الأحد، مارس 02، 2014

عن الورقة

في صباح 15 ابريل 2008 عملت المدونة دي ، واخدت اسم مستعار علشان ملاحقة امن الدولة لأن كان عندي نية لله اني افشخهم :)) ، ما علينا من الكلام دا بس رجعت لذكريات يمكن مش بعيدة حوالي 6 سنين ، حاولت فيهم اثبت وجودي واحقق احلامي اللي حلمتها وانا صغير ، فشلت في حاجات ، ومنجحتش في ولا حاجة الا يمكن الدراسة .، بس ف نفس الوقت مكنش عندي يأس وكنت حاسس ان هيجي يوم وهيغير معنى الحياه على الاقل نسبياً ، واليوم دا ربنا كاتبهولي اني مش هشوفة الا فاجأه ، في خلال ال 6 سنين صاحبت ناس وخاصمت ناس وعرفت ناس وحبيت ناس اعز ناس وخسرتهم ، وكسبت ناس تانية اعز على قلبي ، وكل يوم ياما هنشوف لأن الايام اثبتتلي انها دروس بتعدي علينا وياتستفيد منها يا هتركنك على جنب .. بحاول استفاد منها بأي طريقة ، محاولاتي للوصول لإيجابيات في حياتي والحمدلله فشلت كانت مجرد اجتهاد ، للفشل ، ومقتنعتش بدا الا لما ركزت وحطيت في دماغي كل اللي فات وعصرته وعجنته وطلعت منه مواقف اثبتت لي ان الدنيا لسة هنشوف منها كتير .
بالنسبة للمشاريع اللي دخلت فيها وفشلت فهي كتير ، نقدر نقول فشل بالنسبة للإمكانيات وقلتها ، فشل بالنسبة للموارد البشرية ، فشل بالنسبة ان الحلم كان اكبر من طموحي ، فشل بسببي وبسبب كسلي احياناً ، مقدرتش اركز في شئ لأني كنت بحب حاجات كتير وجربتها .. ، بس زي ما النجاح له لذة .. الفشل برضه له لذتين .. لذة انك بتتعلم منه ، ولذة انك بتصبر وبتقاوح يمكن الزمن يتغير ، بمجرد تفكيرك في طموحاتك .. وتحط علامة اكس على كل المواقف اللي قابلتها في حياتك غلط ، هتلاقي انك بتحققه خطوة خطوة ، الصبر نفعني كتير في الكلام دا .. ولولاه مكنش زماني حققت حاجة من الحاجات اللي نسبتها للنجاح .
اصحي يا مصر مدونة بقالها 6 سنين ، عشت معاها ايامي بحلوها ومرها ، بجمالها وسعادتها وحزنها ، كتبت فيها كل شئ كان بيدور على بالي من غير اصطناع او تزييف او هرتلة زايدة ، يمكن مكنتش  مطور نفسي في الكلام او اللغة بس الحمدلله طورت نفسي ، وحتى لو اخدت بالكم من البوستات القديمة هتلاقوها كدا كلها ، وعلشان انتزع الخوف في يوم من الايام وقبل ثورة يناير غيرت اسمي من اسلام ديو الى اسلام جاويش ، وبعد ما اشتغلت مع حركات سياسية من غير ما انضم ليهم ، ومن شغلانة دي للشغلانة دي ، ودروس بتديهالنا الحياه كل يوم .. ركزت في شئ جه على بالي وحكيته لصديق مقرب ليا مهم ، وقولتله بالنص
انا نفسي اعمل شخصيات جديدة .. تكون ملهمة للناس ، الناس تحبها وتبقى جوا قلوبها .. زي ما جرب ديزني ونجح
مكنتش اتوقع ان "ورقة " بشلن هتعمل الشبه ضجة اللي عملتها على مواقع التواصل الاجتماعي ، ومكنتش اتوقع ان "ظيظو وصفية وصابر وفرج وصفوان " هيدخلوا قلوب الناس دي ، بس زي ما قال والت ديزني ان النجاح ابتدى ب "فار " .. ممكن جداً يبتدي ب " ورقة" .
مش هنسى اليوم اللي كنت سهران فيه على تويتر وزهقي من قاعدة ال 140 حرف ،  وابتديت ادون اول ورقة .. ولما نزلت والناس حبيتها وعملتها ريتويت انبسطت :)) ، وحسيت لأول مرة ان في ناس ناوية تسمعني وتشوف الشئ الجديد ده ، ومن اللطيف ان اول ورقة عملتها ف حياتي كانت دي :

بالمناسبة انا كنت شايف الكاريكاتير بيمر بكذا مرحلة مهمة ، وممكن الرسمة تقعد معايا كاريكاتير ، ابتديت هنا مثلاً على المدونة كنت برسم الرسمة على ورق واخده اسكانر واعدل عليه بالفوتوشوب ، لحد ما اشتريت تابلت بأول فلوس شغل اقبضها ، وبعد كدا اشتريت جهاز بقيت برسم عليه دايركت من خلاله وارفع الرسمة ، التطور حلو برضه مفيش كلام ، بس تعبي مراحش بلاش على المدونة دي .. كل كلمة كتبتها هنا تقريباً ومكنش حد بيبصلها .. اتحولت لإسكتشات واترسمت ووصلت لناس كتير ، يمكن دي اكتر حاجة بسطاني لحد دلوقتي .
منساش ناس كتير وقفت جنبي ، وحبي لشركتي ورئيسها احمد المتولي اللي ساعدتني اوصل للي انا فيه ، محبتي لمصطفى درويش واسامة علي اصحابي واخواتي اللي عملوا اللي عليهم انهم ينجحوا مشروع الورقة :) ، وفريق الاعداد وفريق التحريك ، والناس زمايلي اللي عشت معاهم احلى ايامي ، وابتكرنا حاجات كتير وفشلنا في حاجات اكتر .. بس لسة في امل 
ناس كتير شكرتني اني رسمت البسمة جوا قلوبها .. دا اقل شئ يتعمل معاكم في ظل الاحباط ده ، ولله لو اعرف الموضوع هيأثر فيكم من البداية لكنت عملته لكن حكمة ربنا بقى :) ، ويارب الناس كلها تفضل في سعادة على طول 
الحكاية ابتدت بمدونة ، وصفحة على الفيس بوك ، ودلوقتي بنحضرلها لفيديوهات على اليوتيوب .. وان شاء الله معاها لحد ما توصل برة مصر واحقق طموحي في توصيلها للعالمية ، الورقة كانت مجرد حلم حلمته في يوم من الايام ، من زمان ، ودونته وحكيت عنه بس بصورة غير مباشرة في كتابي "لبن العصفور" ، وان شاء الله احنا معاه لحد ما يكمل :) 

إسلام جاويش

هناك 3 تعليقات:

  1. :) احساس حلو اوي انك تعافر و توصل في النهاية لحاجة ... و النهايات بتوصلنا دايما لبدايات جديدة
    و احلى شيء في الوجود انك تشوف الحاجة اللي انت بتديلها كل تفكيرك ناس كتير غيرك تحبها و تأثر فيها #شغف

    موفق دايما باذن الله و من نجاح لنجاح :)

    ردحذف
  2. بص بجد انا واحد من الناس اللي قعد يفكر كتير في سبب نجاح الورقة وكنت عاوز اتعلم الرسم مخصوص عشان اعجابي بيها وبوصولها للناس بس مكنتش اعرف ان وراها قصة كبيرة كده لان وراها شخص محترم زيك , تمنياتي ليك بالتوفيق ويارب تفضل من نجاح لنجاح ويارب يكون حب ربنا ليك اكبر من حب الناس , تحياتي

    ردحذف
  3. لما قريت كلامك لقيت إن فى كذا جملة قلتها أو حسيت بيها أنا بردة قلتها بس فى الحاجات السلبية زى إنى صاحبت ناس و خسرت ناس كتير و منجحتش فى حاجة غير الدراسة و الفشل الكتير زى إنى حاولت أشتغل فى كذا حاجة بس مع الناس الغلط للأسف : فشل بالنسبة للموارد البشرية .. وفشل بالنسبة للإمكانيات وقلتها ، دة غير إنى بفكر فى حجات كتير جدا و نفسى أجرب حجات كتير مش عايزة أشتغل فى حاجة تقليدية و الروتين و الملل ياريت أسمع نصايحك و إللى عملته فى بداية حياتك عشان تمر من المرحلة دى .. بجد ربنا يوفقك إنتا إنسان طيب من جواك و بسيط و واضح و دى أكتر حاجة بتوصل للناس من الورقة .

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم