الأحد، فبراير 22، 2009

شوية حب .. وورقة ..وقلم

بسم الله الرحمن الرحيم

الموضوع دا بعيد خالص عن الكاريكاتير وقولت ادردش معاكم بقى شوية فى حبة كلام جد
ملحوظة قبل ما ابدأ ..: حبة كلام من قلبى (مواضيع احكى فيها عن اشخاص مجهولين) ليست للأثارة والتشويق ولكنها نستفيد منها كدروس حياتيه هتنفعنا..المواضيع دى متعدد وليست عاطفية فقط .
موضوع رقم واااااحد
يمكن لما بنكون ماشيين فى طريقنا عادى ، بنقابل اشخاص ، ونتعرف على اشخاص ، ودى حاجة اساسية فى الحياة ، وان لما فى شخص يدخل قلبك بجد بس انتا عاجز عن انك تقوله اى كلمة اعجاب واحدة وتكتفى بتبادل النظرات ،وحتى يمكن النظرات هنا بتكون مجهولة اوى .. خليط بين الواقع والخيال ، ايديك مقيدة ومش عارف تعمل ايه ، وإن الشخص دا متقدرش تقولة كلمة اعجاب واحدة لأنه يقرب لصديق ليك ، ويمكن فى اشياء اخرى بعيدة كل البعد فى حدوث اى علاقة .
نبضات قلبك تعدو وتعدو بسرعة كبيرة وانت لا تقدر على التحمل عندما تنظر الى نور هذه العيون، بدأت بوادر بداخلك تعلن عن شن حرب بين الشك واليقين عندما تنظر الى جمال الروح المعروفة بها والتى قد تتعامل بها مع اى شخص ، تهتز قدميك بغته عندما تسمع هديل صوتها الجذاب .
إذن ..تحدث لى ..ماذا ستفعل حينها؟
ولله انا مش عارف ، ابدء قصة حب وافضل مستنى مصيرها ؟ ولا احاول انى انسى ؟ طب مهى فطرة ربنا خلقها فينا كلنا ولازم الواحد بيلاقى شعور جميل للأنسان اللى قصادة لازم يقوله عليه ، بس يا أخى مينفعش دى مهما كانت قريبة اعز صديق.
نتقدم خطوة ..، ونتأخرخطوااااااات ، وحتى الأن ! لا اعلم ماذا افعل ؟ هو عيب ان الواحد يحب ؟ بلاش يحب...عيب الوحد يعجب؟ ولله انا مبقتش عارف .
حاسس انى لو كتمت فى قلبى اكتر من كدة هيجيلى اكتئاب ، انا لما بشوفها قريبه منى بكون انسان ذو طباع هادية اوى ، اينعم انا شخصيتى هادية وبتعامل بأدب وهدوء ، بس بيجيلى اوقات ببقى مفرفش اوى وانا مع صحابى ، بس مش عارف ليه كل لما اشوفها بيحصل اختلاف ، معا انى مش من النوع اللى يلف ويدور لأنى مبعرفش اساساً الف وادور على حد ، مش عارف اخد قرار وهل لو اخدت قرار موضوعى ينجح؟ الله اعلم ، ادينى بكتب شوية حب لأنسانة بجد نفسى تعرف باللى جوايا ....بورقة ...وقلم .
سؤال الموضوع الأول : ايه اللى يحصل لو حصلتلك المشكلة دى؟؟
منتظر ردودكم ، واتمنى لكم السعادة دائماً ...ديــــــو
جميع الحقوق محفوظة لمدونة اصحى يا مصر

هناك 24 تعليقًا:

  1. انا اول تعليق مش مصدقة
    ثواني هقرأ واجي اعلق التاني كمان

    ردحذف
  2. عمو ديو شكله وقع وماحدش سمى عليه ههههههههههههههههه
    والله الحكاية دي بتحصل كتير بس عاوز نصيحة مني فكر كتير قوي قبل ماتقولها اوتصارحها لان انتهاء الحكاية قبل ماتبدأ اهون واسهل بكتييييير من انتهائها بعد بدايتها لانه بيكون في القلب مشاعر اتكونت واحساس عالي صعب يخلص مرة وحده
    فانت لو كنت شايف ان الموضوع في عوائق كتير قوي يبقى ربنا يعوضك بغيره ويكون اسهل واحسن واخر نصيحة واهم نصيحة انك تستخير ربنا وباذن الله ربنا يوفقك

    ردحذف
  3. هاااااااااااى ايه دا يا عم ديوو من ورانا ماشى بص يا عم قرب منها لو حسيت قبول توكل على الله لو محستش حاجة ابعد واشترى دماغك ههههههههههه ولازم تبقى نيتك سليمة اولا سلام

    ردحذف
  4. السلام عليكم ورحمة الله وبركاته
    والله شايفة انك تصلي استخارة
    دي اهم حاجه
    مش عارفه اقولك ايه بس هي على اساس شخصيتها
    ما انت ممكن تصارحها بس هي تعتبر دا جرائه منك
    او ممكن تكون هي مستنيه اعترافك ليها
    مش عارفه
    بس انت حاسس ان هي بردو مايله ليك ولا لأ
    والله احترت اقولك ايه
    ربنا ييسرلك اللي فيه الخير
    امين يارب
    وعلى فكرة مدونتك جميله جدا ورسمك رائع انا بردو برسم بس مش كاريكاتير رسم عادي
    وحاطه رسومات ليا في بوستين قديمين وان شاء الله هحط رسمات تاني
    دمت بكل ود
    تحيـــــــاتي(:

    ردحذف
  5. معلش بقى مضطرة انى اطول شوية واوجع دماغك فى اول زيارة

    اولا الحب ده بتاع ربنا سبحانه وتعالى
    وبعدين قريبة صديقك او بعيدة عنك مش ده المشكلة
    المشكلة انك بتحبها او مرتاحة لها نفسيا فحاسس انك عايز تقرب منها وتعرف مشاعرك ناحيتها
    طبعا لازم تقولها على طول لانك لو سكت وماقولتش ممكن بجد يحصل مشكلة وهى انها ممكن تكون مرتبطة بحد تانى وانت مش عارف
    فكدة انت هتفضل متعلق بيها وهى متعرفش
    بجد قولها واتوكل على الله
    بس لازم تتوقع الوحش قبل الحلو
    ده بقى عشانك انت
    ويارب تطلع خالية من اى حد عشانك

    ارجو ان تتقبل مرورى

    ردحذف
  6. اولاً اشكركم على التعليقات دى واحب اضيف ملحوظة...انا بقرأ الردود وانا عمال بضحك لأن انا لا حبيت ولا بتحب ولا دماغى فى الموضوع دا خالص متفهمونييش غلط ههههههههههههههه ، وبعدين يا بسمة انتى عارفة ان مش اى حد يدخل دماغى وانا صرفت نظر ليه(قصة ظريفة هبقى احكيلكم عنها قريب) ، انا بس يا جماعة بتكلم على لسان اللى مش عارفين يتكلموا ، لسان ناس بجد متقيدة ومش لاقية حل ، وعلشان المواضيع دى جديدة قلت احطها على المدونة علشان تبقى جديدةواغير فكرة المدونة اكتر لأنها شاملة وغير مقتصرة على شئ ، ولتانى مرة متفهمونيييييييش غلط هههههههه دا الموضوع رقم واحد والموضوع التانى عن قريب بإذن الله .

    ردحذف
  7. زميلتى fnoonh
    ولله العوائق مش كتيرة بس نظرية انه يكلمهاقدام الناس بتكون صعبة ، هو حاسس انه بيكلمها من قلبة وهيا بتكلمه فعلاً...حقيقة وانا شفتها

    ردحذف
  8. اشكرك بسمة صلاح على تعليقك الاكثر من جميل وانا عن نفسى من معجبى مدونتك واكيد ادخلها علشان اعلق على رسوماتك لأننى اعشق الفن بجميع انواعه

    ردحذف
  9. أخى الفاضل أشكرك على الزيارة يا فنان
    بتحصل فى أحسن العائلات
    تحياتى

    ردحذف
  10. بص يا سمسم
    نبقى واقعيين
    شويه
    انا مش عارفه هتتقبل كلامى ازاى
    بس والله انا بكلمك عالواقع اللى الناس بتداريه بالكلمات والملامح الكاذبه وصوت الكرامه
    بص يابن الحلال بتحبها او معجب بيها
    قولها بس اعرف انك لما تقولها متفكرش نهاية الحب ده ايه او مصيره ايه
    لا انت اللى تعمل عشان تكتب مصير للحب ده
    وهو انك لما تقولها هتبقى فى دماغها كبنت حب وجواز مش مجرد حب البنت تفكيرها اعمق
    وطبعا لو جينا لكلمة كرامة
    قلتلو لبعض بتحبو بعض
    مستحيل بنت حتى لو بتحبك مثلا يعنى فى مخيلتى تقولك اتجوزنى
    فانت لازم يكون عملك عشان الهدف ده
    لأن كرامتها مش هتسمح ممكن تلمح لكن تقولها كده مش هينفع
    انا عارفه انى دخلت للموضوع بعمق
    بس الصراحه
    انك قبل ما تبدا مشروح حب تكون عارف تفكير البنت
    وتكون عارف هتقدر تعمل عشان الحب ده ايه عشان متقفش قدامك اى مشكله
    وافضل طريق للحب بيت الاهل
    يعنى خللى حبك رسمى يا سمسم
    وربنا يوفقك

    ردحذف
  11. اختى الفاضلة gogo!sf
    اولاً اشكرك وتحياتى لك على اول زيارة لمدونتى واحب اعرفك ان هو عارف انه عارف انها مش فى قلبها حد خالص ، وانا بتحن له بس تحسى من الحنان دا عامل ساعات زى حنان الام ...دا علشان صفاء روحها الجميل اوى دا ـ على فكرة انا اعرف عن الشخصيتين كويس اوى بس المشكلة الكبرى ان هيا وعلى ما اعتقد اكبر منه سناً ،.......بس فى الاول وفى الاخر ... بيحبها!

    ردحذف
  12. السلام عليكم / أخى إسلام جميل أن تشاركنا أحاسيسك وتنتظر منا المشاركه ، طبيعى جداً أن تتعرض لما حكيته فربما تكون هى رفيقة العمر وربما لا ، لذا أشاركك رأيى : بداية لا تؤجل التفكير فى الإرتباط والزواج بسبب أعباء هذا الزمان قال رسول الله صلى الله عليه وسلم { ثلاثة حق على الله أن يعينهم.. منهم { الناكح يريد العفاف }
    والزواج نعمه من الله وعلى كل شاب أن يسعى إليها . وأما ماذا تفعل إذا صادفت إعجاب بشخص ما سأتركك تبحث فى مدونة ( بستان الحب ) تجدها بمدوناتى المفضله توجه حديثها للشباب من بداية الإعجاب وحتى الآن وصلت لما يتعلق بالخطوبه عن طريق خواطر متعدده .
    دمت بأمان الله .

    ردحذف
  13. اخى الؤلؤة لاحظ انى جبت القصة لأنها بصورتها كدة ممكن تكون نادرة....بس ياريت فى مصر فى عائلات اساساً علشان تحصل هههههههههههههه قصدى يعنى العائلات النايمة هههههههههههه

    اسماء ازيك واخبارك ايه وليكى وحشة كبيرة ...اش\كرك على ردك الجميل جداًجداً بس احب اعرفك برضة ان ولله العظيم مش انا اللى القصة دى عليه دى قصدى شخص مقرب ليا اوى ، ودمتى بود

    ردحذف
  14. حياتى نغم اشكرك جداً جداً على تعليقك الجميل والمفيد واحب اقولك ان انا مش صاحب الموضوع ، اما من ناحية بستان الحب فهذه المدونة اقدرها جداً وانا من احد زوارها

    ردحذف
  15. على فكرة الموضوع دا جميل جداً وانا دخلت بصراحة من اعجابى الشديد بيك لما شوفت لك مقالة على جريدة صوت العرب فقولت لازم ادخل المدونة دى وفعلاً مدونتك حلوة اوى وياريت نتعرف عليك اكتر

    ردحذف
  16. بسم الله الرحمن الرحيم
    السلام عليكم ورحمة الله وبركاته
    صديقى العزيز
    تحياتى
    القصه جميلة جدا
    وبتحصل وانا شفتها اكتر من مرة
    بس ماينفعش ان احنا اللى نقول ايه اللى يحصل لأن كل ده بيتوقف على الشخصيتين هو وهى وازاى هيقدرو يتواجهو فى الموضوع ده
    فيه ناس بتعيش بخيالها وفيه ناس بتتشجع وتتكلم وممكن تترفض وممكن تتقبل وفيه ناس بتروح تتكلم على الجواز على طول وتتقدم للاهل
    يبقى كل واحد يشوف هو شخصيته ممكن تعمل ايه ويعمله
    تحياتى وفى انتظار القصه الثانيه
    ودمت بكل خير وود
    والسلام عليكم ورحمة الله وبركاته

    ردحذف
  17. تدوينتك جدا جميله

    اسلوك في الكتابه مشوف وبسيط

    تقبل مروري من هنا:)

    ردحذف
  18. مش عارفة ليا رأى كدة
    لما الولد يعجب بواحدة ويتأكد من مشاعره لازم يأحد خطوة جادة
    بأسرع وقت
    حتى لو ظروفك دلوقتى ما تسمحشى ادخل فى الموضوع على دول وشوف هتقدر تنتظر ولا لأ
    بس طبعاً قبل ده كله مش تنسى تصلى صلاة الاستخارة

    ردحذف
  19. اشكرك قصقوصة على الكلام الجميل دا

    ردحذف
  20. اولاً برحب بيكى بذرة امل على دخولك مدونتى
    ثانياً طبعاً صلاة الاستخارة دى لازم

    ردحذف
  21. اخى المعتصم اشكرك على استضافتك الطيبة ولك تحياتى

    ردحذف
  22. اشكركم جزيل الشكر على تعليقاتكم الأكقر من جميلة وانتظروا منى الجزء التانى انشاء الله قريب

    ردحذف
  23. موضوع فعلا هايل وهادف
    وانا عن نفسي فى مشكله شبه دى بحب شخص اصغر منى سنا لكن مش حاسه غير بمشاعر حقيقيه مش مجرد احساس بنت مراهقة،معرفش مشاعره ايه ؟لكن عارفه انه بيرتاح لى
    والمشكله الاكبر انى حاسه انه حتى لو حبنى مش هينفع نرتبط بسبب فرق السن وان كان بسيط لكن ده مجتمعنا !

    انسانه خايفه من بكره

    ردحذف
  24. انا عندي نفس المشكله دي لدرجه انها هيه الي بتحاول بس صاحبي ده اكترمن اخويا

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم