كل سنة وانتى غالية عليا

من اول ما تولدت ، حسيت بكل ما فى الدنيا من حب وحنان ، عرفت طعم الحنان من حضن بيخلينى اروح فى دنيا تانية ، رسمتلى معالم ضحكتى بجميع فرش المشاعر والاحساس الطيب ، جت على نفسها كتير اوى علشان متحرمنيش من اى شئ ، بتسهرلى كل يوم ، بتخفف عليا دموعى ، بأديها تمسح كل احزانى ، بمشاعر الأم المصرية اللى روحها اجمل من اى ام فى الوجود ، اللى بتخاف على اى شخص مش مجرد انه يكون ابنها وبس ، هى...كل شئ ليا فى الدنيا ، ساعدتنى انى اتفوق ، واكون انسان ليه قيمة ، ..ساعدتنى انى اكون مبدع ، ولما كبرت لسة فى عنيها مرسوم الطفل الصغير اللى محتاج اللى يطبطب عليه ، وياخد بأيده ، دا كله من حنانها ليا ، وعطفها ليا ، مش عارف اقولكم ايه لأنى بجد لو قعدت احكى واحكى الحكايات هتطول وقصصنا هتطول ، يارتنى ارد لها ولو 1% من الجميل ، اللى هفضل شايلهولها ، وفى اليوم الجميل دا ، اللى هو عيد الأم بقولها كلمة بجد ليها لوحدها ، وبقولهالها قدام كل الناس ، يا اعز ما املك فى الدنيا :
كل سنة وانتى غالية عليا
ابنك اسلام

تانى حاجة عايزكم فيها ، مش بس فى ام واحدة فى حياتى ، لا لو سمحتم انا ليا امهات هنا برضة ، لما دخلت حياة التدوين ولاقيت فيها عيلتى واخواتى وامى وابويا وكل ما هو مدون فهو قريب لي ، وفعلاً احنا لو دخلنا يا جماعة مدوناتهم هتعرفوا قيمة الحب دا وهتشوفوا بيكتبوا حاجات قد ايه مفيدة لينا ولأجيال غيرنا ...بصراحة ..هيا دى فعلاً الأم المصرية ، فتعالوا بقى نقولوهم ربنا يخليكم لينا
إلى الأم بستان الحب
إلى الأم شمس النهار
إلى الأم صاحبة مدونة فراغ
إلى الأم ماما امولة
ولو نسيت حد ادونى اخطار بليييز
اشكركم جزيل الشكر

جميع الحقوق محفوظة لمدونة اصحى يا مصر

اليوم اللى كلنا بنحلم بيه

فى الاول بحب اشكر كل اللى شارك وقال رأيه فى البوست الى فات وعلى فكرة حالة مواطن هو ديوان فيه حوالى 14 حالة كتبتهم من زمان قبل ما اعتزل الشعر ، وطبعاً قولت لازم تشوفوه وتدونى رأيكم اللى بجد ادانى دفعة قوية علشان اكمل مشوار التدوين .

بسم الله الرحمن الرحيم نبدء الرغى ، وقبل ما نرغى لازم تتفرجوا على الكليب دا وتابعوه وانتم بتقروا كلامى

طبعاً...، اى بنت فى الدنيا نفسها فى يوم الحلم ، ولازم تعرفوا ان برضة الولاد عندهم نفس الشعور ويمكن اكتر ، اليوم اللى بجد نفسنا نشوفه ومنتظرينة بأحر من الجمر ، اليوم الوحيد فى حياتنا اللى هيبقى ذكرى خالدة بتعيش ويانا على طول وبتفضل ويانا طول العمر ، بنستنى ونقعد نفكر ، ياترى هيكون عامل ازاى ...؟ ، ياترى هنظمه ازاى ؟؟... وممكن كمان...نحلم ، نحلم بالقعدة على الكوشة وجنبينا شريك حياتنا اللى بقى زى الروح جوانا ، نحلم بأننا هنعيش معاه بقيت عمرنا وندعى لربنا انها تكون ايام سعيدة مش وش فقر ، نحلم كمان هنعمل ايه وهنعزم مين ؟؟ ، بنحلم ازاى ننظمه وازاى هيكون زى ما فى دماغنا ، يااااااااااااااااااالله ، حاجات كتير عايزين نعملها علشان بس نفهم شريك حياتنا انه بجد حاجة كبيرة اوى اكبر من الدنيا دى كلها ، نقعد برضة ونقول هنعمله اميريكان ولا فى قاعة عادية ولا فى ايه؟؟ ، وبنختار الاغانى اللى بنحبها علشان نشغلها ........، بنقعد نفكر ونحلم بحاجات كتير اوى ، وصدقونى مع انى مش بحب اوى اروح افراح او حتى اروح اعزى ، بس كل لما افكر فى الموضوع دا بحس بحالة غريبة ، حالة ان انا نفسى اليوم دا اشوفه فى اسرع وقت ، والحاجة الوحيدة اللى بتصبرنى انى اقعد احلم ، زى ما بقية الخلق تقعد تحلم بيه ، اصله بصراحة يوم عمره ما هيتكرر فى حياتنا خالص ، فلازم نعمله يوم يكون بدماغنا ، انشالله ميعجبش حد بس اهم حاجة ان احنا الاتنين متفقين عليه ، بحلم برضة انى اجيبلها فستان مشافتهوش سندريلا ، واخلى كل صحابى يجو ببدل سودا وقمصان بيضا ، وانا فى وسطيهم وبروحلها ، يااااااااااه ، ولله لو عارفين اليوم دا لو يتكرر 14 مرة مش هنزهق ، بس مينفعش للأسف يتكرر هى مرة واحدة بس ، فلازم نعمل كل حاجة احنا عايزينها ، وبصراحة الكليب دا انا ملقتش زييه يفسر حالتى لأنى بحبه جداً ثانياً لما شوفته فكرنى بأيامى وانا بحاول افكر واحلم باليوم دا ، فقولت اعملكم بوست خاااص بيه ، لأن البوست دا مش هيتكرر خالص غير لما ربنا يتمم لنا الخير . بس يا ترى ..هل انت بتحلم بيه ؟؟ ، ولو بتحلم هتعمل ايه؟؟ .

اسلام ديو

اوباما -- تحيا افريقا

اوباما - تحيا افريقيا

ولد من اب مسلم ، ومن ام مسيحية ، وهو طالع على ملة والدته ، وجده يهودى ، وجده والد ابوة مسلم ، (يعنى بسم الله ماشاء الله عيلة متعددة الاديان) وهو كان سيناتور فى الكونجرس ، وكان يتعاطف مع اليهود جداً ، بس لو احنا بجد مركزين فى كل كلمة بيقولها الاستاذ هيكل فى برنامجة اللى بيجى على الجزيرة هنعرف حاجات كتير اوى فى الموضوع دا ويمكن للكل موضوع هام .

ان اللوبى اليهودى يعتبر المسيطر على اساسيات الحكم فى امريكا ، اويمكن على ما اعتقد مسيطر على البيت الابيض ، وعلشان يقدر اى رئيس امريكى يبدى دعمه لإسرائيل لازم الشلة دى تكون متواجدة معاه ، طبعاً هيكون شكله وحش قدام الرأى الدولى لأنه منحاز ، وعلشان شكلة ميكونش وحش خد سياسية جميلة جداً ال وهى انه يكون عديم الانحياز تماماَ لأى دولة من دول الشرق الاوسط او يعتبر الكل اصدقاءه ، فى حين انه يمكن له ان يصدر لأسرائيل السلاح اثناء الحرب ويعتبرها عااااااااااااادى جداً ، ولما ظهرت اوى الحكاية دى فى عهد بوش علشان بوش معرفش يستخدم السياسة دى صح اللى كان اول واحد ندى بيها كان جونسون ومن بعده ، اتو بأوباما الافريقى اللى من اب مسلم علشان تكون الحكاية تمام وبالتالى هيتعاطف مع امريكا كل من جنس ولون وهيبقى شكلها حلو قدام العالم لأن رئيسها من عيلة متعددة الاديان

وغيركدة ..، بما انه افريقى ، وشايف الصراعات اللى بتحصل ، وهو ولا ادلى فى حديث صحفى واااااااحد باللى بيحصل

اهلاً اوباما--وتحيا افريقيا

جميع الحقوق محفوظة لمدونة اصحى يا مصر

حاجة ...اخر حاجة

طبعاً احنا عارفين اللى حصل للأنروا ، وانا مش هحكيلكم على المأساة اللى حصلت لأن انتم اكيد تابعتوها ، بس مينفعش ان انت تكون بتحارب وتضرب دور العبادة ، بس اليهود هما اليهود ، وطول عمرهم برضة هيفضلو يهود

-بقولك ايه.، بلاش اطفال وركز على المساجد .....، مش ناقصة كلام من حد

جميع الحقوق محفوظة لمدونة اصحى يا مصر

وهزم الاحزاب وحده

كتير لما بروح العيد الكبير ولما بنقول التكبيرة : الله اكبر كبيرا والحمد لله كثيرا وسبحان الله بكرة واصيلا ولا اله الا الله وحده صدق وعده ونصر عبده وعز جنده وهزم الاحزاب وحده لا اله الا الله ، فكرت فى كلمة كنت كل ما اقولها احس بشعور غريب زى ما يكون خوف وهى (وعز جنده وهزم الاحزاب وحده) ، فهذه كانت معركة بين الكفار والمؤمنين وقال رسول الله فى حينها : ((اللهم مُنزل الكتاب ، ومُجرى السَحاب ، وهازم الأحزاب ، سريع الحساب ، اللهمَ اهزم الأحزاب ، اللهَمَ اهزِمهم وزلزلهم ، وانصرنا عليهم ))....، وبالفعل انتصر المسلمين ، وكانت الفرحة الكبرى .

فإن فى مقالى هذا احب ان اقول اننا فى مواجهة الأحزاب (اللوبى اليهودى ، امريكا ، اسرائيل ، الإتحاد الاوروبى) وتتحد ضدنا لأنهاء تاريخنا العميق من الفتوحات والغزو ، محاولة لتحطيم امالنا وتحطيم ما تبقى للعالم العربى .

احزاب ..تريد ايقافنا ، ايقاف علمنا ، ايقاف ابداعاتنا ، وإتباع الأحكام الشريرة ، وكل حاخام صهيونى يتمنى قتل المزيد والمزيد كما اخوا من التوراه المحرفة

وإن جنده ... جنود الإسلام والملائكة التى قاتلوا الكفار بأقل عدد وهزموهم شر هزيمة ، فإن المقاومة الفلسطينية جنود الإسلام وإن الملائكة معهم بإذن الله

فأرجو من كل الذى يقرأ مقالى هذا بدعاء دعوة الرسول الذى دعا لله بنصرة امام الأحزاب ونصره الله بالفعل .

قولوا معنا ((اللهم مُنزل الكتاب ، ومُجرى السَحاب ، وهازم الأحزاب ، سريع الحساب ، اللهمَ اهزم الأحزاب ، اللهَمَ اهزِمهم وزلزلهم ، وانصرنا عليهم ))....

جميع الحقوق محفوظة لمدونة اصحى يا مصر

حكومات ساكتة ..، وشعوب متخاذلة

إن تواطؤ الحكومات العربية فى تلك المرحلة التى يمر بها اهل غزة تمثل كخيانة كبرى ، وان المظاهرة التى ترونها ما هى إلا طاقة مشحونة فى قلوب شعب يريد انقاذ اخوانه ففاضت به وفقد السيطرة على نفسة ونزل الى الشوارع لكى يحكى ويقول الى العالم ان ما يحدث فى العالم هى مهزلة انسانية بحتة .

ولكن الكل ينادى ولا يستجيب أحد ، فإن هذه الايام تمر بموت العديد والعديد من المدنين ، والمقاومة الباسلة تكثف جهودها لمنع الاجتياح .

ولما قلنالهم ساعدونا وافتحو المعبر قالوا : نساعد مين ...؟ داحنا عاوزين اللى يساعدنا
اما فى باقى الدول فبقى الحال كما هو عليه ولا ينطق احد بكلمة ، ولما عرفوا ان الموضوع قلب جد وانهم عايزين يقتلوا الاطفال قالوا لما نروح مجلس الامن مع انهم عارفين ان حوار مجلس الامن دا ...مش هيجيب فايدة

ودا نموذج للحكومات فى بلاد الشام ، كما ترون
ودا نموذج للحكومات فى الخليج..كما ترون



يعنى بصراحة كدة ناس بتركب عربيات اخر حاجة وموبايلات اخر حاجة ، وعايزينهم يروحو يبهدلوا نفسهم فى الحرب ؟؟

يلا تصبحوا على خير

غزة ...كلمات متقاطعة

نظام "التلكيك" التى تستخدمه اسرائيل فى السيطرة على الدول واستفزاز الرأى الدولى ، ومع حليفتها طبعاً امريكا ، ادى للوصول الى قتل الاطفال بلا رحمة والنساء ايضاً .
ممكن نفهم من ضرب الانروا اللى هيا من المفروض مدرسة يحتمى فيها اللاجئين وان اللى هيا من المفروض برضة تابعة للأمم المتحدة ، ان نستنتج استنتاجين وهما:
1- امريكا قيادة الكرة الارضية وبتحاول تقسم الدول لأحفادها
2- اسرائيل هى عين امريكا فى الشرق الاوسط اللى من خلاها هتقدر تسيطر عليه بأكمله
لأن فعلاً مشفناش تحرك دولى ، ولا حتى قرار غضب من الامم المتحدة ، ولا حتى اتحاسبوا فى المحكمة الدولية ، ولا حتى اتحاسبوا على الاسلحة المحرمة اللى بيستخدموها .

انا اعترف بوجود اتفاقية دفاع مشترك ما بين الدول العربية ولكن يمكن ان نغيرها بأن تكون " اتفاقية دفاع معكوس"
وانا اعترف برضة ان احنا عرب ولكن حتى هذه اللحظة بشكك فى نفسى
واعترف برضة ان احنا انسان بس لحد دلوقتى مجرد اشباح
نحن مجرد كلمات متقاطعة ، تلعبها امريكا واسرائيل كما تشاء ، وتكتب تاريخ الدم فى صفحات الشرق الأوسط , وستبقى بقعة سوداء فى تاريخ الأمم العربية .

إلا إذا ربنا ستر والمقاومة هزمتهم .

جميع الحقوق محفوظة لمدونة اصحى يا مصر

حقنا وحق الفيتو

احنا ممكن نقول ان اليهود اخترقوا الشرعية الدولية وجميع قوانين حقوق الانسان واتفاقية جينيف فى حماية المدنيين اثناء الحرب ، وفى مثل مصرى بيقول : اللى مش ليه كبير ..يشتريله كبير..، واسرائيل شارية امريكا علشان تقدر تسيطر على الوضع فى الشرق الاوسط ، ولو قلنا ان لو حصل اتفاقية سلام اسرائيل فى ذلك الحين ستعتبر منهذمة لأنها لم تحقق هدف واحد من اهدافها على اجتياح غزة ، والسؤال اللى بينطرح لماذا لم تشارك الدول العربية فى الكف عن الخراب اللى بتعملة اسرائيل ؟؟
لو قلنا مصر على سبيل المثال ...هنذكر عملية التطبيع وتصدير الغاز ، ولو قلنا السعودية والخليج ..هنقول أنهم اصدقاء لأمريكا علشان النفط ، ولو قلنا بلاد الشام .. هنقول انهم "اتلدعوا " قبل كدة 100 مرة من اسرائيل ، غير كدا وكدا لو حد اتكلم فى مجلس الامن او غيرة هيكون طلبة بالتهدئة او وقف اطلاق النار مرفوض
واصبح دلوقتى امر وقف اطلاق النار مستحيلاً بسبب وجود حق الفيتو
ولما نعتبر ان الحكومات العربية متخاذلة لشعوبها بالنسبة لمشكلة اجتياح غزة ، وإن حتى الأن لم يصدر قراراً واحداً لوقف إطلاق النار ، هنجاوب ونقول ان اسرائيل شايفة نفسها بالبلطجة ودا يكون من أحد الاسباب :
1- مساندة امريكا القوية لحكومة اولميرت المستقالة .
2- مساندة باراك اوباما وتأيده "السكوت علامة الرضا" .
3- مواطن اسرائيلى اتعور بسبب شظية من صاروخ .
4- ممارسة المنافسة بين ليفنى وباراك للأنتخابات .
ولما نقول ان العرب كلهم مش عارفين يعملوا حاجة دا يرجع لأسباب برضة :-
1- سيطرة الولايات المتحدة .
2- كل واحد همة على عيالة .
3- مصالح وتطبيع .
4- خيبة امالهم فى مجلس الأمن كالمعتاد .
ويبقى حقنا داخل "الشعوب" كأمل نتمنى وجودة وهو تحرير فلسطين ، ولكن أمل الحكام هو إرضاء امريكا عليهم او الفيتو..

جميع الحقوق محفوظة لمدونة اصحى يا مصر

ســــنــــة الــــشـــهـــداء

بسم الله الرحمن الرحيم

اخوانى الاعزاء

طبعاً انا بقالى قروووون مكتبتش على المدونة ودا يرجع لأسباب خاصة واسباب عامة

الاسباب العامة هو اختفاء الفكرة ... وكمان خفة الدم

وحسيت ان المدونة دمها تقل اوى اوى اوى ..

بس دا مش معناه ان انا اتنحى التدوين لأنه مينفعش خالص لأنه برضة فى امل

قلت استنى شوية علشان اطلعلكم بحاجة جديدة ممكن تكون حلوة ودمها خفيف بس زى ما قلتلكم الفكرة....اختفت الفكرة بس الامل لسة موجود

عارفين اختفت ليه؟؟

ودى كمان

متهيأ لى كدة الرؤية وضحتلكم

انا بس ملقتش حاجة اقولها ...او احكى ولو مرة فى حياتى بخفة دم غير مستصنعة

بس للأسف الشديد ... لاعرفت احكى..ولا عرفت اتكلم...ولا حتى فكرت ادخل على المدونة اللى هى نص حياتى

بس اهم حاجة نقول كل سنة وانتم طيبين بمناسبة 2009 سنة الشهداء

كــــــلــــنــــا مـــــعـ غــــــــــــزة

الله ينتقم من كل حاكم او حزب ظالم مسك فلسطين...وساب الناس جعانة وبتموت .

الله ينتقم من كل حاكم او حزب ظالم كان بياخد المساعدات الدولارات من الاتحاد الاوربى ويودعها فى بنوك مصرية وغير مصرية.

الله ينتقم من كل حاكم او حزب ظالم ساب شعبة يموت ويودى ولاده لأكبر المستشفيات المصرية ولو حتى كان عنده نزلة برد .

نلقاكم بقى لما نلاقى كلمة نقولها ... او فكرة نرسمها ...او خفة دم "نستصنعها"

شكراً لحد كدة ...

ديوهيات ...رقم واحدد .. خالو.. احمد الصباغ

الدم الخفيف والمضحك كثيراً .. عجبتنا مدونتة وتدوينة وحركاته اللذيذة ، حبة للحياة الطريق الوحيد لما جعل مدونته من اجمل المدونات التى رأيتها قلب متكون الذهب الخالص...شخصاً تراه فى اى وقت... الحزن والفرح والتجمع

لا اقول كثيراً ولا اتحدث ولا امدح ليدعى البعض اننى كثير الكلام او من يحب النفاق

فأنا لا انافق ولا امدح فمن رأه وتعامل معه سيعلم ما مدى هذا الكلام بكل وضوح

انه الأخ ... والصديق ... والزميل... والخال

المدون / احمد الصباغ

اهدى لك هذه الرسمة المتواضعة واتمنى لك كل الحب فى الحياة

إسلام ديو

(حصرياً) اضاف قسم الى اقسام المدونة وهو ديوهيات وهى عبارة عن كاريكاتير عن اشخاصالمدونين و للمدونين فقط ....فمن هى الشخصية القادمة؟؟

جميع الحقوق محفوظة لمدونة اصحى يا مصر

اسلام ديووو

معلش جيت فى يوم ارسم شكلى وطلع كدة بس عايز اقولكم انه هو بنسبة تقريبية 90%

جميع الحقوق محفوظة لمدونة اصحى يا مصر

يا عاااااااااطل

في مرات كتير كنت بخلص شغلي واروح اقعد علي القهوة معروفة اوي في مدينتنا ، وبلاقي علي طول شخص قاعد مش بيعمل حاجة غي انه بيشرب الشيشة ومعاه كباية الشاي ...، بصراحة دار في دماغي اني اروح في يوم كدة واكلمة وافهم ايه ظروفة ، المهم دخلت عليه والسلام عليكم... السلام عليكم ، ولما قعدنا وخدنا معاه كلام فسألته سؤال : انتا ايه اللي بيخليك تيجي القهوة ؟ ...فقالي : هو نفس اللي بيخليك تيجي القهوة ، فقولتله انا باجي من شغلي واقعد اكمل قرايتي للكتاب هنا ... اما انتا بقي ؟؟ فرد عليا وقاللي : لامؤاخذة ياباشا هو انتا لما جيت اشتغلت اشتغلت بواسطة ؟؟ قولتله لا هو كان اعلان ورحت وقدمت ونجحت واشتغلت ، فرد وقاللي : اكيد شغال في حاجة صغيرة او شروع صغير ... ، فقولتله ليه ؟؟ ، فرد وقا : يابيه الدنيا دي محتاجة فلوس ، مفيش حاجة بتمشي من غير وسطة ، وانا وسطتي ربنا ، لأن مش معايا نكلة في جيبي ...، هما علي قد الخمسة جنيه اللي باخدهم من ابويا كل يوم علشان اشرب كباية الشاي واجيب علبة السجاير واشرب شاي وسجاير وبس ، فقلتله : وبعد ما السجاير غليت بقيت بتشتريها برضة ؟؟ ، رد وقال : ولله يابية هما 15 سجارة بجيبهم فرت واحطهم في علبة مارليبورو لزوم الأتيكيت ..، رديت وقولتله : معلش اللي ما يعرفك يجهلك ، رد وقاللي : مش فاهم ....، رديت وقولتله : هي دي الحياة ، وبعدها كملت قراية الكتاب في البت ودفعت فلوس القهوة ومشيت .

صياد الهموم

كتير اوي لما بنوهم نفسينا ، وندخل طريق أحلام اليقظة ، وبنحاول بقدر من الأمكان ان نخلي الأحلام حقيقة ، بس فين الأمل ؟ .... ، ولما بنلاقي الحلم نستقبلة بكل فرحة ، ولما بنحاول نخليه حقيقة بنزهق ومش بنستمر ، وساعات كتير بنحاول ان احنا نتمالك ونستمر ، بس ف لحظة كل شئ بيتهد ...علشان قلوبنا مستحملتش ، ومفيش في الكون حاجة هتيجي هتخلينا نتراجع ونكمل الحلم ، ولا حاجة هتروق دمنا، ما الدنيا مكنة هم واحنا مستحملين ، فعلشان كدة عمرنا ما هنتقدم ، مع ان لو اتقدمنا واستمرينا هنعطل حركة مكنة الهموم ، بس كان الزهق ليه كلام تاني افضل من احلامنا .