موضوع الصباع

الصباع بقى مهم لكل واحد فينا ،  لإننا دايماً بنبصم بيه  ، بنمسك بيه ، بنشاور بيه (الأعمال بالنيات) ، بنضغط بيه ، وساعات قليلة تلاقي بنت حلوة بتضغط عليك بصباعها زي الزرار وبتقولك : إنت .. وتسكت ! .

وقد يستمعله النساء اثناء الردح بطرق عده ..، فعندما يطول الحديث اثناء عملية الردح تقوم احدى السيدات برفع صباعين في وسط كل يد في حركة صعود وهبوط منتظمة وهي تردد في سخريه : جرى إيه يا عووومااااار ؟؟!!!. 

تلاقيه ساعات شرير .. لإننا مينفعش نضغط على الزناد ..إلا بيه ، او لو حد عاكس البنت اللي ماشية معاك ..هتخزقله عينه بصباعك برده ، او لما تيجي تشتم حد على الفيس او الياهو ..، او تسب  لصاحب الخبر في تعليق ، هتضطر انك تدوس على انتر ، واكيد هتدوس عليه بصباع من الخمسة .

نستخدم الصباع في حالات "التشويح" اللا ارادي ، او عند الحلفان بالطلاق بالتلاتة -فتقوم لا ارادياً - برفع اخر 3 اصابع من يداك - او حينما تقول " انا بحذرك" ، فترفع صباعاً واحد .

لحظة تصوير الصوبع بقت من اللحظات الفارقة في حياتنا ، وكان من اللازم ندي له حقه لإننا بنستخدمه في حاجات كتير بصرف النظر على انه اكتر مكان بيتعلم عليك فيه ..(متنساش انك لما تلبس الدبلة فيه بيعرفوا انك خاطب فينفضولك) ، او ياااه بقى لما تكون مربي الضوفر بتاع اخر صباع دا..العلامة المميزة لأي عاطل .

او لما تيجي تعاكس حبيبتك /خطيبتك/مراتك .. وتقولها : يخربيت صباعك العسل دا يا روحي .. دول احلى من قرع العسل ، بس يارب ميطلعش كلامي صح ويطلعوا احلى من قرع العسل ..علشان ساعتها ممكن تتهمك بالبكش وتديك ضربتين بال 5 صوابع .

 الحس الوطنى ادى لإشعال روح المواطنة داخل كل صباع ..لإن كل الناس اتصورت وهيا متعلم عليها-لامؤاخذه .. متعلم على صباعها بالحبر الفسفوري ، وقد امتد الأمر إلى تصوير الصباع في أمر وأصعب اللحظات الإنسانية ، وهي يوم ما تبصم على ورقة جوازك ، او لما يجيلك عيل ، او لما تعمل فيش وتشبيه ، او لما تقف على الدبابة وترفع صوباعينك الجوز ..علامة على النصر .

إسلام جاويش

جميع الحقوق محفوظة لمدونة اصحى يا مصر