الاثنين، مارس 02، 2009

حالة حب..حالة ارتباك



انا مش عايز بصراحة اكتب تانى عن الصحيان وكل شوية اصحى اصحى ...فمن الأخر اختصرت الموضوع وحطتيلكم اغنية فيها كل اللى انا عايز اقولة ، تانى حاجة انا جبتلكم الجزء التانى من "حبة كلام من قلبى" ، بعد ما طبعاً اخدت 5 ايام اجازة بين تفكير فى بوست كويس وسوء الاحوال الجوية اللى خلتنى اصيب ببرد شديد شوية .
"فى يوم من الايام اراد الكثير من الناس رؤية ذلك الجمال الذى لا ينتمى الى فئة البشر - فى اعتقاد الكثير ذلك - انهم لا يرون إلا ملاكاً تتسارع خطواته مثل خطوات الغزال فى عفوان عمره ، وعندما تنظر الى السماء مهملة الارض الذى تتخاطى عليها تتذكر قول " يأرض انهدى ماعليكى قدى" ، تلك الروح المنبعثة من محيطات من الأنوثة الجميلة ، لن يلفت نظرها الا شخص واحد ، شخص تضاربت معه الدنيا حتى وإن عاش فقيراً يلقت رزقه من اى مكان ، يعيش بمفرده وينتظر " الفرج" حتى يلتقى بحبيبة عمره .
كان يسمع عنها كثيراً ، ويعلم ما هى إلا بنت ناس اكابر فى منطقتهم ، ولكن من طيبته الغريبة لا يعلم ان اميرة الاميرات تقع فى عشقه بدون علم منه ، مش هنسمى دا غباء ، اصل يعنى واحد فى نفس حالته هيعرف ازاى بقى ان بنت ناس اكابر زى دى حباه لدرجة هو ميتصورهاش ، وإن كانت هذه المرة هى الاولى بالنسبة له ، يسير فى الشارع مظلم قلبه ، حتى يرى اشعاع منبعث من اخر الشارع ، فيرى بعينه انها جميلة الجميلات ، وهى تنظر اليه ، تنظر اليه بشغف وهو ينظر اليها ، تقول له بعيونها الجميلة ..متى؟؟ متى ستعلم اننى اريد التحدث اليك ، وهو ينظر لها بنظرة اعجاب لافته (وبعد كدة بص للأرض وقال لنفسه : لا حاسب ..لازم نحترم نفسينا شوية ، لو حصل بقى وحد شافنا هتبقى مصيبة وهنطرد من هنا) ، عاد الى منزله الصغير وهو يسأل داخله ، ما عن تلك النظرات ؟؟ ، اعجاب ام بعض من الحنان بسبب حالته ؟؟ ، اخذ الطريق المؤدى الى غرفة النوم ، وهو مازال قائم على سريره يتساءل ، ما عن تلك النظرات؟؟ لماذا كانت تنظر لى بهذا الشكل ؟ ، فجأة ..طرقات بالباب ، طرقات كبيرة ومخيفة ، يرتديه حالة من الرعب والخوف ، تقدم بسؤال واحد : مين اللى على الباب ، لن يجيب أحد ، عاد تكرار السؤال ، لن يجيب احد ، تقدم الى الباب وفتحه بدون شغف ، وإنه لو كان يفتح هذا الباب ودقات قلبه متسارعه كان اصيب بنوبة قلبية حادة ، لأن الذى على باب الغرفة ...جميلة الجميلات .
لن يتحدث بشئ ، اصيب بحالة من المفاجأة ادت الى ان يكون شخصاً صامتاً ، استأذنته بالدخول ، مازال صامتاً ، أستأذنته مرة اخرى ، فأجاب عليها بضحكة تخفى وراءها اسرار ..: ايوة ايوة ، معلش انا اسف ، لامؤخة مش قد المقام بسسسس ، عرضت له كف يدها الايمن ، اشارة بقطع كلامة واكملت : لا متقولش كدة ، انا بس جيالك فى موضوع لأنى عايزة اتكلم معاك شوية ، نظر اليها وقال : انا اسف بجد ان المكان مش نضيف شوية بس زى ما حضرتك فاهمة انا عايش لوحدى وكدة ، قاطعته مرة اخرى : ممكن ادخل طيب ولا امشى؟؟ ، بسرعة قال لها : لأ لأ لأ تمشى ايه ...ازاى تمشى ، اتفضلى اقعدى على الطرابيزة عقبال ما اروح اعمل لحضرتك الشاى ، ..اتجه الى المطبخ الصغير لعمل الشاى ، وهى كانت تتجول فى غرفة المعيشة الهادئة تنظر الى بعض المعلقات الدينية وهى تقول له : هو مفيش حد معاك ؟؟ ، انت ملكش صحاب ، على فكرة انت انسان غريب اوى بس مش عارفة حاسة ان وراك قصة كبيرة ، قال لها بصوت عال وهو مازال فى المطبخ : انا اتولدت هنا ولدتى اتوفت بعد ولادتى بساعة ، والدى ربانى هنا وللأسف حصلها من كام سنة ، قالت له : انا اسفه لو كنت قلبت عليك المواجع ، قال لها : لاء عادى مش بتفرق ، وعندما احضر لها الشاى سألته مرة اخرى عن قصة حياته ، حكى لها ما تبقى ، وعندما استكملت باقى الحديث (وهو طبعاً مش مصدق انها معاه وعمالة تتكلم عادى...وهو مين يطول يعنى ؟؟) ، فجأة رن موبايلها وقالت فى لهفة : بابا ، وعندما انطلقت حاول الامساك بيدها على الطرابيزة ، ونجح، قالت له : ايه فى ايه؟؟ بأستعجاب ، قال لها : على فكرة انا معجب ووووو - طشششششششش - اخذت كوب الشاى ودفعت به على وجهة علامة من علامات الاعتراض والنرفزة ، اخذ يتألم من الماء الساخن وبعد ما انطلقت تفاجأ بصوت اجش " ايه ياعم فوقلنا بقى شوية وحياتك ، انا جبتلك الفطار علشان متقولش مفيش حد بيسأل عليك ، وهو انا لازم اقومك من النوم بالطريقة دى؟" ، فتحت عيناه على ارض الواقع بأستعجاب ... هو دا كان حلم ؟؟ بجد كان حلم ؟؟ ، اندهش "عم ابراهيم" من الموقف اللى اول مرة يحصل ، وقاله بصوته الاجش مرة اخرة :اه ياخويا كان حلم ، قوم وفز واصحى بقى زى بقية الخلق عايزن نروح شغلنا ، حاضر ياعم ابراهيم حاضر انا رايح البس اهوة ، هكذا قالها وهو متسرع ومرتبك ، كيف ولماذا ، رأيتها ليلة الماضية ورأيتها فى نفس اليلة ولكن الفرق كان مجرد "حلم" اتمنى ان يكون حقيقة ، وان كانت حقيقة فى يوم من الايام ؟؟ هل ستمنعنى من ابداء رأىى بجمالها واعجابى ؟؟ ولاحتى مازالت بقلبى كلمة اتمنى ان اقول لها ، كلمة اختيرت من قلبى .
هل سأفعل ذلك ؟ ام سيحدث ما سيحدث ؟؟ والحمد لله انه كان حلم ، دا لوحقيقة كانت تبقى مصيبة .
حالة حب ، وحالة ارتباك .. مازالت فى قلبى .--- يتبع بس مش النهارضة
تصبحوا على الحب والخير
والقاكم فى البوست الجاى
اسلام ديو الساعة 5:57 التاريخ 3/3/2009
جميع الحقوق محفوظة فى الفريزر لمدونة اصحى يا مصر

هناك 37 تعليقًا:

  1. هيييييييييييييييييي
    أول تعليق
    لبسومة النعومة

    ردحذف
  2. جميلة عجبتني
    مستنية الباقي
    وتعالى عندي في المدونة عشان عايزة حضرتك ضروري
    ماشي مستنياك تعلق عندي
    ضروووووووووووري
    دمت بكل ود
    تحيـ بسومة ــاتي(:

    ردحذف
  3. بسم الله الرحمن الرحيم
    اسلام ....
    السلام عليكم ورحمه الله وبركاته.
    المائده دسمه وفي حاجه لشويه مهضمات كده دعني اهضم واسمتع بتلك الوجبه الشهيه...سلام مؤقت!

    ردحذف
  4. بسم الله الرحمن الرحيم
    السلام عليكم ورحمة الله وبركاته
    اسلام افندى
    تحياتى
    (شكلك لسه ماغيرتش النضارة)
    جميله خالص الحكاية دى
    وكمان واقعيه (ايوة كده ماتعملش زى الجماعه بتوع هنعيش فى عش العصفورة ومش عارف ايه دى معاها موبايل وهو شكله عمك ابراهيم مطلع عينه فى الشغل)
    فى انتظار الباقى ولما نشوف بقى هيعمل ايه
    تحياتى ودمت بكل ود وخير
    والسلام عليكم ورحمة الله وبركاته

    ردحذف
  5. حكاية جميلة جدا ولا في القصص بتاعة زمااااااااااااااان(( ابن الجنايني واميرة القصر اتجوزو وعاشوا في تبات ونبات وجابوا صبيان وبنات))

    بس بجد يااسلام قصة رومنسية وشدتني قوي بس للاسف طلعت حلم ان شاء الله تكون حقيقة وتتحقق وربنا يوفق الجميع

    تقبل خالص تحياتي

    ردحذف
  6. السلام عليكم ورحمة الله وبركاته
    جميلة اوي القصه والحمد لله انه كان حلم لاني زعلت عليه اوي

    ومستنيه باقي القصه..

    ردحذف
  7. اولا الف سلامة عليك من البرد ثانيا فى انتظار باقى القصة مع انى بحزن جدا من قصص الحب المستحيلة دى
    اهئ اهئ اهئ

    ردحذف
  8. صحيح الصورة جميلة جدااااا انت اللى راسمها ؟؟؟؟
    بجد جميلة اوى

    ردحذف
  9. أولا سلامتك
    والاغنية انا بحبها
    وجواها كلام كتير اوى

    ردحذف
  10. السلام عليكم / أخى اسلام بداية شفاك الله وعافاك ، ثانياً جميله جداً القصه وفعلاً أضحكنى أنه كان مجرد حلم والحمد لله أنه كذلك ، رزقك الله الخير حيث كان ، ودمت بخير .

    ردحذف
  11. أخى الكريم :إسلام
    السلام عليكم ورحمة الله وبركاته
    أحيى أسلوبك السلس والمشوق
    دائماً متميز ومتفرد

    تقديرى واحترامى

    أخوك
    محمد

    ردحذف
  12. جميل اووووى
    يا اسلام
    انا دلقة الشاى لوسعتنى أنا
    ههههههههههههههههههه

    فى انتظار الباقى
    بس مش عيب البنت تزوره فى انصاص الليالى كدة
    الجيران يقولوا ايه
    !!!!!
    ههههههههههههههههه

    ردحذف
  13. بسمة اشكرك على الاهداء الجميل دا بجد
    واشكرك على تعليقك للقصة دى مع انها لسة فاضل عليها كتير...

    ردحذف
  14. تعليق تاني لفنونة


    يارب يتحقق بس نهايتها ماتكونش كده
    تكون ماسك عصير احسن عشان ماتتحرقش ويكون سخن
    هههههههههههه

    ردحذف
  15. استاذى العزيز / رئيس التحرير
    اشكرك على زيارتك القيمة
    وبما ان المائدة دسمة فمنتظرين تعليقاتك الاكثرها دسم
    وتسلم على مرورك الطيب

    ردحذف
  16. اخى العزيز / المعتصم
    بإذن الله صدقنى النضارة هتتغير على اول الشهر هههههههههههههههه
    القصة واقعية اينعم ولكن ينقصها الجزء الثانى الذى سيكون ملئ بإذن الله بالمواقف .

    ردحذف
  17. اختى العزيزة فنونه
    ازيك الاول واخبارك ايه؟
    صدقينى لسة الحكاية هتكبر وهتقلب تراجيدياوحاجات كتير كدة

    ردحذف
  18. سمسم
    أيه الجمال ده يا باشا
    علي فكرة أنا كده مضط أني اتابع الموضوع

    ومستنيين البوست اللي جاي
    بس تصدق أحلي حاجه انك كاتب التاريخ
    لاني بقالي فترة كبيرة جداً
    فاكر اننا لسه في شهر 2
    يلا حصل خير
    تحياتي

    ردحذف
  19. ايه يا عم الجمال ده بجد حلوة اوى .. ومش بس هى اللى حلوة ده كمان طريقة سردك للقصة رائع .

    تحياتى .. ودائما الى الامام ،،


    نفرتارى

    ردحذف
  20. القصة عجبتني بس مش هقدر احكم عليها غير لما تخلص كلها
    في انتظار الاجزاء التانيه

    تحياتي

    ردحذف
  21. وانت من اهله

    خخخخخخخخخخخخخخخ

    لو سمحت مش عايزين ازعاج

    ردحذف
  22. يعطيك العافيه بس بجد القصه
    رااااااااااااائعه كتييييير
    وحمدالله عسلامتك
    دمت بود
    تحيــــــاتي

    ردحذف
  23. جميلة تسلم يا اسلام وان شاء الله الحلم يبقى حقيقة سلاااامى

    ردحذف
  24. بوست رائع

    جدا بس التكمله هتنزل امتى بقه

    بجد واقعيه جدا

    بس ياريت البقيه

    انا فى الانتظار

    ردحذف
  25. اختى العزيزة shosho
    ومازال للقصة بقية
    مستنيكى تقرى الجزء التانى وتقوليلى رأيك

    ردحذف
  26. الله يخليكى يا ايوشة يا رب
    مستنيكى تقرى البوست بتاع الجزء التانى وتقولى رأيك

    ردحذف
  27. البت المشمشية
    اولاً الله يسلمك
    تانى حاجة انا شلت الاغنية علشان شكلها كانت تقيلة عند بعض الناس
    بس انا نوهت عنها فوق

    ردحذف
  28. اختى العزيزة حياتى نغم
    اشكرك على كلماتك الجميلة
    الله يسلمك
    على ما اعتقد ان الجزء الثانى احلى
    دمتى وبود

    ردحذف
  29. اخى العزيز محمد الجرايحى
    عودة حميدة
    ومنتظر ردك على الجزء الثانى
    دمت وبود

    ردحذف
  30. اخى العزيز بدراوى
    شكل القصة عجبتك بس البنت هتزوره فى نصاص الليالى متهيأ لى شئ عادى لو كان "حلم"

    ردحذف
  31. اخى العزيز حقودى
    اشكرك على مرورك القيم
    وعلى ان نلتقى فى الجزء الثانى انشاء الله

    ردحذف
  32. اختى العزيزة نفرتارى
    اشكرك على ردك الجميل
    ومرورك القيم
    دمتى بكل ود

    ردحذف
  33. اختى العزيزة دينا حامد
    اشكرك على مرورك القيم
    بس ايه اللى عرفك ان فى اجزاء تانية
    ههههههههههههه
    اصل الكل مقتنع ان اخرها جزئين

    ردحذف
  34. اختى فراشة
    اسفييييييييين
    وشكراً على مرورك الجميل ههههههه

    ردحذف
  35. اختى عاشقة القمر
    اهلاً بيكى فى اصحى يا مصر اللى مش عايزة تصحى
    اهلاً وسهلاً بيكى
    وعلى امل ان نتواصل بإذن الله

    ردحذف
  36. اختى العزيزة بسمة
    بلييييز تابعى بقى الجزء الثانى
    ومتى بكل ود

    ردحذف
  37. اخى العزيز ادم المصرى
    التكملة نزلت بحمد الله
    تقدر تقراها
    واشكرك على حسن المتابعة
    دمت بكل ود

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم