السبت، مارس 06، 2010

عودة طرووق


امشى من وشى...
هكذا قالتها ام احمد فى حده وانفعال ..، وهى "تسك" الباب بشدة فى وجهة ..، وجه ذلك الشاب الوسيم صاحب (السكسوكة) وشعر تيمو زا كنج اوف جنيريشن ، والتى شيرت الاسود عليه كلمة "Im Hot Boy" .

لم تكن ام احمد فى نيتها من الاساس تهزيق ذلك الشاب ..، او حتى ترمى الباب وشه ،.. ولكن من غباءه الشديد وحبه وعشقه المتيم بالنسوان ..ادى الى ذلك ، حيث دار بينه وبين ريهام ابنتها صاحبة الثمانية عشر ربيعاً وخريفاً وصيفاً وشتاءاً وكل حاجة (بأمانة الواد كان عنده حق يبلم اول ما هى فتحتله الباب) ، وهكذا دار الحديث :

تك تك تك..، سسسسززززييييء
ريهام : ايوة ..ميييييين ؟؟
هو : السلام عليـ...ــــ..ـــ...ــ.ـ.
ريهام : وعليكم السلام ..اؤمر.
هو : انا مأمورش ...دانا عبد مأمورك ..دانتى اللى تؤمرى .. يخربيت ام اللى يجى ف يوم ويؤمرك ..(فى سره طبعاً)
ريهام : اؤممممممر
هو : انا يافندم مندوب من شركة ايزو ايزو كلين للمساحيق العادية والملونة والاوتوماتيك .. حضرتك عندك وقت تعرفى ايه معايا؟
ريهام : لاء مليش نفس .
هو : حضرتك مش بتشوفى اعلاننا .. ياست حنان ياعم امين .. فرفش واغسل بأيزو كلين ، لو كنت رفيع ولا بدين ..
ريهام : هههه.. ياعم قولتلك مليش نفس .
هو : طب ولا حتى سندوتش جبنة؟
ريهام : انت جاى تهظر بقى؟
هو : لا انا جاى سكر زيادة .
طبعاً هتقولولى عرفت اسمها منين ....
----- فجأه .. تقاطع ام احمد الحديث بقولها : بت ياريهااااااااااااام .. مين اللى ع الباب يا بتتتتت؟؟
هو : على فكرة ماما ذكية اوى
ريهام : دا واحد سئيل اوى ياماما
( وهكذا دارت العاصفة)
----------------------------------------------------------
إنه طروووق ..، شاب من شباب مصر ..، انسان طيب ، معروف فى حتتة بالأحترام (صحبة السيدات الكبار منهم والصغار) معروف بالألتزام (ممكن يسهر برة البيت بس اخره 3 الفجر) ، شخص كميائى بالفطرة (يعشق الترامادول والتامول والايبسبيبليول واى حاجة اخرها اول) ، ملوش ف المخدرات (ممكن حشيش بس) ..، وعندما تسأله بمن ترجح ان يتربع على عرش مصر....يطلع يجرى .

للأسف من حظة الزفت ..، انه عدى على كل البيوت ..، وكان اخر بيت حاول يدخله فوجئ انه ذات طابقين .. يعنى الحمدلله مش هيطلع ولا ينزل كتير .. حاطت امل ان المنتج بتاعه هيتباع .. وهو يستكمل اللعن فى اصحاب الشركة واللى شغالين معاه .

هكذا عاد !!

جميع الحقوق محفوظة لمدونة اصحى يا مصر

هناك 8 تعليقات:

  1. مواصفات طروق دى بصراحة هايلة عريس لوقطة فى الزمن ده

    بس حلوة بجد الحكاية دى لذيذة وخفيفة وواقعية

    ردحذف
  2. حمدلله ع سلامه طروق وأهلا بعودته D:

    قراتها وأنا بشرب كباية النسكافية بتاعتي كل صبااح وصحصحتني أكتر من النساكافيةD:

    ودا ان دل على شيء هيدل على الابداع وخفة الدم ..

    متابعه دايماً ان شاء الله :)

    خالص إحترامي ،،

    وأدي ورده لكل حلقة :)

    ردحذف
  3. ايه دا طرووووووووووق بيلعب بديله من ورا جيجى تفاريح بس مفيش مشكلة من جيجى لريرى يا قلب لا تحزن ههههههههههههه

    ردحذف
  4. هههههههه فرحان اوى انه رجع

    ردحذف
  5. انا متابعه من سكات فتره طويله

    بس عوده طروووق اخرجتني من صمتي علشان اقوله حمد الله ع السلامه

    تحياتي

    ردحذف
  6. هههههههههههههههههههه

    حمدالله ع سلامة طرووووق وفى انتظار الجديد دايماً

    ردحذف
  7. حمد الله على سلامة طرووووووق
    ويارب ميغبش تانى

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم