الاثنين، أبريل 06، 2009

طرووق 4 : خروجة مع جى جى تفاريح

تحديث هاام : انا بتأسف يا جماعة لعدم كتابة اليومية الخامسة لسى طرووق ، او ردى على التعليقات ، ودا لمرورى بحالة برد شوية ، وانتظرونى بكرة بإذن الله على موعدنا مع طروووق 5 : انا والحرنكش
تحديث هاام : المدونة دى ورسوماتها ملك لكل للمدونين واى مصدر صحفى حــر ومش ملكى انا بس ، يعنى اللى عايز اى صورة لطرووق او جى جى انا معنديش مانع ، او مقالاتى ...، وانا بتأسف على عدم متابعتى الفترة اللى فاتت بجد كنت بمر بحالة مش كويسة ، والحمدلله انى قدرت اكتبلكم السكريبت الرابع... ودا لإنى بحبكم كلكم .... إسلام ديو


لا تقولى ليدسى لوهان ولا سارة كورنر ، احنا الاصل دايماً يابا ، اه مهو حبيبتى لهطة القشطة بالسمنة البلدى ، جىجى بنت طنط تفاريح ،وعمو كمال التهابات ، خارجة معايا النهارضة ، يالهوىىىىى ، مش مصدق نفسى بجد ، دايماً بقول لنفسى يا واد يا طرووق امك دعيا عليك ،طول عمرها تقولى روووح جاتك وكسة ، الله يخليكى ليا يا ماما ، ، ايه دا... ايه الجمال الربانى دا بس يا ربى ، يالهوى على النضارة التوحفة والشعر المدلوق عليه ربع كيلو زيت زتون بتاع عمو حسنى تسعيرة ، والشوز البلارينة الفظيع ، اللى اتهرا من كتر صوت الطقطقة ، اول ما مسكت اديها حسيت بكهربا خلت جسمى قشعر ودقات قلب عمالة تخر مشاعر واحاسيس ...مكنتش عايزة تخرج معايا غير لما اجيب عربية علشان شكلنا ميبقاش وحش ، طبعاً مرضتش اقولها لاء ، رحت جايب زمارة بتاعت تييييت تييت دى وزمرت تحت البيت وكان فى عربية راكنة ، عيشتها الدور ، ولما نزلت وسألتنى على العربية مقدرتش اقولها غير : عيشى عيشة اهلك ياجىجى ،
طبعاً نزلت وخرجنا واول حاجة روحنا الكورنيش ، وفتحت اغنية تامر عشور " انا هاجى على نفسى" ، مش عارف فاتحاها ليه ، اصلها كانت ساكتة ، مع ان طول الطريق كانت حنفية رغى وكلام ، بس الحمدلله انها سكتت ، حاولت اتكلم معاها بس تقريباً حد بخ علينا بنج ، راحت قايلة بصوت عالى
جى جى : بحبببببببببببببببك يا طــــــــ
رحت ماسك بوقها وقافله بأيدى
طرووق : يخربيتك هتفضحينا ، هو انتى كنتى بتحوشى الصريخة دى ولا ايه؟
جى جى : يعنى يا حبيبى بلاش اعبر عن حبى ليك
طرووق : عبرى ياختى مقولتش حاجة بس انتى كان سنة وهتفرقعى اخر طبلة
ليا فى ودانى
.
جى جى : بجد انتا مش عارف احساسى بيك وانتا معايا بيكون عامل ازاى ،
بجد يا طروووووقة يا حبيبى انتا كل حاجة فى حياتى
طرووق فى سره : هههههه كل حاجة فى حياتك ..، شكلها مش فاكرة اللى
حصل امبارح مع ابوها
.
جى جى : ايه يا طروقة يا حبيبى مش بتتكلم ليه؟ ، وعلى فكرة انا زعلانة منك
علشان مش عايز تتكلم
طرووق : ههه..ههههه. مش عايز اتكلم ، دانا على رأى تامر بس "لما
بتكون بعيد بحضر كلام اقوله ، ولما بتكون قريب بتنسينى اليوم بطوله ، واول ما
شوفتك يا حبيبتى نستينى اسمى
جى جى : نفسى اسمع منك كلام من قلبك مش بتاع الاغانى
فجأة سرح طروق مع اصوات زنت فى ودانه ، اصوات البحر ، واصوات كتيير اوى ، عيش نفسه فى وهم وقعد يفكر يقولها كلام من قلبه ... عاش فى وهم ان كيوبيد جاى ومعاه الفرج ، وهينشن سهم على قلبه وبالتالى هيعرف يتكلم ، بس للأسف كيوبيد كان جاى فى شكل الحاج ابو طرووق ، وراح نازل عليه بالشومة وطبعاً عنيه احولت من تقل الضربة
طرووق :اىىىىىىىى
جى جى : مالك يا حبيبى خييييير؟
طرووق : ايه يا جىجى ..ههه..انتى بقيتى بخار يا حبيبتى ولا انا
احوليت؟
جى جى : مااااالك يا طروق فى ايه خير؟
طرووق : واحد غلس اوى ورذل جداً خبطنى بالطوبة بس مش عارف فين
جى جى : مين دا يا طرووق ؟؟
طرووق : طب مفيش اختيارات يا جىجى؟
جى جى : بكلمك بجد مين دا؟
طرووق : وانا ايش عرفنى يعنى يا جيهان اكيد واحد غلس وبيغلس علينا ،
وبعدين ايه الأسئله الكتير دى ؟؟
راح قايل فى سره : وانتا يابابا مش عايز تفرحنى يوم؟؟ ، مش عايزنى افرح
يوم ، طب انا عملتلك ايه بس؟

طبعاً بعد اللى حصل ساب طرووق المكان وكان عايز ينتقل لمكان اخر ، بس للأسف لقى معاكسات كتير اوى بدأت تترزع على جىجى ، ولقى واحد راح
رامى كلمة كدة : ياجميل انتا يا مفهطط
طرووق : مفهطط .. مفهطط ايه
كريم شلفة : فى حاجة يا برنس؟
جى جى : يلا يا طروق سيبه .. طروق كفاية كدة انا عايزة اروح
طرووق : استنى بس لما نشوف المعلم دا عايز ايه ، وبعدين انا مش برنس
كريم شلفه : بص يا برنس انا اللى رميت الكلمة ، وعلى رأى المثل بيقولك دارى على شمعتك تأيد ، وبصراحة انتا داريت عليها لحد ما ولعت ، والمفترض يعنى ان احنا نفرح بيها بقى ، لو كان حبيبك عسل ياخويا متلحسوش كله .
طرووق : انتا عايز تعمل مشكلة يعنى ولاايه؟ ،
كريم شلفة : تعالى بس فى السكنوف كدة بقى وكلمنى ، مش انتا عايز الاخرة فى الحوار دا يابا ، ماشى ، انا هريحك ، انا اللى قولت الكلمة ، واللى نفسك فيه
يابا اعمله
.
طرووق : سكنوف ايه واخرة ايه ، انتا مين اصلاً علشان تقول الكلام دا ..
شييييت
كريم شلفة : شت ، شتت ايه ، انتا بتشتمنى ياض ، طيب انا بقى هجيب اخرتك
، ولا يا زعفرااااااانى ، يا سميييييييييير ، ياشلمح ، يا زننننجر
ولما الشلة كلها جت
الشلة : ايوة يابو الكرم ؟
كريم شلفه : الواد دا بيشتمنى يا رجالة
طرووق : يا استاذ كريم ..انا بالفعل غلطان ، عندك حق ، شيت دى كلمة
اجنبيه ، وعادى يعنى معناها
ينهار اسود.
كريم شلفة : دانا اللى هسود عشتك اتقل عليا
(وساهم الرجالة كلها فى تقطيع وتقسيم طرووق حتة حتة)
جى جى : طروووووق ، انتا كويس يا حبيبى ؟؟ ، سيبوه حرااااام عليكم ،
كفااااااايه ،
طروووق : كــ..ــ..ويس ايـــــــ..ـه يــ...خــر..بييتك ، انــ.. ــا بــمــوت يــا جــــ...جـــى ، أعــ...ملـ..ى حااااججججججججججة
وبعد ما حصل اللى حصل ، وكمية التعاوير اللى اخدها اخونا طرووق ، ولما روح مع جى جى متكسر ومتجبس ، لدرجة ان بعض الحروف بقى بيكسر فيها بعد ما طقم اسنانة كله باظ
طرووق : بثياحة يا جىجى كانت خيوووجة ميهااش حل ، بث متعثعلينيش منك تانى وتقوييى يلا نخيج يا طيييووق تاانى لحسن منعيفش نتكلم تااانى انا وانتى
خاايص
جى جى : ليه بس يا حبيبى كدة ، دانتا حتى كبرت فى نظرى اوى لما شوفتك
بدافع عنى
طرووق : ياختى انثاله اتغل فى نظلك بحق جاه النبى ، لو هضلب علثانك على
طوى كدة .
جى جى : انا فعلاً غلطانة انى سبتك تنضرب لوحدك
طرووق : يعنى كنتى هتعميي ايه؟ ، عايزه يتحفيى لينا قبيين سوا ونتكتيم فيهم ، اهو بالمية تيتاحى من تفاييح وكماى التهابات ، وانا ايتاح من ابويا ومى ،
وهما ماشيين راح واحد تااااانى شبيه لكريم شلفة عاكس جىجى
طروووق : طب باقويك ايه بقى يا جىجى ، بثى يا بينت الناس انا هيوح ، ولما تيوحى تبقى اتصلى ، كفاية لغاية كدة كويث اوى .

جميع الحقوق محفوظة لمدونة اصحى يا مصر






هناك 65 تعليقًا:

  1. السلام عليكم
    مفيش خفة دم اكتر من كدة بجد
    وبصراحة طرووق يستاهل انه خرج في المكان ده
    الكورنيش بقي للناس اللي من نوعية الاخ ابو الكرم ده وشلته
    يعني المفروض كان اخدها مكان تاني
    ههههههههه
    يلا اهو طقم سنانه راح خلاص
    هايدفع كام الف عشان يصلحه
    تعيش وتاخد غيرها يا طروق

    ردحذف
  2. ياعم الرومنسى ياعم طروق حد يقوله انه لازم يطلع الكلام من قلبه وبس حتى لو كلام اغانى بس من قلبه
    قعدت الكوؤنيش قعدت عليها كتير بس للاسف مش هخقولك كنت بقعد فين مكان محدش بيرخم عليك غير واحد بتاع ورد بيقولك هات سيجاره وياخدها ومتشوفش وشه تانى
    جميل السرد للموضوع

    ردحذف
  3. السلام عليكم / جميله بس ياريت طروووق يخف من العلقه دى علشان كلامه كده محتاج ترجمه وتركيز :) وكمان صوتها العالى راح فين وهوه بيتضرب :)
    دمتَ بكل خير ومبدع .

    ردحذف
  4. هاى يا اسلام ازيك

    بجد طروق ده يستحق علقتين

    عشان اللى يحب جىجى يستاهل اكتر من كده

    فى وحده يكون اسم مامتها تفاريح وابوها التهابات وتتحب حرام عليك والله

    وبعدين لازم يعنى تتفلسف على الراجل وتظهرلو ثقافتك اديك اتنشيت يا فالح

    بس كنت عملت زى محمد هندى ومسكت جىجى ضربتها لما شلفه عاكسها كده كان هو اللى هيحوش عنها
    يلا معلش تعيش وتاخد غيرها يا طروووووق

    بجد قصه حلوة اوى
    تسلم يا اسلام

    ردحذف
  5. ههههههههههه
    ايه يابني ده
    سيبتها تروح لوحدها
    طيب ما انت كده كده خلاص اتشلفت علي الاخر كمل بقي
    ههههههههه
    ولا كنت خدتها في مكان حلو بدل الكورنيش وبعدين فك الكيس ياعم علشان جيجي تفرح بيك
    ههههههههههههه
    بس البوست زي العسل
    ربنا يكرمك
    سلام

    ردحذف
  6. أزال المؤلف هذا التعليق.

    ردحذف
  7. السلام عليكم
    حد يعرفه جى جى ؟؟؟
    جى جى بنت تفاريح وكمال التهابات ومش عاوز تأكل علئه وسخنه كمان؟؟
    وفقك الله لما يحبه ويرضاه

    ردحذف
  8. عثثثثل
    انثاله كنت علفتك من زمان
    الرجل ده قمراية والنبى وانا بحييى الرجالة اللى بتضرب ماهو الراجل لزم ولابدن وحتمن يثبت لحبيبته انه ممكن يحميها واللا ايه يا جدعان؟
    ههههههههههه
    ومعلش ياطروووق
    ههههههههههه

    تقبل مرورى واعجابى

    ردحذف
  9. ازيك ياطروق عارفه والله اتأخرت عليك يابني
    بس اعمل ايه في المذاكرى اللي طلعت روح روح روح اللي خلفوني
    ايه يابني دا انا قرات الحكايه اللي فاتت دي يخرب مطنك
    خاف على نفسك وبلاش رومانسية تودي في داهيه وبقولك ايه دورلك على وحده غير بنت تفاريح والتهابات دي اه اصل وشها فقر اعوذ بالله
    وضرب الحبيب زي اكل الزبيب ما بالك بقى باللي يضرب عشان الحبيب هع هع هع
    سلاموز ياطرقرق مستنيه باقي بلاويك المهببه

    ردحذف
  10. هى جىجى مالها داخله كدا على الحامى من اول مقابله بحببببببك يا طوطو دى شكلها من الناس اللى مش بتضيع وقت
    بس بجد احييك على خفة دمك فى طريقة السرد

    ردحذف
  11. معلش يا طروووووق
    تعيش وتاخد علقه غيرها
    بس تصدق جىجى ندله قوى
    ازاى متجبش ضبه بدل
    سنانك اللى اتكسرت دى
    ايه البخل ده

    ردحذف
  12. لا تحفة المرة بجد

    طرووق راح فى شربة مية

    ان لله وانا اليه راجعون

    شكله كده هو وجىجى مش هينفعوا بعض تانى

    ولو كملوا مع بعض الحلقة الجاية طروق هيبقى ذكرى

    تحياتى ليك جميلة جدا المرة دى

    ردحذف
  13. طروق ده بصراحه يستاهل حد يعمل كده مع جارته وبنت حتته
    اهو خد جزائه

    ردحذف
  14. بسم الله الرحمن الرحيم
    السلام عليكم ورحمة الله وبركاته
    صديقى العزيز
    اسلام
    تحياتى
    حراااااام عليك يااسلام
    ايه اللى بتعمله فى الواد ده
    يعنى بدل ماتخليه يعيش شويه شعوريات ومحاسيس من اللى هما
    تخليه ياكل بدل الايس كريم علقه
    لا بجد انا زعلان منك
    بس هو بمبداء الاستفاده من الكوارث كلامه بعد الضرب بقى عسسسسسسسسسسسسل
    هههههههههههههههههههههههههه
    بش ايه ده دا على كده طلع واد جامد اخر حاجه اهه واتخانق علشام جى جى
    امال بس كنت مدينا فكرة انه يعنى واد نص كم ليه
    مش هتبطل تطلع عليه اشاعات ؟؟؟؟

    انا مش عارف انت بتغير منه ليه بس
    ههههههههههههههههههههههههه

    تسلم ايدك ياصاحبى
    بس ياريت يخف بسرعه علشان يكمل يوميات
    احنا مستنيين
    تحياتى ودمت بكل خير وود
    والسلام عليكم ورحمة الله وبركاته

    ردحذف
  15. السلام عليكم ورحمة الله وبركاته
    إذيك يا إسلام
    أنت فين من زمان ليه الغيبه الطويله دى
    ولا حتى مريت ولا سئلت بجد قلقت عليك
    على العموم أنت عسل قووى
    وانا أتعودت على طررررررررررووووووووق مووووووووووووووت
    بجد رائعه يا إسلام
    بجد بعيش معاها قووى
    ربنا يسعد ايامك ويوفقك للخير
    اختك إيناس
    تقبل تحياتى

    ردحذف
  16. هههههههههه جامد
    نصيحة لطروق يروح المترو !
    انا لسه كاتب عن موضوع شبه ده امبارح بس قصة واقعية و حقيقية

    ردحذف
  17. اولا : باعتذر جدا جدا جدا على التأخير
    والله غصب عنى

    ثانيا : بجد مش قادرة امسك نفسى من لضحك
    تحفة بجد
    يسلم قلمك بجد


    بثياحة يا جىجى كانت خيوووجة ميهااش حل ، بث متعثعلينيش منك تانى وتقوييى يلا نخيج يا طيييووق تاانى لحسن منعيفش نتكلم تااانى انا وانتى*

    ياربىىىىىىىىىىى
    بجد مت على نفسى من الضحك

    لا و لا لما قالها :طب باقويك ايه بقى يا جىجى ، بثى يا بينت الناس انا هيوح ، ولما تيوحى تبقى اتصلى ، كفاية لغاية كدة كويث اوى .*

    ياعينى ع الشباب الجامد
    ههههههههههههههههه

    تحفة بجد


    و هأروح أقرا اللى فاتنى



    سلام

    ردحذف
  18. جامده المره ديه يا إسلام حلوه بجد يا صديقى
    لا بجد حلوه انا فضلت أضحك لما دمعت عينى
    يسلم قلمك و ريشتك

    ردحذف
  19. يعني البت مزة والعالم كلها بتعاكسها
    وهو متأمر ومتنطط عليها ومش عارف يقولها كلمة حلوة ....
    اهي لقت غيره يقولها ... وهو اخد العلقة

    احسن

    ردحذف
  20. بجد بقيت ادور على البوست الجديد

    لقيت حاجة بتخرج الضحكة من جوايا

    ربنا يسعدك يارب


    وبعدين اول خروجة على الكورنيش


    طب روح جنينه ههههههههههه


    اول خروجه لينا كانت على الكورنيش

    برده هههههههههههههههههههه



    وربنا يفرحك بدون مشاكل

    هههههههههه

    smilyrose

    وردشان


    روح الحب الصادق

    ردحذف
  21. ها ها ها ها

    ضحكتنى جدا .. لا يلدغ مؤمن من جحر مرتين

    ادى اخرة المرجلة والجدعنة

    تحياتى للكاريكاتير الجميل

    ردحذف
  22. هههههههههههه كنت اعمل زى هنيدى واضرب جيجى زى ما ضرب دنيا سمير غانم:)
    ولا سيبها واجرى اجدع استندال

    ردحذف
  23. ههههههههههههههههههههههههههههههههههههههههههههههههههههههههههههههههه

    انا لازم اتابع طرووق وجيجي دي من الاول

    سعدت جدا بمروري الاول
    ورسمت الابتسامه علي وجهي

    مودتي

    ردحذف
  24. ههههههههههههه
    السلام عليكم

    وعامل ايه دلوقتى يا طرووق
    الف سلامه ليه

    عرفت ان دعوة الام مستجابه

    اهى مفيش اكتر من كده وكسه جىجى بنت طنط تفاريح وكمان طقم سنانه باظ وحروفه كلها باظت
    لو مش هيراضى امه هيلاقى وكسات تانيه اكتر من كده بكتير

    تحياتى اسلام وتسلم ايدك

    ردحذف
  25. جميلة بجد مدونت ودمه خفيف موووووووت بس الحكاية دى غريبة ياعينى ده على رأى شكوكو الحب بهدلة وطروووق ياحرام طلع نصيبه مش البهدلة ده طلع نصيبه علق وتكسير يالا ربنا يقوية بس انت فكرك هيعيش لحد امتى ربنا يستر .....

    تقبل مرورى ويارب أكون ضيفة خفيفة ومرحب بها

    ردحذف
  26. السلام عليكم.......
    انا اول مرة اجى عندك المدونة بس بجد تحفة اسلوبك حلو اوى فى السرد وكمان صور الكركتير حلوة اوى ........ربنا يوفقك وانا حاجى كمان على طول علشان اتابع المدونة واكمل قصة طروووووووق وجى جى ويارب يصحى من العلقه دى ووجىجى بجد ندلة اوى سبيته يضرب لوحدى يعنى هى فلحة بس تتعاكس وهو يضرب يلا ربنا معاه ويشفيه حجى تانى علشان اشوف بقيت البوست.......سلام يا اسلام .....دومت بخير.

    ردحذف
  27. ههههههههههههههههههه
    هههههههههههههههههههههههه

    ياخررررررررررررابي خفة دم مفيش اجمل من كدا

    بس تستاهل يا طروقة عشان تبقى تستنضف ال جيجي تفاريح ال خلي البت الصيعة دي تنفعك بقى وانت مبقاش ببقك ولا سن هههههههههههههههههههههههههههه

    بصراحة بصراحة شمتانة فيك ههههههههههه

    على فكرة دعوة امك تجنن لو تحب انا ادعدي عليك كمان اهو نخلص منك عالبدري ههههههههههههههههههههههه

    اسلوووووبك يجنن يا اسلام

    وبعدين فك كدا ونفض للمشاكل انا زيك بقالي يومين مليش نفس لحاجة وزهقانة من النت وعادي الحياة بمبي برووضو ^ـ^

    ربنا يوفقك

    ردحذف
  28. تقبل مرورى
    وتقديرى واحترامى واعجابى
    بقلمك وريشتك

    ردحذف
  29. يسلم نوفوخك
    الكلام جميل والرسم اجمل
    يلا خلى طروق يتربى ويبطل يعمل فيها برم
    ههههههههههههههه

    ردحذف
  30. السلام عليكم
    أذيك يا اسلام
    انا عندى ليك تاج هديه
    تعالى عشان تاخده
    منتظراك
    وبجد زعلانه منك عشان عدم التواصل معى
    بالرغم انى بحب مدونتك قووى ومن المتابعين
    تقبل تحياتى

    ردحذف
  31. يا خبر دة الموضوع كبر قوى والدنيا إتلخبطت معاك
    ههههههههه
    بس حقيقى إسلوبك لذيذ وكتاباتك خفيفة على القلب
    تحياتى

    عاشقة الورد

    ردحذف
  32. السلام عليكم يااستاذ اسلام
    انا اشكر طرووووق جدا علشان عرفنا
    انك صاحب ابداعات ومواهب ده مش بس كده دا عرفنا ازاي نعلق في مدونتك الجميله خفيفة الظل
    بس انا عندي سؤال
    لما طروووق صاحبك كان بيتضرب انت كنت فين؟
    في انتظار حلقات قادمه من حلقات ظروووق
    مع خالص تحياتي وامنياتي لك بالسعاده
    الدائمه
    ان شاء الله

    ردحذف
  33. معلش يا إسلام التعليق متأخر شوية بس اعذرنى
    بصراحة كل مرة بضحك لحد ما الجهاز بيهنج منى
    واللى اكتر من كده رسوماتك الكاريكتيرية جنان
    شكرا يا جميل على زيارتك الخفيفة واهدائتك الحلوة
    محمد عماد

    ردحذف
  34. صديقى الفنان
    السلام عليكم
    أسعدنى زيارتك
    طروق ده بصراحه يستاهل حد يعمل كده مع جارته وبنت حتته
    اهو خد جزائه
    تقبل تحياتى

    ردحذف
  35. ههههههههههههههههههههههههههه
    هههههههههههههههه
    كا العادة من يوم ما وقعت فى مدونتك وانا بدخل علشان اضحك وبجد ملكش حل
    وجى جى دى هتخلينى اخسر طروق خالص :D:D
    سلااااااااام

    ردحذف
  36. ههههههههههههههههههههههههههه
    هههههههههههههههه
    كا العادة من يوم ما وقعت فى مدونتك وانا بدخل علشان اضحك وبجد ملكش حل
    وجى جى دى هتخلينى اخسر طروق خالص :D:D
    سلااااااااام

    ردحذف
  37. حلوة مدونتك يا اسلام
    بالتوفيق

    ردحذف
  38. السلام عليكم برافووووو يا اسلام يادى طروووق وكمان من غير سنان هههههههه ربنا يستر من نجاح لنجاح يارب

    ردحذف
  39. وينك مختفي

    طمنا عنك

    ليك تااج عندي تعال خده

    مستنياك ^ـ*

    ردحذف
  40. هههههههههههههههههههههه
    (:
    لا بجد هايل
    مستنيين الحلقة الجديدة
    تحيـــــــــاتي

    ردحذف
  41. الف سلام عليك يااسلام من البرد ربنا يشفيك يارب هروح اقرا بئا

    ردحذف
  42. الف الف سلامه يااسلام
    هاجيب اتنين كيلو قشر برتقال واجى ازورك
    (:

    ردحذف
  43. السلام عليكم / شفاك الله وعافاك ، ألف لا بأس عليك ان شاء الله تخف وتنور مدونتك ومدوناتنا .

    ردحذف
  44. فى الانتظار


    يا مسهل يارب

    ردحذف
  45. الف سلامة عليك

    منتظرينك بطرووق وبالتااااااج

    ربنا يقومك بالسلامة

    ردحذف
  46. اصحى يا مصر : اسلام ديو:ـ
    =================== تقديري و أحترامي لك أخي العزيز ...كونك قاهري أو شرقاوي فالمهم إنك ( إسلام ).
    أعلم ان مدونتكم جاده ولها هدف و تبذل فيها مجهود ممتاز لا ينكره عاقل وكون أني قلت صاحب مدونه إصحي يا مصر علشان تنامي تاني ...لم أقصد به إلا انتزاع البسمه المفقوده علي وجوه ابناء مصر .إن كان خاننى التعبير أعتذر عن الخطأ و أمحو الكلمات ايضا لو كان هذا يرضيك ...انا بحبك جدا يا أبو طارق ....
    ولا تحرمنا من شرف زيارتك لينا ,,,,

    ردحذف
  47. الف سلامة عليك يا أسلام
    وان شاء الله تبقى تمام
    ربنا معاك

    ردحذف
  48. الف سلامه عليك يااسلام
    في انتظار مشاكسات طرووق
    لك مني تحية طيبه

    ردحذف
  49. السلام عليكم
    " أسئل رب العرش العظيم أن يشفيك "

    ردحذف
  50. اسلام

    الف سلامة عليك شوفت اخرة الخروجة مع بنت التهابات هى الا جبتلك التهاب وبرد

    متبقاش تندمج فى الكتابة اوى احسن سنانك تقع كمان


    منتظرة الباقى وشد حيلك يا بطل

    تحياتى

    ردحذف
  51. ههههههههههههههااااااااي
    كل علقه وطروق طيب
    بس عسل جيجي كده قمر قمر
    مايستاهلهاش الواد طروق ده
    ولا زي بعضه يستاهلها مش اضرب عشانها
    فكرتني بفيلم اللي بالي بالك لما اللمبي اضرب عشان فحااااااااء وهي تقوله
    مبسوطه يا نااااااااااس
    ههههههههههه
    مستنيه الباقي
    والف سلامه

    ردحذف
  52. عمرى ما قعدت ع الكورنيش

    ...

    لذيذ قوى الحوار
    ومكتوب بشكل كويس
    امتعتنى
    ..
    الى الامام دائما يا اسلام

    ردحذف
  53. اولا الف سلامه عليك من البرد وتوابعه

    ربنايعافيكى ان شاء الله


    الصور بئه قبل ما تحلق وممكن اعرفك واستدل عليكى بس بعد ما حلقت لو قابلتك فى الزقازيق وحلفتلى انك ديو مش هصدقك
    شكلك اختلف كليا وجزئيا ومكانيكيا مع انى مش شفتك غير مره واحده

    ردحذف
  54. سما الحب
    اشكرك على تعليقك الدائماً متميز

    ويارب اشوفك فى التدوينة القادمة

    ردحذف
  55. اخى صوت من مصر
    ههههههههههههه
    وللللله هتتزل يعنى هتتزل
    مع انى مجربتهاش

    ردحذف
  56. اخى صوت من مصر
    هو الكورنيش كله كدة
    هههههههههههههه
    بس يا ترى هتلاقى مكان كويس تقعد فيه؟؟
    تحياتى

    ردحذف
  57. اختى حياتى نغم
    ولله هو دا كلام الشباب
    ههههههههه صوت مين بقى هى لحقت تصوت؟


    تحياتى

    ردحذف
  58. أخى فى الاسلام والدين والاخلاق والعفه أسرع وأحذف معدومه الاخلاق والعفه من مدونتك حتى لاتشارك فى الاثم وانصحك لن تفتحها حسب الله ونعم الوكيل
    tovisitmy
    jennifer
    :
    اسرع أخى

    ردحذف
  59. gogo!sf
    اخبارك ايه؟
    يارب تكونى بخير

    اشكرك على كلامك الجميل
    ومنتظرك فى تدوينات اخرى بإذن الله

    ردحذف
  60. وردة

    الحمد لله ان البوست عجبك
    ونورتى المدونة
    تحياتى ليكى

    ردحذف
  61. المجاهد الصغير
    اشكرك على اضافتك للمدونة
    وتم حذف التعليقات
    واشكرك على التنبيه وبتأسف

    تحياتى

    ردحذف
  62. ملكة بحجابى

    نوووووووورتى المدونة

    واشكرك على تعليقك الجميل

    ردحذف
  63. بسمة صلاااااااااااح
    فيييييييينك؟؟

    يارب تكونى كويسة
    وياريت تطمنينا عليكى

    تحياتى

    ردحذف
  64. desert cat

    نورتى المدونة
    واشكرك على تشريفك ليا

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم