الثلاثاء، يوليو 13، 2010

انا ماريونيت


ارفعى الستار دا جه الوقت
كنت فى القاع ومش لاقى نجاه
وحاولت اطلع ابص لفوق
دانا ماريونيت
وخيطي حياه
وحياتى ساكنة ف ايدك انتى
ممكن اقف
وممكن امشى
خليكي ماسكة ف خيطي ورمشى
واوعى فى يوم تيجي تسبيني
او تسأليني
خليكي جنبى عشان مندمشى
ولو حاولتى مرة تعيديها
هفضل صاحى.. ويمكن منامشى
او حتى اموت ..
وروحى تطلع بس ف سكوت
ددانتى اللى صوتى وانتى كيانى
وكلامك لسانى
تحبى افضل من غير صوت؟
ولا تحبى تموتيني تانى؟
بس اعملى خاطر لقلبك
خاطر لروحك
اعملى خاطر لنفسك ..مش عشانى
وبستحلفك
لتتمسكى بخيطي وعيدانى
مش ليا غيرهم
وصوابعك الله يسامحهم
خلونى مدمن ادائى
وياما كان نفسي اقوم واطنطط
وتنادى اجيلك ....
بس انا..انا مخلوق متحنط
لا قادر اوصف
ولاقادر احكى
ولو حكيت .. فين المعانى؟
ياما كان نفسى..نفسى اكونلك انسان عادى
ف عز الشدة تكونى عايزاه
وف حب اسمك انا افضل انادى
واسألك .. محتاجة ايه
تقوليلي : تفضل قصادى
شفتى ازاى انا عندى امانى؟
بس الزمان ..خلانى تانى
فرق ما بيني وبين البشر
حركة ولسان
بس انتى عارفة؟
القلب واحد
لما اكون حساس من حسك
غير لما اكون احساسى جاحد
واكيد بيبان
والفرق واحد
انا ماريونيت
وهو انسان !
جميع الحقوق محفوظة لمدونة اصحى يا مصر
تحذير : اى اقتباس او اختلاس للمنتديات سستتحول الى قضية جنائية

الجمعة، يوليو 02، 2010

اعترافات من طرف عاشق - الأعتراف التانى



لما يكون الليل احزان
وانتا هواك مليان احزان
حاسس بيك .. ونفسى ألاقيك
علشان اديك ..م الحب حنان
عيني عليك
كلمة اكتبها تكون فرحان
ببقى سعيد ..ايوة بعيد..
بس اكيد.. جوايا تعبان
شوقى انا ليك
ولو م البرد تكون سقعان
قلبى لوحده اللى يدفيك
بس اكيد مش واخد راحته
لما تكون ف حياه انسان
والأنسان..
دمع عنيك
لو عليا.. انا اجرى امسحها
اواحطها على عيني كمان
واهديلك الوردة الطرحة
جوا جناين الحب اهديك
واهديك عصفورة قلبى
بس أمانة ..أمانة عليك
لو مسألتش انت عليها ..
مين غيرك ..يديها امان؟
شفت ازاى انا عايزك تفرح؟
علشان انا هفرح
لما اشوف الفرحة ف عينك
واشوفك بتطير فرحان
هفضل ساكت.. باصص ليك
و قلمى يدونلى امانى
ولو اقطع واكتب من تانى
ولا كلمة راح تغلى عليك
دا مهما عزفت لهواك الحان
ولله ما هيعبر ليك
لا نصه ولا ربعه ولا تلته
ولا كلام العالم كله
يوصف فيك
وبتأسفلك ..انا الخسران
مش قادر ازاى اوصفلك
اه محتاجلك
بس فى يوم اكيد هيبان
وتلاقيني ساعتها بندهلك
بس انا خايف
مكنش ف بالك
وارجع تانى ..للشوق ندمان
يارتنى كنت مكان انسانك
واشيل منك ألمك ..احزانك
مش زيه بيقلل بيك
إديني فرصة
اروح واقوله
خسارة فيك








جميع الحقوق محفوظة لمدونة اصحى يا مصر

الخميس، يوليو 01، 2010

اعترافات من طرف عاشق - الجزء الأول

تصدق بأيه .. ؟؟ لو كان بأيدى تقدر تطولك وتمسح دموعك ..لجريت عليك
عايزنى تانى احلف بأيه؟؟ .. بنور عنيك ؟؟
من عينى حاضر
لوكنت قادر
اوصل أليك ..
واصفى حساباتى ب شوقى
وبأغلى حاجة عندى اهديك
***
قولي بس .. عايز ايه؟؟
حياتى؟ قلبى ؟ عمرى؟
مهو كله ملكك
واحب اعيشلك
ماخدش منك
بس اديك !
لو كان على حياتى هفديك
ولو عمرى راح ياعمرى انا بيك
ولو قلبى كان محتاج لحنانك
اكيد من غيرى هتحس بيه
***
تصدق بأيه..؟؟
.. لو كان طول جرحك قد ايه ..، ليطيب جرحك من حبى ليك
انا عارف .. جواك هموم
وبتمنى ليك .. يكون فى يوم
ابقى معاك..
نقدر سوى نشيل الغيوم
ونبدله ..بفرحة لقاك
ايوة بعيد ومش شايفك
لكن قريب اوى اوى منك
مقدرش اوصفلك ازاى فرحان
كل ما اسرح وافتكرك
منا طول الوقت بكون سرحان
انا وصورتك
وحتى غنوتك
ارتاح من الشوق شوية
وارجع تانى اشتاق انا ليك
*****
تصدق بأيه ؟؟؟ هتصدقنى؟ ، يمكن معرفش كتير عنك
بس الروح لما تحس
بتكون اقوى منى .. ومنك
والقدر بعدنى عنك
بس ع الاقل بكون فاكرك
ولا حاسس بكلامى ليك
بس عارف انى بندهلك
فى منامى بسمعلك
وبمسك اديك
ساعات بتكون السما صافية
وسحابة تعدى ..ترسم صورتك
ساعات لما اكون ماسك قلمى
وانا بكون ف عز ألمى
بفتح على الورقة ملامحك
واسيبها بالكلام تغنى
عرفت بحبك قد ايه؟

تصدق بأيه؟؟ ، وبأغلى حاجة بعترف ليك
والرسمة اللى رسمتهالك
فى الحيطة متعلقة
كفاية ابص على لون عنيك
وروحى فيها متعلقة
خايف اجرب واقولها
يمكن افرحك ..
او يمكن اصدمك؟؟
او يمكن مكنش ف حساباتك
او مجرد ورقة ف حياتك
ومسيرها هتتفرك
فعشان صراحتى
اخترت اكون فى وحدتى
احبك براحتى ..
واقعد على الكرسى
وابص ف مكانى ع الحيطة !
ناحيتك
واقعد فيك واكلمك
واعيد وازيد بحلفانى
تصدق بأيه؟؟

إسلام



جميع الحقوق محفوظة لمدونة اصحى يا مصر