الأحد، مارس 14، 2010

جــمــهــوريتى ..العظمــى



ابناء شعبى البار ..
تكملة للبوست السابق ، نستكمل ...
علمنا علم مصر
الاحمر دمنا
الابيض قلبنا
والاسود ابن ال(تييييت) عدونا
اما من ناحية النسر ..
فأكيد خاف ليجيلو روماتيزم فطار
او مثلاً ممكن يكون شاف "نسراية " وراح يخرج معاها
او ممكن تكون رجليه وجعته
المهم احنا مش ف النسر دلوقتى

بس من دلوقتى، نويت اغير علم دولتى ... هيبقى لونين مميزين
الاحمر علشان معدش حد عنده احمر
والاسود مش علشان عدونا ... لا لا لا ... علشان دا بقى اللون الرسمى للأيام
ونظراً لوصولنا تحت خط الفقر .. فرجحت انى احط عين نفرتيتي علشان محدش يحسدنا ، وتحت المقولة الشعبية المعبرة (العين صابتنى ، ورب العرش نجانى) .
احنا ف الدستور .. ومن ناحيتى نويت اغيرلكم الدستور .. ، ودستورى هيتماشى مع كل شخصية ف مصرنا ، علشان هو اللى هياخد باله منكم ..، منا مش فاضى بقى هسمع كل واحد واخد بالى من كل واحد .

اولاً - الـــــدولــــة ..طن طن طاااا
المادة (1) : دولتى دولة ديمقراطية ناصرية اشتراكية شيوعية اسلامية مسيحية يهودية (علشان الكل يبقى مرضى) تقوم على اساس المواطنة ،.
المادة (2) : السيادة "لمجلس الشعب" ، لأنه مصدر "السلاطات" ، ويمارس مجلس الشعب هذه السيادة ويحميها ويصون الوحدة الوطنية على الوجه المبين فى الدستور..(ولا مانع من استقبال الرشاوى )
ثانياً : - مقومـــات المجتمع .. طا طا طن طشششش.
المادة(3) : متأمنش لست ..، غير للحاجة
المادة (4) : خليك عيل حدق ومدقدق
المادة (5) : اللى يضحك عليك اضحك عليه .. اشمعنى هو يعنى؟
المادة (6) : لو الحاج مدكش المصروف اقلب فلوس الدرس
المادة (7) : البنت العانس يصرف لها عريس من احدى جمعيات التضامن الاجتماعى ، والعريس اللى مايوافقش يحاكم بالسجن المشدد
المادة (8) : لو السجن اتملى بالعرسان ..، ودا اللى ممكن يحصل ، ارموهم بالرصاص مهى المبلة مش ناقصة طين
المادة(9) : اللى عايز ياكل العيش ف بيته ، مفيش مخابز ، محنا مش كل شوية هنعمل مشاريع الفصل والدمج ونقلب الدولة وفلوسها
المادة(10) : لو معندكش دم... ممكن تعمله داونلود من على الانترنت

...........هنكمله بقى البوست الجاى وهنراجع باب الفيس بوك والاقتصاد



جميع الحقوق محفوظة لمدونة اصحى يا مصر

هناك 4 تعليقات:

  1. ولا أروع من كده رأيس ،،

    بس مدام جيت ع مزاج الناس البلد كده هتخرب أكتر D:

    أهم حاجة موضوع العيش والجواز دا هم اللي هيظبطو البلد D:

    رئـــــــع كالعادة ومبدع :)

    ردحذف
  2. لو دا الدستور الجديد

    أنا أول واحدة هنتخبك

    رئاسة موفقة بإذن الله

    ردحذف
  3. :::))))))))))))

    ينهار ابيض يااسلام
    دي دولة ساكالااااااااانس خاااااااالص


    ضحكتني خاااااالص

    بس علشان تنجح بلاش تعض في الستات طاوعني
    لا ماتلحقش تتهني
    وتلاقي نفسك متعبي وكيسين تلاته كده لونهم ازرق
    ::))))))))

    وعموما سير علي بركة الله
    كلنا ورائك
    ومادام هنجيب دم خارجي معمول من دون لود يبقا
    بالروح بالدم نفديك يا اسلاااااااام

    سلامي

    ردحذف
  4. مشكور على المدونة الجميلة :) و بالتوفيق دائما

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم