الخميس، يوليو 09، 2009

حوار مع حشاش



اشكال غريبة ، اوضاع غريبة ، كل حاجة غريبة فى غريبة ، روايح الأكل والبصل بالذات ، عمال بسمع اصوات خرمت طبلة ودانى ، توقع ان يلقى على رأسك اكياس من القمامة ، ولو كنت محظوظ هيترمى عليك مية ، ولو كنت محظوظ اكتر هتلاقى عصفورة رخمة تروح مصبحة عليك ..، كان اخرها سيدة فى العقد التاسع او العاشر او ايهما اقرب - من عمرها - تبيع الخضروات فتقول : الكـــيلو بريال ، ولما الكل ينفضلها تسخن اكتر ..فتقول : الكيلووو بريااال ، ولما اخر ما سخنت : الكيلو برياااااااااااااااااااااااااال ياولاد ال................ ، والمشكلة انها نوع معين من الخضراوات ، يمكن ان نقول انه ليس من فصيلة الخضراوات بشكل عام ، وان الريال هنا المقصود ب ورقة مصرية فئة العشرين جنيه!!
عندما فتح سميح الباب ليطل علينا سيد المصور ، اعطيته فكرة فى البداية عن طبيعة وشكل المهمة التى سنجريها ، إنها بمثابة مغامرة خطيرة التى سنقوم بها فى احدى احياء الجيزة القديمة ، وهو ريبورتاج صغير عن الادمان وتجارة المخدرات بشكل عام .

المهم انا روحت لقهوة معينة هناك ، ولاقيت هناك اشكال اعتقدت فى بداية الامر انهم من اسلاف الفراعنة ، القوام ، والتجاعيد الكثيرة فى وشوشهم ، وشوشهم تميل للسمار ، وغير محافظين على الدقن او الشنبات ، كل واحد فيهم وشه يحتوى على العديد من الشوارع والميادين ، ...المهم لاقيت واحد قاعد مع نفسه وعمال يلعب بأديه فوق وتحت ، قولت لما اروح اتكلم معاه واستفهم الامر اكتر ....

المذيع : ازيك ، اسمك ايه ؟؟
الرجل : يعنى هى دى طريقة تعارف ياعم؟
المذيع : معلش ، اسم حضرتك ايه.؟؟
الرجل : يعنى بالذمة ، دا شكل واحد يتقاله حضرتك ...، نهايته ، انتا عايز ايه؟؟
المذيع : عايز اعمل حوار معاك بس
الرجل : اه انتا جاى تحور بقى ، واسمك ، وسنك ، وبعديها بشوية رقم الامن القومى ، انتا من الحكومة ولا ايه ياض؟
المذيع : لا انا محمود شرشفولى الاعلامى بقناة فضائية .
الجل : بجد...؟ الاستاذ محمود؟؟ ، انا مش واخد بالى معلش .
المذيع : ولا يهمك انتا مش واخد نفسك اصلاً J
الرجل : معلش ياباشا ، اللى ميعرفك يجهلك
المذيع : تقدر تقولى ايه اللى فى ايدك دا؟
الرجل : دا موبايل
المذيع : لا لا البتاع التانى دا
الرجل : اه ، دا سجارة خضرا
المذيع : بتعمل ايه الخضرا دى؟
الرجل : بتعمل حاجات كتير اوى ، بتوديك امريكا وترجعك روسيا ، السجارة دى تنسيك اسمك وسنك وعنوانك وكل حاجة ، وتعيشك ملك
المذيع : وايه تانى ؟
الرجل : احنا كنا بنتكلم فى ايه اصلاً؟
المذيع : ولله ماعارف

وهكذا انتهى الحديث


جميع الحقوق محفوظة لمدونة اصحى يا مصر

هناك 22 تعليقًا:

  1. احنا كنا بنتكلم فى ايه اصلا

    والله ما انا فاكر

    ***************

    ضحكتنى اوووووووووووووووى بجد

    ربنا يخلى حشاشينا

    الواحد بيحسهم بركة فى القهاوى

    تسلم ايدك يا ديو الكاريكاتير حلو اوى

    ردحذف
  2. هههههههههههههههههه
    طيب حلوه أوى السجارة دى نديها لكل الى عايزين يسافره ونوفر عليهم فلوس السفر
    روعة يا اسلام

    ردحذف
  3. السلام عليكم

    اسلالالالالالالالالالالالام

    وحشتنى قووى
    وبجد نورت مدونتك
    ربنا يسعدك يارب زى ما بتسعدنا كلنا
    الصور تحفه وهايله

    هههههههههههه


    بجد تسلم ايديك
    انوسه

    ردحذف
  4. هههه الحمد لله أنها طلعت الجيزة و مطلعتش حلوان ... بس نسيت تقولنا السجارة الخضرا دي بكام

    ردحذف
  5. ههههههههههههههههه

    المحشش ده بيفكرنى بيا ايام الامتحانات فى الثانوية عامة لانى كنت مهيسة زيه كده ههههههههههه

    وحتى لما خلصت الامتحانات بقالى يوم مخلصة نفس التهيس هههههههههه

    ردحذف
  6. LOOOOOOOOOOOL

    da b2a fi sagayer alwan tanya kaman :D

    rabena yostor 3alina

    ردحذف
  7. هههه
    بصراحة طريقة الوصف بتجنن
    والحوار كتير حلو وممتع وطبعا بناقش قضية بطريقة نقد ساخرة
    رووووووعه
    تسلم ايدك:)

    ردحذف
  8. اظاهر يا اسلام الواحد عبال ما قراه البوست مابقتش عارفه هو كان عن ايه
    ههههههه

    جميل جدا البوست يا اسلام
    افكارك ورسمك يجنن
    متجدد باستمرار
    وروحك المرحة عالية قوى

    تحياتى لاسلام ديو

    ردحذف
  9. ماشاء الله عليك يا اسلام

    ايه الروعه دى

    انته دايما بتمتعنا بحديثك الرائع

    دام قلمك مبدعا وبارقا

    وياريت متغبش عننا تانى

    تقبل تحياتى

    سهوره

    ردحذف
  10. اول حاجة اهنيك على الصور
    بجد تمام جدا ومعبرة

    اما عن الحوار ففى التوهان خالص

    لكن تفتكر المخدرات مشكلة والا نتيجة ؟

    ردحذف
  11. بس على كددة بقى يا اسلام
    السيجارة دى ممكن تجيبلى عقد عمل فى امريكا
    ولا بروح وباحى على طول

    بجد موضوع رائع
    تسلم يا باشا

    ردحذف
  12. احجزلي سيجارة من النوع ده يا اسلام
    ههههههههههههههه

    بوست تحفه بجد ماشاء الله عليك

    ورسمك اجمل كمان

    وعاوزين نتعاون في الكاريكاتير ياريس

    اخوك بيرسم كاريكاتير برضه واخد جوايز في مسابقات تبع مركز التعليم والاتصال بتاع هيئة الاستعلامات

    ان شاء الله اكلمك ونشوف الموضوع ده

    دمت في تميز وابداع

    في حفظ الله

    ردحذف
  13. المهم انتا عاوز ايه هههههههههه

    لا وكله كوم وحط العصفوره اليى تصبح عليك كوم تانى

    جميله وكوميدى جدا يا ديو
    البوست ده

    ردحذف
  14. وطبعا السيجاره الخضرا
    تختلف بالطبع عن السيجاره البنى
    لان التاثير الفيزيائى للسيجاره البنى معروف
    تلاقى دماغك بتسقص
    وتلاقى الغسيل بينقط
    والشارع اللى وراك قدامك

    سمعت موال البانجوا قال للحشيش

    ردحذف
  15. هههههههههههههه
    احبك بدماغك العالية دي
    معندكش حاجة خضرة برضه و صديقة للبيئة و مفيدة للصحة تودي السعودية مسافات قصيرة يعني و تسيبني هناك شوية مترجعنيش علي طول ؟

    ردحذف
  16. ياعم هو حد فاكر حاجة
    ده الواحد بينسى هو اكل اية امبارح..
    ههههههههه

    ردحذف
  17. ههههههههههههههههههههههههههه
    ولله يابني انت سكر :d
    طب بزمتك الحشاشين دول مش اظرف دم في الدونيا كلها هههههههههههههههههههه
    كفايه انو قادر يجوابك على سؤال وبعد اقل من تلات ثوااني هوووووب نسي اسمووووووو هههههههههههههههههه

    ردحذف
  18. هههههههههههههه
    مش عارفة اقولك ايه .. بجد وحشتنى موضوعتك الكوميدية الرائعة .

    دمت بكل خير وسعادة وضحكة حلوة من القلب .

    نفرتارى

    ردحذف
  19. الموضوع بصراحه جميل جداً
    ومعبر عن الحال والمقال ايضاً
    ولكن قد يكون التحشيش كما يقولون ينسي ما يهلك الفرد ولكن هل هو حل ؟؟

    ردحذف
  20. يا ابنى انت فنان بجد ربنا يوفقك كمان وكمان واشوفك فى احسن حاجه

    ردحذف
  21. تصل حشاش مصري بأوباما و قاله أحنا أعلنا الحرب علي أمريكا
    أوباما أنخض .. و قالوا... انتم مين ؟
    الحشاش قالوا انا و بيسو و علاء و حناوي و ميخا و 3 صحبنا كمان من القهوة يعني 8 وحوش
    أوباما ضحك في سخرية و قالوا تعرف أني عندي 2 مليون جندي تحت أمري
    الحشاش قالوا ... لا جديدة دي لازم أتشاور انا و الشباب
    المهم الحشاش أتصل بيه تاني يوم و قالوا متقلقش يا أوباما مش حنعلن الحرب عليكم
    أوباما أبتسم و قالوا ليه
    الحشاش قالوا مفيش بس معندناش مكان يكفي 2 مليون أسير في القهوة

    ردحذف

لو انت مش مدون يهمنى برضة رأيك
اتبع الخطوات : 1- اختر :غير معرف ، 2- اكتب تعليقك ، 3- اضغط على نشر
يهمنى تعليقاتكم جداً لأنها بتدينى ثقة وبترفع روحى المعنوية
بس ارجو بلاش كلام وحش او اعلانات عن مدونات الا فى حالة الحملات الانسانية او المدونات التى يختص نشاطها بالنشاط الانسانى
واشكركم