الأربعاء، فبراير 25، 2009

تيجو نجمع ونشترى منبه ؟

فى اول كلامى لازم لازم تقروا الموضوع كله من الأول للأخر لأنه بيتضمن تحليلى للواقع اللى فيه مصر واحاجت فى غاية الالم وفكرة انشاء المدونة من الاول ، ثانياً احب انوه ان السكانر عندى باظ وانا بعرض صور اللى مش عليها توقيعى اعرفوا انها مش رسوماتى لحد ما انشاء الله الاسكانر يتصلح .


فى ناس كتير سألونى ... ايه يعنى اصحي يا مصر؟؟ ، او ايه الفكرة يعنى ؟؟ ،...ولله انا كنت مخبى فى قلبى انى احكى ، ومخبى اتكلم عن اصل المدونة ..بس قررت احكيهالكم بالرغم ان الوضع اليم ، اليم جداً لدرجة كبيرة ، اليم لدرجة بعد حرب 1973 عمالين ننام واحدة واحدة ،
مش عارفين بنام ليه ، نسينا اهم حاجة ، نسينا اللى احنا عايشين علشانه ، نسينا الإنتماء والوطنية ، وناس خدتها بعد كدة كفكرة علشان يمشوا مصر على كيفهم ، حسبى الله ونعم الوكيل .
بس كل لما اجى افكر اقولكم على السر بخاف ورجع تانى ، بخاف ليقولوا عليا كلام مش ظريف زى التريقة مثلاً ، بقيت بخاف احكى عن مصر وعن الوطنية فى قعادات مع صحابى ، بقيت بخاف احكى عن مصر والوطنية لما اقابل شخص علشان مخسروش ، بقيت بخاف احكى عن مصر والوطنية ، بقيت بخاف اتكلم مع واحد صحبى ، ولو اتكلمت يقوللى : ياعم مش ناقصة انا عندى بنت عايز اربيها دا لدرجة ياراجل انى بقيت بخاف من نفسى ، بخاف من اهلى اللى مش معايا ، بخاف من كل شخص ، ومش انا لوحدى دا كلنا كدة ، الخوف ولد عندنا الكسل ، والكسل ولد النوم ، والمذكور بالنوم هو الوطنية ، الكل عمال يفسد واللى تقوله ليه ...؟ هيرد عليك بكلمتين : وانا مالى مهو كله بيعمل كدة اشمعنى انا ، يأما الكلمة التانية : اهو محدش واخد منها حاجة ، طيب نقارن الأمر بأن لو كان فى وطنية ... مش كان ممكن حاجات كتير هتتغير ، على الاقل يا اخى هنحب بعض ، كلنا هيبقى لينا صوت واحد ونقول لأى شخص لاء ، الكره فينا هو اللى عمانا ، او الاصح اللى نيمنا ، مع ان الكره دا مجاش مننا احنا ، جه من الناس اللى بيحملوا جنسيات غير جنسيات مصرية وبيلقبوا بالوزير ، جه من الناس اللى افتكرناهم هيقفوا جنبينا واللى بيلقبوا بالنواب ، بيلبسوا كل شوية ماسكات ويغيروا فيها ، دلوقتى لو عايز تشتغل لازم تدفع مبلغ وقدره ، عايز تسافر هتدفع برضة مبلغ وقدره ، واحنا مقيدين ،دا بقى حبس جماعى ولا ايه؟ ، المهم بقى الواحد مننا ميشتغلش ويفضل عاطل ، ينزل يشرب مخدرات وانا حكيتلكم فى بوست المخدرات بتيجى منين وازاى وشرحت ، وبعد ما يشرب ميلاقيش فلوس ينزل يسرق ، وبعد ما يسرق يشترى المخدرات ، ولو افترضنا ان هو سرق بنت وهى ماشية ، الناس كلها هتقول البلد مفيهاش امان وكلها حرامية ... ، ومن هنا تولد الكراهية ، النوع المر من المشاعر ، متهيأ لى انا لو قعدت ادندن للصبح ولا هيحصل حاجة ، شاطرين بس نطلع فى التلفزيون ويلا يابن بلدى كلنا هنفضل وراك ، ومش عارف ايه ، دا لو ابن بلدك يتصل ب 0900 ويجرب حظة ممكن يكسب ، لو انت بتحب ولاد بلدك الفقرا ابنلهم مدينة سكنية ولا شغلهم عندك يا اخى ، ايه دا ؟ ولله دا تخدير ، اقسم بربى تخديييييييييير ، تخدير علشان ننام تانى ومنصحاش ، دا كفاية ولله واحد معرفة كان عندى فى شقتى الخاصة ، فتح التلفزيون ولقى شوية بنات عمالين يتكلمو بمياعة ويسألوا بمياعة ، هو عجبته فكرة البرنامج ، بمعنى اصح " المذيعة" وقعد يتابع ، جيت له وانا بجيبله الشاى ، زعقت فيه وقولتله ياعم اقلب حرام عليك واستغفر ربك بقى هى العملية ناقصة .....مردش ، استعجبت اوى لما مردش ، استعجبت اكتر لما قلبت القناه وجيبت فيلم بين القصرين راح قايللى ....ايه ياعم دا ياعم هى طالبة نكد؟؟ هتنكد يعنى يا اسلام ؟؟ طيب ...راح واخد البلطوا بتاعه وسابنى ومشى ، انا بصراحة اتجننت ، مرة تانية بقى بتكلم مع واحد صحبى وهو استقبل دعوتى للنقاش ، قالى هقولك كلمة يا سلم ومن الاخر : احنا احسن من غيرنا ، زعقت برضة فيه وقولتله اذا كان ياعم انتا بقولك احنا لازم نقف كلنا ، والفئات كلها تساعد بعض والناس كلها تساعد بعض ، قاللى : ايه ياعم هى روح الوطنية بتهب فيك اوى كدة ليه ؟؟ اهدى اهدى ، جننى اكتر عليه ، سبته انا بقى ومشيت ، موظفين حكوميين مش عارفين يصرفوا على اولادهم ، خلاص معدش فيه روح التربية زى الاول وبقينا منفتحين على الدنيا ، الدنيا بقت بتلطش فينا واحنا مش واخدين بالنا ، وراضيين ، كل لما يقولوا خبر يفرحنا يرجعوا فيه 10 خطوات ، فاكرين العلاوة ؟؟ ، وفاكرين بعدها ايه اللى حصل فى مجلس الشعب ؟ ، مش هقولكلم بقى اكيد انتوا عارفين


هى دى نظريتى واللى كان نفسى اعمله ، عايز اصحى كل مصر ، عايز اعلام مصر تتزين فى الافراح زى ايام زمان ، عايز ارجع الوطنية لكل مصرى ، عايز اقولهم احنا امجاد العالم ، احنا اللى عملنا التاريخ ، افتخروا بقى ، تعاونوا بالله عليكم ،..بس محدش للأسف رد ،قولت ياض يا اسلام متنزل تشترى من سوق الدنيا منبه تنبه بيه بلدك وتخليها تصحى ، وفعلاً نزلت .... وللأسف الشديد لاقيت كل الموديلات كدة :

سألت رئيس السوق ليه يعنى المنبه دا كدة ، قاللى اصل احنا اللى خدرنا اهل الحى ، واحنا اللى اللى عايزينهم ينامو ، مهو لو مش نامو مش هنكسب ولا شلن ، فالمنبه دا كويس وحلو ، ولو اشتكى منه زبون هنقوله اكيد بيرن بس انتا مش واخد بالك ، او ممكن نقتل الزبون دا او نعذبه ، بصراحة خطر على بالى انى اشتريه ، بس للأسف مش هيعمل حاجة ، اتارى فى ناس عايزين يقلبوا عليها واطيها ،بس بدافع من الشر، فزادوا من المبلة طين واشتروا المنبه دا

ولله انا قولت اجيلكم بقى نتفق كدة وكل واحد يطلع اللى معاه ونشترى منبه عليه القيمة نصحى بيه البلد دى بجد ، قبل ما تنام للأبد

ومــــات الـــكــلام .

السلام عليكم ورحمة الله وبركاته

اسلام 26/2/2008 الساعة : 1:37 بعد منتصف الليل

جميع الحقوق محفوظة لمدونة اصحى يا مصر

هناك 56 تعليقًا:

  1. على رأيك يا اسلام والله لو المنبه حيفوقنا اشتريه من بكره يسلم قلمك الصاحى علطووووووووووول

    ردحذف
  2. مش عارفين بنام ليه ، نسينا اهم حاجة ، نسينا اللى احنا عايشين علشانه
    عندك الف حق فى الكلمة دى احنا نسينا الهدف الى عايشين عشانه
    الحكومة نيمت البلد والبلد عجباها النوم فى العسل ده ومش عايزه تصحى علشان الخوف ركبهم
    تقدر تقول كده فى مصر فيها اديه مفكرين ومثقفين واعين ومدركين بحال البلد للاسف قليلين جداااا واللى بيطلق عليهم مثقفين والنخبة كلام فارغ زى نوال السعدواى فاروق حسنى وزير الثقافة نفسه وغيرهم وغيرهم دول ناس بتقول بصاق فكرى وبتخدم مصالح الحكومة
    انما الناس الحقيقية اللى هتوعى اليلد بجد هتلاقيهم فى السجون خرصوا صوتهم
    علشان نفضل نايمين

    ردحذف
  3. أنا معاكم عايزين منى كام
    إحنا صحيح أخر الشهر
    والعمليه فى النمليه
    بس مفيش مشكله
    كله إلا مصر ومنبه مصر

    ردحذف
  4. اسلام
    ----
    منبة مين يا عم الحاج
    طب ماشى انا حشترى منبه اصحى بيه مصر
    بكره الصبح
    حيطلعوا ضرايب على المنبهات
    او حيصادروا المنبهات
    او يعملوا قانون فى مجلس الشعب
    لمنع المنبهات
    و بكره يمنعوا الشاى و القهوة راخر عشان هى منبهات
    ههههه
    يا بنى احنا اندر كونتروووول

    ردحذف
  5. ههههههههه
    والله انا بيتهيألى لو جمعنا واشترينا منبه نصحى بيه مصر ممكن تموت من الخضه هههههههههه دى بقالها كتير أووووووووى نايمة .. يعنى ممكن تكون فى غيبوبة

    احنا نجمع ونشترى عربية اسعاف احسن ههههههههههههههههه

    بوست هايل
    وان شاء الله مصر هتصحى على ايدينا
    المهم ان احنا نصحى

    دمت بكل الخير
    سالى

    ردحذف
  6. بص يا اسلام كلامك كلة صح

    بس نسيت تذكر لية الناس خايفة

    عشان اللى بيتكلم فى بلدنا قبل
    ما ينطق اول حرف بيكون اتقطع لسانة

    او مبقاش لة وجود هو دة اللى خلا البلد نايمة وهتفضل نايمة عشان الكل
    بيقول زى صحبك انا عندى عيال عايز اربيها

    يسلم قلمك وعقلك
    اصحى يا مصر فى محلها بجد

    بس من غير امل

    ردحذف
  7. موضوع مهم و لكن المنبه المعنوي الذي نقصده هو ضخ دماء الانتماء الي الشعب
    هي دي المشكلة

    الشعب منتمي ليومه و قوته و مشاكله فاصبحت رؤيته محدوده في محيطه فقط
    اذا رفعوا الاسعار ينظر لنفسه اذا كان يستطيع تحملها يصمت و لا ينظر اذا كان جاره يقدر ام لا

    اذا قتل امامه صديقه يتحسس جسده و قميصه اذا اصابته درن من دماءة

    القوقعه علي النفس و الؤيه المحدوده فاصبحنا جزر منعزله

    تحياتي

    ردحذف
  8. السلام عليكم اسلام .. تحياتى
    يا اسلام انت هتصحينا على الهم ليه؟
    سيب الهم نايم واحنا نايمين عشان لو صحينا حنتعب ونتعب بعض والهم حيبقى للركب .. احنا مراد لنا النوم وكل حاجه بتقول لنا ناموا ولا تصحوش ابدا
    يا اسلام احنا رضينا بالهم والهم مش راضىبينا .. احنا رضينا اننا نكون ولاد البلد دى والبلد عماله تظلمنا وتطردنا براها وكمان تغرقنا فى البحر بارادتنا على شواطئ اوربا وفى البحر الاحمر خصب عننا فى عبارات المسنودين
    يا اسلام بنحاول نصحى لكن المخدر فعله قوى ومش بيخلينا نصحى .. طب لما ايمن نور صحى وحب يصحينا معاه ولو انى مختلف مع ايمن نور بعض الشيئ لكن حصل ايه؟
    لما المثقفين بيصحونا ايه اللى بيحصل؟
    يا اسلام مصر البلد الوحيد اللى بتعمل ميزانيه كبيره للسجون واصبحت مصر مليانه سجون من برج العرب لطره للمعصره وكل محافظه فيها سجن محترم ومعتبر عشان تستوعب كل المصريين ولو ما فيش سجون .. البلد كلها بقت سجن مفتوح
    يا قلبى يا كتاكت .. ياما انت مليان وساكت
    طبعا انت كريم وحتحط مدونتى فى المفضله عندك وانا حاكون زيك واحطك فى قلبى وفى المفضلين عندى
    تحياتى

    ردحذف
  9. ياه يا اسلام ماتتخيلش قد ايه انا سعيدة بجد سعيدة بالقراءته منك
    خصوصا اني لقيت زيك اضطهاد في مسالة الوطنية دي لمجرد اني بس بقول اني بحب مصر ونفسي تكون كويسة واحسن من كده ياه ربنا مايوريك على السخرية والاستهزاء النزل عليا قعدو يقولولي انتي يابت ياوطنية روحي بعيد يلا لاتعدينا
    حقيقي كلامك جميل ولو كل الناس فكرت بتفكيرك والله امور مصر هتتصلح جدا

    والاهم لو الكل لجأ لربنا عشا يساعده ويتصره على الظالمين اكيد هيقدر لان ربنا اقوى من الكل

    تقبل خالص تحياتي

    ردحذف
  10. إنت كل شويه بتكتب بوستات مستفزه أقولك أنا مش هستفز ولا هشترك معاك وعايز أنام ها هتعمل إيه
    ههههههههههههههههه
    لا بجد شويه فكرتنى أول ما خلصت دراسه قلت أعمل فى مجال التعليم وخصوصا شهادتى تتيح ذلك للتعليم الفنى منها أحافظ على الجيل الجديد و أفيد من ناحيه خيركم من تعلم العلم و علمه ومنها أنشئ شاب واحد فقط لعله يصبح فى يوم نيوتن أو أديسون وممكن مثل ديفد كاستر مين ديقد كاستر ده
    ما علينا وجدت كل شئ محطم التلاميذ فى حالت لاوعى وعدم إدراك كل الهدف ينجح وخلاص بدروس بفلوس مش مهم المهم إنه ينجح و خلاص مبقتش الفكرة العلم و التعلم والتوسع فى المجال العلمى
    لو عززنا فكره التعليم عند النشئ سيتيح له فكره البحث و التفكر و المشوره و التفاعل لكن ما يحدث ما هو إلا حالات من التتابع أو السياقه للفرد معندوش حاجه يفكر فيها علشان وهو من صغره كان بيتقال له إعمل إيه و سيب إيه وخاف من ده وبلاش تتكلم عن ده
    يا صديقى كلنا منبوذون
    يا صديقى كلنا لا نعلم كم من العمر سنبقى غافلين سر حياتنا غارقين فى الجهل نرجوا
    سلامى علشان من زمـــــــــــــــــان
    كان نفسى حد يوجهنى يصحينى من عز نومى بس ملقيتش غير كلمه واحده غطينى وصوتوا عليا
    للعلم تركت مجال التعليم وقررت أن أفضل فى المجال العملى لعلى أجد يوما من يحتاج إلى العلم كما أحتاجه أنا

    ردحذف
  11. اولا انا متشكرة على زيارتك لمدونتى واحب اقولك ان اسمى موجة مش حبيبة وعموما انا دخلت مدونتك عشان احيى حضرتك واودك انى اقرا موضوعاتك واقول رايي
    سلامى وتحياتى

    ردحذف
  12. السلام عليكم
    صديقى العزيز
    أخبارك إيه
    يا فنان إحنا منتظرين فنك لما تصلح الإسكانر أما عن إضحر يامصر . مصر صعب إنها تصحى لو جبتلها المنبهات بتاعة الأرض كلها لسة شوية يا عم إسلام فيه أمل ؟ صح ... مش دلوقتى
    تحياتى

    ردحذف
  13. السلام عليكم / ربنا يبارك فيك أخى إسلام ويثبتك ويجعل من مدونتك منبه كبييير وصوته عااالى يصحى النايميييين ،
    تعرف كل ما نحن فيه مخطط له أعدائنا من سنيييييين وبيتنفذ بالمللى .
    ومن أراد التأكد يرجع لكتاب " بروتوكولات حكماء صهيون "
    فيه كل حاجه من صاحبك اللى عنده بنت عايز يربيها للآخر اللى عجبه البرنامج لحد اللى أخدت بعضك وسيبته .
    يارب تصحى مصر . دمت بكل خير .
    وبالنسبه لتعليقى على تدوينة شوية حب وورقه وقلم أحول الدفه وأوجه التعليق لصاحب القصه الحقيقى . تحياتى .

    ردحذف
  14. واحنا معاك كلنا يا إسلام يمكن نصحى
    وربنا يعنا بس نخلص النية
    دمت بكل الود أخى

    ردحذف
  15. اشكرك بسمة على مرورك الطيب

    ردحذف
  16. الى ايوشة
    مهو نظام التخدير دا مش هيخلص
    خلاص بقت هى دى اللعنة على مصر

    ردحذف
  17. ايمان ولا يهمك
    ادفعلك انا
    بس احنا عايزين منبه كبير يصحينا

    ردحذف
  18. ولله يا اخ بدراوى انا قولتلك نزلت علشان اشترى منبه لاقيته بالشكل المرسوم ادناه....
    سألت "رئيس" الحى ليه؟؟ قاللى علشان نقدر نكسب
    هى دى الجملة المفيدة

    ردحذف
  19. اخت سالى ولا عربية اسعاف تنفع
    مش عارف بجد فى ايه
    دمتى بخير وصحة وسلامة

    ردحذف
  20. الى الاخت gogo!sf
    احب اعلق على كلمة فى تعليقك
    اصحى يا مصر فى محلها بجد

    بس من غير امل
    وانا بست باحث عن الامل
    ولأن الامل مفقود
    بحاول انى ارجع ذرات منه ممكن فى المستقبل تنتج مدونين قادرين على انهم يزرعوا روح الوطنية ونرجع نفرح من جديد
    بس دى لعنة

    اشكرك على تعليقك ودمتى بألف خير

    ردحذف
  21. الى (احوال الهوى)
    احب ااعلق على كلمة جميلة اوى القوقعه علي النفس و الؤيه المحدوده فاصبحنا جزر منعزله

    طيب من حيث كدة بقبى فى اى وقت ممكن يحصل حرب اهلية زى اللى حصلت فى الصين القديمة ويجى عم عبدة خان يرجعنا ويوحدنا

    ردحذف
  22. استاذى العزيز / فشكول
    يمكن ولله احنا وزى ما قلت محبوسين فى سجن كبير جداً ، مع العلم بالشئ اننى لست منتمى الى اى حزب ، ولكننى كمدون سياسى اعترف بأن هذه البلد عمرها ما هترجع غير لما تنهار
    ونرجع بقى نقول يا ناصر يا حرية ...، لا بس ساعتها هننسى كل اللى فات

    تفتكر هنيجى نقول مين يا حرية ؟؟

    اسعدنى بجد تعليقك للمدونة ودا شرف ليا اعتز بيه

    ردحذف
  23. بسم الله الرحمن الرحيم
    السلام عليكم ورحمة الله وبركاته
    صديقى العزيز
    اسلام
    تحياتى
    مش انت وحدك اللى بقيت تخاف تتكلم عن مصر وتلاقى اللى بتلاقيه ده من بالقى الناس لأ كلنا كده
    نبقى قاعدين مع بعض شلة شباب كده زى الفل واجى اتكلم واجيب سيرة مصر تبص تلاقيهم اعلنو عليا الحرب
    وبعيد عنك القعده بتقلب بحاجه كده مش عاوز اقولك
    انما موضوع المنبه ده
    بصراحه يعنى يااسلام انا مش هقدر اشترك معاكم فيه
    اصل انا عليا قسط البنك بعد يومين ومحدش يضمن الظروف
    لو ممكن تدفعلى ونبقى نتحاسب بعدين حين ميسرة ماشى انا موافق
    هههههههههههههههههههههههههههه
    تحياتى ودمت بكل خير وود
    والسلام عليكم ورحمة الله وبركاته

    ردحذف
  24. والله ياأساتاذ اسلام جيت على اكبر جرح
    نفسي نكون رافعين راسنا واحنا واثقين من نفسنا
    أهم حاجة اننا نتمسك بدينا صح وبعد كدا ربنا هيوفقنا الدين اساس كل حاجه وبصلاحه هتتصلح الدنيا كلها
    بس مين يصحى
    والمنبه بايز
    وسيبك من المنبه اللي عايز يصحى هيصحى من غير منبه لان في منبه جواه
    بس ياخسارة المنبهات الجوانيه والبرانيه كلها بايزة دلوقتي
    موضوعك جميل جدا جدا ويستاهل طرح
    ومايهمكش من حد خلي اللي يتريق يتريق المهم انك انت صح
    والله بتبسط اوي لما الاقي شباب فيهم خير
    زي حضرتك كدا
    ربنا يسعدك
    ويحققلك كل ماتتمنى
    وترجعي يامصر للعزة والكرامه
    شكرا لمرورك عندي
    دمت بكل ود
    تحيــــــــاتي(:

    ردحذف
  25. السلام عليكم

    الموضوع عايز منبة عشان يحصل تغير والمنبة اللى المفروض يصحى الناس لو كانت نايمة !


    لانى متأكد انهم صاحين بس منفضين زى ما انت قولت اللى قال انا عايز اربى عيالى


    تفتكر الخوف وضياع الوطنية مين السبب فيها اجابة معروفة للجميع

    لو تغير المنبة من صامت وثابت الى متكلم ومتحرك البلد والناس هيكون ليها شكل ولون وطعم تانى

    ربنا يصلح الحال

    تحياتى

    ردحذف
  26. ابنى اسلام أسلوبك السلس جعلنى اعيش فى الموضوع لدرجة انى صدقت وتفاعلت معك وقررت ان ادفع اى مبلغ لشراء هذا المنبه ،اطمئن يا اسلام طالما فى الدنيا امثالك فهى مازالت بخير المهم نفعل ما تمليه علينا ضمائرنا ونترك الامر لله دمت مبدعا ابنى الغالى

    ردحذف
  27. مدونة أكثر من رائعة

    عرفتها بالصدفة

    وان شاء الله اتابعها

    لانها تستحق

    تقديري

    ردحذف
  28. طيب المنبه بكام
    بس ده هيبقا تمنو غالى اوى

    ردحذف
  29. تفتكر المنبهات دى هتعمل حاجة الحكومة عاوزة قنبلة تمكن تحس ان فى حاجة وتمكن لا .. بردو .
    طول ما احنا ساكتين ولسانا جوانا هيفضل الحال هو الحال .
    على فكرة البوست هايل وكتابتك رائعة .

    تحياتى ،،


    نفرتارى

    ردحذف
  30. من فضلك زر هذا الرابط شكرا

    http://www.tahyyes.org/2009/02/blog-post_27.html

    ردحذف
  31. ادخل وقرأ البوست الجديد بتاعى يمكن تفيدك فى موضوعك بتاع الحكومة ده .
    وعلى فكرة ان نشتره مخصوص ليك .


    تحياتى ،،

    نفرتارى

    ردحذف
  32. اختى العزيزة fnoonh
    اشكرك على رأيك الجميل فى هذا البوست
    ع انه حاسس انه مش قيم اوى
    بس يمكن يكون دا الروح الى تصحينا

    ردحذف
  33. الى اعشق الليل فى ضوء الامر
    الامر ليس كأستفزاز
    ولكنه
    كمجرد انبعاث
    ...لن يأتى

    ردحذف
  34. اختى موجه
    انا بس كنت بعلق على تعليق حبيبة
    وبقلها ان انتى المفروض تكتبى اللى فى قلبك
    اشكرك على المشاركة بمدونتى
    دمتى بود
    --------------------------
    منذ انقطاع الكهرباء بسبب سوء الاحوال الجوية ضربت معاه سويتش النت وكنت باقىل كام يوم مش عارف اتكلم ولا ارد على حد
    ههههههههه معلش بقى اول ما شوفت الجليد فرحت

    ردحذف
  35. صديقى اللؤلؤة
    الاسكانر بخير وانا محضرلكم حاجات كبيرة اوى اوى ورسومات كتير جداً
    وعلى امل ان نلتقى فى رسمة هتشدنا كتير

    اشكركم على التعليق ولنا عودة بإذن الله

    ردحذف
  36. اختى حياتى نغم
    ان من بروتكولات حكماء صهيون عندما قرأته
    لفت نظرى البروتوكول رقم 21
    واكيد لو حد قرأه هيفهم معناه

    ردحذف
  37. صديقى العزيز mohammed ghalia
    الفساد كالوباء
    لايمكن معالجته

    ردحذف
  38. اخى المعتصم
    لو معاك كارت إئتمان مفيش مشاكل :D
    ----------------------------------
    الى الاخت/ بسمة صلاح
    اشكرك جزيل الشكر على مرورك الطيب
    ----------------------------------
    الاخ Tamer Nabil
    اكتشفت ان العيب مش فى المنبه للأسف العيب فينا
    ودمت بود
    ----------------------------------
    امى : بستان الحب
    اسعدنى دخولك وتعليقك الدائماً متميز
    ومعنى تفاعلك معى فى هذا المقال فيبدو لى انه لحد هذا اليوم الحياة بخير
    دمتى بود
    ---------------------------------
    الى : ماما امولة
    اشكرك على تكريمك ليا وبجد اسعدنى اللقاء بمدونتك
    وعلى ان نتواصل بإذن الله تعالى
    ---------------------------------
    الى : القطة المشمشية
    ههههههههههههه مش لما نلاقي منبه عليه القيمة؟؟
    ---------------------------------
    الى نفرتارى
    انا قادم لرؤية البوست
    واشكرك على هذا الكلام القيم

    ردحذف
  39. حنانيك يا اسلام .. خد بالك
    الجماعه اللى عمالين يذقوك دول مش حينفعوك
    خد بالك تانى
    خالد عزب بيقول لك انظرحولك
    انا ما ليش دعوه بيك
    انا يا عم مش مستغنى عن نفسى
    تحياتى

    ردحذف
  40. اسلام..
    بص شوف ...
    المزابل زمان كان فيها أيه؟
    بذمتك ...رغم الاعداد المهوله الكبيره أوي و أوي أوي ...
    بتسمع صوت هوهوه ...
    يبقي مصر تصحي أزاااااي
    طالما انكتم صوت الهوهوه ..
    مصر نايمه..
    نام يامصري ..
    مصر ما عاد فيها نااااس
    نام يا مصري
    مات الحب والاحسااااااس
    ===هوهو===

    ردحذف
  41. السلام عليكم إده يا فنان إنت عايز لمنبهات تغلى إده أنا شاكك فيك إنت معانا ولا علينا بتغلى أسعار المنبهات يا فنان الله يسامحك
    تحياتى

    ردحذف
  42. ايه ياعمنا موضوع النضارة ده
    انا مش فاكر
    الزهايمر بعيد عنك
    دا كان امتى ولا كان فين ولا ايه بالظبط

    ردحذف
  43. الاخ العزيز اصحى يا مصر : اسلام ديو
    السلام عليكم ورحمة الله وبركاته
    شكرا على التعليق والاطراء ، وسرنى وجودك ويشرفنى صداقتك ، ومن مقالك ليست الحاجة للمنبه ولكنه تغير الوعى والثقافة المتخاذلة فى اللى نعرفه احسن
    مـات الضمــــير م الجــــوع واتفتـــحت الادراج
    وسوق الـــكرامة كــسد وسوق الفــواحش راج
    عشان بترعانــــا الديـابة واحنـــا معيز ونعـــاج
    لاتحمنا الزيارة
    لك تحياتى والسلام عليكم ، ولا سلام مع اليهود

    ردحذف
  44. بالمناسبة انا شرقاوى والسيدة محاسن صابر شرقاوية والدكتور صاحب مدونة احوال الهوى شرقاوى

    ردحذف
  45. هههههههههههههههههههههههههه


    بوست هايل وفيه تصريحات كتير جدا


    وتعليقات كتيررر بردو

    بس مش لزم نلفت الانتباه للئخرين

    كفايه علينا المنبهات بتعتك

    وكفايا انها بتاعت مصر اصل مصر هيه امى وانتو عرفين امى كويس مبترحمش

    تحياتى لك اخى الفاضل

    ومرسى جدا على زيارتك الكريمه

    ردحذف
  46. انت كده محتاج لعقول تعمل منبه لا شبه الاولانى و لا التانى


    بيتهيالى ان فيه ناس كتير صاحيين طول الوقت و ما بيناموش و دول التعبانين اكتر


    ما قلتش المفروض الواحد يشارك ب( كام ) ف المنبه ده

    جايه هنا بالصدفه
    عجبنى الفكر و الفن هنا جدا

    ردحذف
  47. ازيك يا إسلام ..معلش دى اول مرة أدخل مدونتك وأتأخر عنك كده
    لكن كل مرة بحس بشئ غريب إن كلامك بيدخل لناس كتير جدا من المصريين وإنك فعلا حاسس بهم البلد
    لكن انا خايف إن احنا لما نجيب المنبه نصحى بعد أذان الفجر ومنلحقش نصلى
    أظن فاهم كلامى
    ممكن بعد إذن السيادة أضع رابط مدونتك عندى

    ردحذف
  48. كلامك قاتل
    كلنا نوم
    عشنا النوم
    مش بس نايمين
    احنا بنقوم من النوم عشان ننام تاني
    بس اكيد هنصحي
    طول ما فيه شباب واعي زيك وهم كتير علي فكره
    اكيد هيجي وقت ونصحي
    مصر مهمه
    سبحان الله ربنا قال عننا اننا في رباط الي يوم القيامه
    ربنا سبحانه وتعالي هو الحق
    اكيد الخير جاي
    بشرتني
    استمر في اتجاهك ومعاكوا في موضوع المنبه
    تحياتي

    ردحذف
  49. السلام عليكم
    إسلام الفنان
    إشتريت منبه ورنيت جرسه إن مصر تصحى ......أبدا ياأخى هو إيه إللى حصل تعرف تقولى
    تحياتى

    ردحذف
  50. اخى بيرم
    كويس ان انتا عرفتنى انك شرقاوى
    ميس محاسن اعرفها طبعاً
    سلامى لك استاذى الفاضل وعلى امل ان نتواصل بإذن الله

    ردحذف
  51. اخى ادم المصرى
    اسعدنى وجودك
    ودمت بود

    ردحذف
  52. سهر ...اهلاً وسهلا شرفتينا بجد
    وانا سعيد بلقاءك بمدونتى ومتقطعيش الزيارة
    دمتى بكل ود

    ردحذف
  53. اشراقة اونلاين
    اهلاً وسهلاً بيك واسعدنى وجودك
    والمدونة وصاحب المدونة تحت امرك مش الرابط بس
    دمت بود

    ردحذف
  54. الفنان جداً فى تعبيراته
    ومفرداته
    احييكـ على مدونتكـ القوية واهنئ نفسى على تعارفى عليها
    والان اسمح لى ان اقرا المدونة لكى استمتع بما كتبت
    واسمح لى ان اضعها فى المفضلات عندى

    تحياتى,, تقديرى

    ردحذف
  55. والله يا اسلام عندك حق انا بعانى من نفس المشكلة وهى انى لما ادافع عن مصر فى اى حاجة او اقول يا جماعة محدش يشتم مصر ..مصر مالهاش ذنب اللى مسكنها هما السبب هما اللى متبعيين سياسة التخدير ...هما اللى عايزين يعموا عنينا عن الحق ويلهونا بشوية اغانى و مبارايات كورة وكلام فاضى... بيتهمونى بالوطنية (اصلها بقت تهمة اليومين دول )... بس مهما حصل بردو هنفضل كلنا بنحب مصر وانشاء الله هنصحى ف يوم من الايام ...شكرا بجد ليك يا اسلام ياريت كل شباب مصر بيفكروا زيك

    ردحذف
  56. اه على فكرة انا عندى منبهات كتيييييييييييييير ممكن اسلفكوا واحد

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم