المنبع
    والضرب يكون من هناك
    علشان نقدر نقضى على هذه البؤرة الظالمه لنا كبشر
    (عاجبك كده ادينى هيست من كتر الناموس)
    ههههههههههههههههههه
    سلام

    ردحذف
  22. ههههههههههههههه

    أنا أؤيدك
    و مشاركةفى الاضراب من قبل ما يتعمل

    يعنى كمان كان ناقص الناموس

    دا حاجة صعبة

    ردحذف
  23. ياسيدى كل واحد وله رزق
    هتشارك النموس وتعترض على رزقه
    ده انت عجيييييب
    (:

    ردحذف
  24. على فكرة
    هادي تالت مرة ببعتالتعليق وما بيطلع :(
    انا بالاول خفت وقلت شو اضراب هو نحنا ناقصين مشاكل ووجع راس
    بعدين لقيته اضراب من نوع تاني فعلا محتاجينه ويمكن يكون مجدي اكتر من باقي انواع الاضرابات
    لانه بصراحة الناموس ما عاد ينفع معه شي
    ولا ريد ولا فيب ولا شي وكانه اخد مضادات الهجوم كلها
    هههههههه

    يسلمووووووووو
    سرد روعه عنجد وممتع

    ردحذف
  25. اضراب مشروع وانا هاشترك معاك بناموسية وهاتف واقول اوعي ياناموسة ياغلوسة ما تقرصينيش
    تحياتي يا اسلام

    ردحذف
  26. والله عندك حق
    انا عندى ليك حل
    ركب سلك على كل شبابيك الشقة ومداخلها هاتخلص مشكلتك
    انا وامى ساكنيني فى منطقة سكنية واحدة وهى عندها ناموس على طول مع انها اغلب الوقت مقفلة وفاتحة التكييف عشان الناموس
    وانا عشان عندى سلك ما عنديش ولا ناموسة

    ردحذف
  27. هههههههههه
    انا اول واحدة هشارك فى الاضراب دا لانى اكتر واحدة الناموس عاملها مشاكل
    تحياتى
    تقبل مرورى

    ردحذف
  28. ايه ده

    انت امتحاناتك خلصت بسرعه ليه كده يا اسلام اشمعنه انت ؟؟؟؟؟؟؟؟؟

    د انا لسه هبدا يوم السبت

    وبعدين ايه حكايه الناموس معاك

    هههههه

    عموما انا مش عندى نامووس
    نياهاهاها

    ولو جه عندى هبعته ليك اتفقنا

    فين يا راجل انت القالب ؟؟؟؟؟؟؟؟ ولا انت طنشتنى ولا ايه الحكايه ؟

    ردحذف
  29. ههههه لا جامد أوي موضوع الإضراب ده ..أهو على الأقل اللي بالي بالك مش حيزعلوا :) فهمني طبعا يا إسلام ..أنا معاك خاصة إني كنت منزلة من كام يوم بوست عن الناموس و أنت عارف بقى دخلت الصيف ..و خاصة مع الناس البيض أجارك الله يعني خير اللهم أجعلة خير بيورموا و يزرقوا و كده ...يعني أنا عندي ولاد عمتي ..ناموسة واحدة كفيلة أنها نخلي البيت كله مورم و مزرق و مصاب بحكة و لا بتاعة الجرب و طبعا أنا الحاجات دي و لا بتأثر فيه ...لا لا معالك حق في مضوع الإضراب ده و أنا معاك لكن يا ترى يا هل ترى لو الناموس لجأ للعنف و العصيان و رفض المساعي السلمية زي إسرائيل ما بتعمل نعمل إيه مع الناموس ؟!! عاوز رأيي ؟!! نسيبلهم البلد و نلم عزالنا هما الأكترية :))
    سلاااااام و و فقك الله في الصلح مع الناموس ، متقطعش الجوابات بقى

    ردحذف
  30. السلام عليكم ايه يا اسلام الحرب دى على نموستين نونو ياريت تشوف اللى عندى بضرب النموسة وبرضه تطير معرفش ازاى ههههههههههه والناموسة لظلوظة شكلها يخوف اصلا وخاصة لان جنبنا مزارع ويا سلام بقى لما يتزرع الرز الحرب حتزيد سلاااااااااامى

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم