الثلاثاء، يناير 10، 2012

تعالوا نتعلم الجرافيتي ... ونثور على الجدران - جزء اول

ازيكم يا شباب ..
طبعاً التدوينة جت بمبادرة من كل من زعيم القلة المندسة عبدلله مرجان ، وعمو حسام .. وبصراحة انا دورت على تدوينات كتير بتحاول تشرح اصول الجرافيتي للأسف ملقتش اي حاجة تقدر تخلي الناس تتعلمه لا من قريب ولا من بعيد .. فقررت اشرح لكم الطرق اللذيذة اللي منها نقدر نعمل جرافيتي من الألف للياء وبطريقة سهلة وسريعة .

خلي بالك ان الجرافيتي فن ومش تخريب وهو افضل طريقة للتعبير عن شعورك تجاه موقف اجتماعي معين وزي ما انتم عارفين اغلب مواقفنا المنيلة بنيلة بنعبر عنها يابلشتيمة او البسب .. جه الوقت اننا نعبر عن اللي جوانا بجد بقى :) ، وان شاء الله معايا هتقدر تعرف كل خطوات وطرق عمل الجرافيتي بجميع انواعه حتى لو مكنتش بتعرف ترسم .. ازاي تقدر تعمل جرافيتي جميل وفي نفس الوقت يمثل وجهة حضارية .
نبتدي بالطرق .. اول طريقة وهي اسهلهم اسمها الطباعة او التفريغ :
بتعمل ايه الطباعة ولا التفريغ دي ؟؟ ، دي يا سيدي عبارة اننا بنستخدم ادوات لرش شريحة معينة مفروغ منها حروف كلمات انت بتصممها وبتختارها .. وطبعاً هتسألني سؤال ..ودي بتيجي ازاي ؟؟
بص يا سيدي الموضوع سهل اوي .. الحكاية كلها ان لازم يكون معانا الاول شوية ادوات وبعد كدا نبتدي نصمم .. والادوات دي بتكون :
1- ورق مقوى .. ودا ممكن نشتريه الفرخ ب 2 جنيه تقريباً من اي مكتبة 
2- سبراي رش اللوان .. ودا ممكن نشترية من اي محل حدايد وبويات ب 7 جنيه الواحدة 
3- كتر (CUTTER)  لقطع الشرائح وتحديدها 
5-برنامج كلك ممكن تحمله بالضغط هنا
6- برنامج فوتوشوب
7- طباعة كومبيوتر
الشغل بقى .. بينقسم لقسمين : 
1- تصميم كلام 
2- تصميم اشخاص 

نبتدي بأول واحد .. تصميم الكلام ، تابع الصور 
الخطوة الاولى : اكتب الكلام اللي انت عايزه يكون في الجرافيتي ، انا مثلاً كتبت اسم المدونة "اصحي يا مصر" ، وعملته بالشكل اللي انتم شايفينه دا بإستخدام برنامج الكلك .. ممكن لو مش بتفهم في برنامج الكلك تستخدم الفوتوشوب او اي برامج اخرى تقدر تعملك شكل زي الكلمة دي ، بس انا بفضل الكلك لإنه يقدر يعمل اشكال جميلة جداً تقريباً اغلب الجرافيتيات اللي بتشوفوها بتكون معمولة بيه ، في فونتات برده موجودة على الفوتوشوب تقدر تعمل بيها الجرافيتي وتصممه بمزاجك .

الخطوة التانية : خلاص بعد ما عملت الأسم وظبتطه تمام ، لازم نخرجه لونين ليس ثالث لهما ، وهو الابيض والاسود .. وزي ما انتم شايفين الجزء اللي هيتفرغ مكتوب بالاسود (اللي هو الاسم يعني) بينما باقي الصفحة بيضة ، .. نطبعة بقى عند اقرب مطبعة ، ياريت يكون بالحجم الكبير علشان نقدر نقصة على الفرح بسهولة ومن غير ضرر ..، وبعد ما نطبعة عند اقرب مطبعة ليك نروح حاطينه على الفرخ الورق المقوى ونبتدي بالكتر (Cutter) اننا نقص واحدة واحدة الاسم المكتوب بالأسود ..وهيبقى عندنا الفراغ الابيض بس وهو دا المهم عندنا ..وبنسميه (الشريحة) .

الخطوة التالتة : بعد ما قصينها الشريحة وصبحت جاهزة .. نقدر دلوقتي نحطها على الجدار اللي احنا عايزين نعمل عليه الجرافيتي ، وهتطلع بالشكل اللي موجود في الصورة تحت دا ، بحيث الفارغ هو الاسم والباقي هو الفرخ المقوى ، هنلزقه على الحيطة بأي بكرة لزق معاك علشان مش يضايقك وانت بترش بالبخاخ .


الخطوة الرابعة : هتبتدي عملية الرش ، وحاول انك تملى كل الفراغات بلون البخاخ ومتحاولش تخطى الحاجز الابيض علشان الجرافيتهاية تطلع تمام ، ابدء رش واستمتع بالرش وحاول تحط كمامة علشان ريحة الاسبراي بتعمل احياناً حساسية وربو .. انا عارف اننا متعودين على الاسخم منها والسي ار والدموع لكن برده مش هيبقى الاسبراي والعسكر :)) .


الخطوة الخامسة : خلاص يا معلم كدا .. شيل بقى ام الورقة خالص واتفرج .. شوف الفن بتاعك وشوف انت عملت ايه ، اهيه احلى جرافيتي على الحيطة بأيدك .. وانت اللي مصممة وعامله كمان ، الله ينور :)



القسم التاني : تصميم الاشخاص

نيجي للقسم التاني والغلس شوية ، بس مش غلس علينا طبعاً هههههههههه ، مادام هنستعين بثائرين يبقى بعون الله مش صعب ، المهم انك تركز فيه جامد وهو شبيه باللي قبله اوي والفرق واحد وبسيط ، بس انت لو عامل كباية شاي فليا رجاء عندك اعمل كباية كمان لأن واحدة مش هتنفع :))

طبعاً انا اخترت لكم الشخصية اللي هنعملها الجرافيتي وهي صورة البطل الجميل احمد حرارة :) 
الخطوة الأولى :  طبعاً هنحاول نخلي الصورة لونين ، كتير منكم هيسألني ازاي ؟ ..الموضوع بسيط جداً وهو بيعتمد على الفوتوشوب ، نفتح برنامج الفوتوشوب وبعد كدا نجيب صورة البطل ... ونتأكد تماماً ان البرنامج بيعتمد على اللونين الاسود والابيض كما موضح على شمال الصورة ، وبعدين نختار من قايمة Filter تالت اختيار وهو Filter Gallery وهيفتح لنا مربع كبير زي اللي في الصورة تحت دا ، نبتدي نحدد وجه البطل من خلال الاوبشنات اللي متعلم عليها بالأحمر ، بحيث اننا نتجنب الندبات السوداء ونخليها صافية كدا زي ماهي طالعة في الصورة



الخطوة الثانية : بعد ما ظبطنا صورة البطل ، كدا يبقى مش قدامنا غير الخطوات القديمة بتاعت الاستايل اللي فات ..  نبتدي نقص الاسود ونسيب الابيض ..ونفرغ الرسمة اللي تحت دي بعد ما طلعناها بالفوتوشوب ، وبعدها نحطها على الجدار بسهولة جداً
الخطوة الثالثة : وزي ما عملنا المرة اللي فاتت .. هنلزق الصورة بأي لازق على الجدار ونثبتها كويس جداً علشان نجيب البخاخ ونبخ كويس عليها .. وبرده علشان متقعش مننا واحنا بنرش .


الخطوة الرابعة : هنرش الصورة .. انا شخصياً اخترت اللون الاسود .. وزي ما انتم شايفين في الصورة تحت اهوة ابتديت ارشها بالأسود ومحاولتش اخترق الحاجز الابيض علشان تطلع حلوة زي ما اتعلمنا في الدرس اللي فات .



الخطوة الخامسة : مبروك عليك الجرافيتي يا معلم ... وتحيا الثورة 


وبكدا انتهينا من اول جزء ، وهو التفريغ او الطباعة زي ما بيسموها الفنانين التشكيليين ، المرة الجاية هنبتدي في التقيل بقى .. عايزك تحضر كباية النسكافيه لأنه هيبقى فيه رغي كتير ... اشوفكم في الجزء التاني ان شاء الله ..تحياتي :)

جميع الحقوق محفوظة لمدونة اصحى يا مصر

هناك 21 تعليقًا:

  1. بصراحه جامد تسسسسسلم

    ردحذف
  2. رااااااااااائع ربنا يوفقك :) اخيرا فهمت البتاع دة بيتعمل ازاى ؟؟

    ردحذف
  3. بجد تسلم..
    أنا مش مدون بس كان عندي فكرة عن الكلام ده، إنما اللي فادني في التدوينة حاجتين.. استمتاعي بأسلوبك اللذيذ في الشرح، ولينك تحميل الكلك ^_^
    يالا، كل ثورة وانت طيب :)

    ردحذف
  4. رائع ... تسلم

    ردحذف
  5. جاااااااامدة جدااا تسلم :)

    ردحذف
  6. الاول تشكراتي الفشيخه، ثانيا المشكلة الحقيقية بالنبسة ليا هي التفريغ لأن ايد الواحد مش دقيقة ففيه انواع كتر معينه الشغل بيها احسن ؟

    ردحذف
  7. مفيدةجدا ,, ممكن احطها عندي ؟

    ردحذف
  8. أستاااااااااااااااااااذ

    موضوع رائع يا كبير

    تسلم في انتظار باقي الأفكار "الثوريه جدا"

    ردحذف
  9. بصراحه موضوع تحفه , تسلم الايادى

    ردحذف
  10. شكرا كتيرر أوي .. جزاك الله كل خير ..

    ردحذف
  11. أنا مش عارف أشكرك إزاي! أنا دورت في كل حتة بالعربي وبالإنجليزي عشان ألاقي شرح مبسط كده وملقتش لحد ما بطلت تفكير في الموضوع.. بس دلوقتي أنا متحمس جداً أجرب.. الله يجازيك كل خير يارب

    ردحذف
  12. تسلم يا برنس وبصراحه احلى ما فى الشرح طريقه كتابتك للشرح بلغه عاديه كدا تتفهم وربنا يعينك يا برنس

    ردحذف
  13. بس فى حته لازم ناخد بالنا فى التفريغ اننا نسيب فواصل بالورق منفرغش الكلمه كامله لحسن تبوظ .. مش عارفه اشرح بس مثلا حرف الميم لو اتفرغ ديره كامله مش هتعرف تثبت الدوريه اللى فى النص فلازم نسيب جزءين من الميم شابك فى الدوريهمن الجنبين .. فهمتو قصدى ؟

    ردحذف
  14. انا كل مشكلتى فى التفريخ مش عارف الناس دى بتفرغ الجرافتى ازاى

    ردحذف
  15. شكرا على المجهود ولكن رابط برنامج كلك لا يعمل هل يمكن تحديثه؟

    "5-برنامج كلك ممكن تحمله بالضغط هنا"

    ردحذف
  16. فين الجزء التاني ؟؟؟؟؟

    ردحذف
  17. انا كنت بصمم الحاجات دى مش مبظبوطة اوى .. ودلوقتى مش لاقى الـFilter Gallery فى قائمة Filter .. انا عندى Photoshop 7

    ردحذف
  18. شكرا علي الشرح الرائع

    ردحذف
  19. جااااااااااااااااااااااااامد بجد وانا هبتدي في تنفيذها

    ردحذف
  20. تسلم ياصاحبى بجد طريقتك فى الشرح جميلة جدا

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم